এবছৰৰো অধিক কাল জেইলত থাকি অলপতে জামিনত মুকলি আকাশৰ তললৈ অহা চিলাপথাৰ কাণ্ডৰ খলনায়ক তথা নিখিল ভাৰত উদাস্তু সমন্বয় সমিতিৰ নেতা সুবোধ বিশ্বাস হৈ পৰিল হিন্দু বাংলাদেশীৰ নয়নৰ মণি। এতিয়া সুবোধ বিশ্বাসক বীৰদৰ্পে আদৰিবলৈ হিন্দু বাংলাদেশীৰ দল-সংগঠন আৰু তেওঁলোকৰ সমৰ্থকসকলৰ মাজত আগ্ৰহ বৃদ্ধি পোৱা দেখা গৈছে।
জানিব পৰামতে, অহা ৩০ ছেপ্তেম্বৰত নাগপুৰত অনুষ্ঠিত কৰিব লগীয়া এখন বৈঠকতো ভাষণ দিব সুবোধ বিশ্বাসে। ৰাজ্যৰ বাহিৰলৈ যাবলৈ আদালতে অনুমতি দিলেই নিখিল ভাৰত উদাস্তু সমন্বয় সমিতিৰ এই বৈঠকখনত ভাগ লোৱাৰ উদ্দেশ্য সুবোধ বিশ্বাস উৰা মাৰিব কলকাতালৈ। কলকাতাৰ বিমানবন্দৰতে নিখিল ভাৰত উদাস্তু সমন্বয় সমিতিয়ে তেওঁক আদৰণি জনাবলৈ প্ৰস্তুতি ইতিমধ্যে সম্পূৰ্ণ কৰিছে।
নাগপুৰত অনুষ্ঠিতব্য বৈঠকখনত হিন্দু বাংলাদেশীৰ নাগৰিকত্ব বিষয়টো বিস্তাৰিতভাৱে আলোচনা কৰা হ’ব আৰু সুবোধ বিশ্বাসে এই বৈঠকখনত ভাষণ দিব। লগতে বৈঠকৰ মজিয়াৰ পৰাই অসমত উন্নীতকৰণ হৈ থকা এন আৰ চিত হিন্দু বাংলাদেশীৰ নাম অন্তৰ্ভুক্তৰ দাবী উত্থাপন কৰা হ’ব। এইখিনি কথা জানিবলৈ দিছে নিখিল ভাৰত উদাস্তু সমন্বয় সমিতিৰ সাধাৰণ সম্পাদক তথা উচ্চতম ন্যায়ালয়ৰ এজন অধিবক্তা অম্বিকা ৰায়ে।