হিমাচল প্ৰদেশৰ কাংগৰাৰ এজন যুৱকৰ বিয়াৰ প্ৰস্তুতি চলি থকাৰ মাজতে এটা দুখবৰ আহি পৰিছে। অহা ফেব্ৰুৱাৰী মাহত বিবাহপাশত আবদ্ধ হোৱাৰ কথা আছিল মাৰ্চেণ্ট নেভি অফিচাৰ ৰিক্ষিত চৌহানৰ। কেইদিনমানৰ পিছতে ঘৰলৈ উভতি অহাৰ কথা আছিল যদিও তাৰ পূৰ্বেই তেওঁক আমেৰিকাৰ সেনাই আটক কৰে। আটলাণ্টিক মহাসাগৰত এখন ৰাছিয়াৰ তৈল জাহাজত যাত্ৰা কৰি থকা অৱস্থাত ৰিক্ষিতসহ তিনিজন ভাৰতীয়ক আমেৰিকাৰ সেনাই জাহাজখনৰ সৈতে জব্দ কৰে। এই ঘটনাক লৈ এতিয়া চিন্তিত হৈ পৰিছে ৰিক্ষিতৰ পৰিয়ালৰ লগতে তেওঁৰ আত্মীয়সকল
আচলতে ভেনিজুৱেলাত এক সামৰিক অভিযান চলোৱাৰ পিছত আমেৰিকাই ৰাছিয়াৰ তেল টেংকাৰ মেৰিনেৰা জব্দ কৰিছিল। এই জাহাজখনৰ ২৮ জন যাত্ৰীৰ ভিতৰত তিনিজন আছিল ভাৰতীয়। ইয়াৰে ভিতৰত এজন হ’ল ২৮ বছৰীয়া ৰিক্ষিত চৌহান। উল্লেখ্য যে ৰাছিয়াৰ এটা নিযুক্তি সংস্থাই তেওঁক প্ৰথম চাকৰিৰ বাবে ভেনিজুৱেলালৈ প্ৰেৰণ কৰিছিল। যোৱা ৭ জানুৱাৰীত ৰিক্ষিতে শেষবাৰৰ বাবে তেওঁৰ পৰিয়ালৰ সৈতে কথা পাতিছিল। তাৰ পিছৰ পৰাই তেওঁৰ সৈতে যোগাযোগ বিছিন্ন হৈ পৰে আৰু ১০ জানুৱাৰীত পৰিয়ালে গম পায় যে তেওঁলোকৰ পুত্ৰক আমেৰিকাৰ সেনাই আটক কৰিছে।
পুত্ৰৰ এনে বিপদৰ সময়ত চকুৰ পানী টুকিছে মাতৃ ৰীতা দেৱীয়ে। অহা ১৯ ফেব্ৰুৱাৰীত ৰিক্ষিতৰ বিয়া হোৱাৰ কথা আছিল। পুত্ৰক সুকলমে ঘৰলৈ ঘূৰাই আনিবলৈ তেওঁ প্ৰধানমন্ত্ৰী নৰেন্দ্ৰ মোডীক কাতৰ অনুৰোধ জনাইছে। ভগৱানৰ ওচৰতো তেওঁ প্ৰাৰ্থনা জনাইছে যাতে তেওঁৰ পুত্ৰ সোনকালে ঘৰলৈ উভতি আহে। আনহাতে ৰিক্ষিতৰ পিতৃ ৰঞ্জিত সিঙে জনাইছে যে শেষবাৰ কথা পাতোতে ৰিক্ষিতে জনাইছিল যে ভেনিজুৱেলাৰ পৰিস্থিতিৰ বাবে কৰ্তৃপক্ষই তেওঁলোকক তাৰ পৰা উভতি যাবলৈ নিৰ্দেশ দিছে।
ইফালে ভাৰত চৰকাৰেও এই সমগ্ৰ বিষয়টো যথেষ্ট গুৰুত্বসহকাৰে গ্ৰহণ কৰিছে। বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছৱালে জনাইছে যে চৰকাৰে সমগ্ৰ পৰিস্থিতি নিৰীক্ষণ কৰি আছে। সেই জাহাজখনত থকা ভাৰতীয় নাগৰিকসকলৰ বিষয়ে তথ্য সংগ্ৰহ কৰাৰ লগতে তেওঁলোকক মুক্ত কৰি অনাৰ বাবে যাৱতীয় পদক্ষেপ গ্ৰহণ কৰা হৈছে। এতিয়া ৰিক্ষিতৰ পৰিয়ালে আশা কৰিছে যে ভাৰত চৰকাৰৰ হস্তক্ষেপেৰে তেওঁলোকৰ পুত্ৰ অতি সোনকালে সুকলমে দেশলৈ উভতি আহিব।
