বৰাক উপত্যকাৰ অসম বিশ্ববিদ্যালয়ত পুনৰ সৃষ্টি হৈছে এক অচলাৱস্থাৰ। বিশ্ববিদ্যালয়খনৰ ছাত্ৰ একতা সভাৰ সদস্যসকলে বৃহস্পতিবাৰে সন্ধিয়া উপাচাৰ্যৰ কক্ষত তলা লগাই দিয়ে।
সন্ধিয়া প্ৰায় ৭ মান বজাত ছাত্ৰ একতা সভাৰ অতিষ্ঠ হৈ পৰা প্ৰতিবাদকাৰীসকলে উপাচাৰ্যৰ কক্ষত তলা লগাই দিয়ে।
চৌৰ্যবৃত্তি আৰু অবৈধভাৱে পদোন্নতি লোৱাৰ অভিযোগত অভিযুক্ত বিশ্ববিদ্যালয়খনৰ এগৰাকী অধ্যাপক সমীৰা বেহৰাক মঞ্জুৰ কৰা দীঘলীয়া ছুটী প্ৰত্যাহাৰৰ বিৰুদ্ধে ছাত্ৰসকলে প্ৰতিবাদ কৰিছিল।
বৃহস্পতিবাৰে পুৱাৰ ভাগত ছাত্ৰ একতা সভাই উপাচাৰ্যৰ পৰা জানিব বিচৰাত গম পায় যে অধ্যাপকগৰাকীৰ দীঘলীয়া ছুটী যোৱা ১৯ ছেপ্টেম্বৰত উপাচাৰ্যৰ অনুমোদন সাপেক্ষে প্ৰত্যাহাৰ কৰা হৈছে। ইপিনে আদালতে ২৬ ছেপ্টেম্বৰত তেওঁ কিয় দীঘলীয়া ছুটীত গৈছিল তাৰ কাৰণ জনাবলৈ নিৰ্দেশ দিছিল।
উপাচাৰ্যৰ এনে কাৰ্যৰ বিৰুদ্ধে প্ৰতিবাদ কৰি ছাত্ৰ একতা সভাৰ প্ৰতিবাদকাৰী ছাত্ৰসকলে কাৰ্যতঃ উপাচাৰ্যগৰাকীক গৃহবন্দী কৰি ৰাখিছে আৰু তেওঁক চৌহদৰ বাহিৰলৈ ওলাই যাবলৈ দিয়া নাই।