চলিত বছৰৰ শিক্ষাবৰ্ষ শেষ হ’বলৈ মাজত মাথো দুটা মাহ বাকী। কিন্তু এই পৰ্যন্ত ৰাজ্যৰ শিক্ষা বিভাগে য়ুনিৰ্ফম যোগান ধৰিব নোৱাৰিলে যোৰহাট জিলাৰ টীয়ক কলিয়াপানীস্থিত পূব যোৰহাট শিক্ষাখণ্ডৰ অন্তৰ্গত খনামুখ লাচিত প্ৰাৰ্থমিক বিদ্যালয়ৰ ছাত্ৰ-ছাত্ৰীসকলক।
উল্লেখযোগ্য যে বিদ্যালয়খনত প্ৰথম শ্ৰেণীৰ পৰা পঞ্চম শ্ৰেণীলৈকে মুঠ ৩৩ গৰাকী ছাত্ৰ-ছাত্ৰীয়ে অধ্যয়ন কৰি আছে। চলিত বছৰৰ মাৰ্চ মাহত বিদ্যালয়ৰ প্ৰধান শিক্ষক গৌৰী শংংকৰ ৰাজখোৱাৰ ম’বাইলত বিদ্যায়খনৰ ছাত্ৰ-ছাত্ৰীৰ য়ুনিৰ্ফম চিলোৱাৰ বাবদ শিক্ষা বিভাগৰ কাৰ্যালয়ৰ পৰা ৪ হেজাৰ টকা বিদ্যালয়ৰ একাউন্টত জমা হোৱাৰ এটা মেচেজ আহে।
এযোৰ য়ুনিৰ্ফম চিলোৱাৰ বাবদ চাৰিশ টকা বিভাগে নিৰ্দ্ধাৰণ কৰি দিছে। সেই হিচাপত বিদ্যালয়ৰ ৩৩ গৰাকী ছাত্ৰ-ছাত্ৰীৰ য়ুনিফৰ্মৰ বাবদ মুঠ ১৩,২০০ টকা জমা হ’ব লাগিছিল, কিন্তু ১০ জন ছাত্ৰ-ছাত্ৰীৰ বাবেহে পূঁজি যোগান ধৰাত প্ৰধান শিক্ষক গৰাকী বিমোৰত পৰি এই বিষয়ত উৰ্দ্ধতম ৰ্কতৃপক্ষক অৱগত কৰাৰ উপৰিও যোৱা ১০ মে’ত পূব যোৰহাট শিক্ষা খণ্ডৰ খণ্ড প্ৰাথমিক শিক্ষা বিষয়া উৎপল কুমাৰ বৰুৱাক লিখিতভাৱে অৱগত কৰে।
যাৰ ভিত্তিত শিক্ষা বিষয়া গৰাকীয়ে ১৬ মে’ত যোৰহাট জিলা উন্নয়ণ আয়ুক্ত তথা সৰ্ব শিক্ষা বিভাগৰ জিলা মিচন সমন্বয়কক বিষয়টো লিখিত ভাবে জনায়। শিক্ষা বৰ্ষ সমাপ্ত হ’বলৈ মাজত মাথো দুটা মাহ বাকী থকা অৱস্থাতো বিদ্যালয়খনৰ ছাত্ৰ-ছাত্ৰী সকলে য়ুনিৰ্ফম লাভ নকৰাৰ বিষয়টোৱে অভিভাৱক তথা বিদ্যালয় পৰিচালনা সমিতিক ক্ষুন্ন কৰি তুলিছে।
যোৱা ১০ আগষ্ট’ত বিদ্যালয়ত পুনৰ ৰাজহুৱা সভাত অনুষ্ঠিত কৰি ৫ দিনৰ ভিতৰত বিদ্যালয়ৰ বাকী ২৩ গৰাকী ছাত্ৰ-ছাত্ৰীৰ য়ুনিৰ্ফমৰ ধন মুকলি কৰি দিবলৈ সংশ্লিষ্ট কৰ্তৃপক্ষক দাবী জনায়, আৰু এইক্ষেত্ৰত জিলা উন্নয়ণ আয়ুক্ত গৰাকীয়ে বিহিত ব্যৱস্থা গ্ৰহণ কৰাৰ আশ্বাস দিয়ে যদিও আজি পৰ্যন্ত বিদ্যালয়খনে য়ুনিৰ্ফমৰ ধন লাভ কৰা নাই।
উল্লেখযোগ্য যে চলিত বছৰৰ গুণোৎসৱত ‘এ’ গ্ৰেড প্ৰাপ্ত বিদ্যালয়খনৰ ছাত্ৰ-ছাত্ৰীয়ে য়ুনিফৰ্মৰ পৰা বঞ্চিত হোৱা খবৰে সৰ্ব-শিক্ষা বিভাগৰ দায়িত্ব জ্ঞানহীন স্বৰূপটো উদঙাই দিছে বুলি ৰাইজে মন্তব্য কৰিছে। তদুপৰি য়ুনিৰ্ফম নাপালে বিদ্যালয়খনত পৰৱৰ্তী গুণোৎসৱ উদযাপন কৰিবলৈ দিয়া নহ’ব বুলি একাংশ অভিভাৱক আৰু পৰিচালনা সমিতিয়ে হুংকাৰ দিছে।