ভাৰতীয় অৰ্থনীতিলৈ ঘোৰ সংকটৰ আশংকা, চৰকাৰক সতৰ্ক কৰিলে সুব্ৰমণিয়ম স্বামীয়েপ্ৰখ্যাত অৰ্থনীতিবিদ, প্ৰাক্তন কেন্দ্ৰীয় আইন মন্ত্ৰী আৰু ৰাজ্যসভাৰ প্ৰাক্তন সাংসদ সুব্ৰমণিয়ম স্বামীয়ে ভাৰতৰ বৰ্তমানৰ অৰ্থনৈতিক অৱস্থাক লৈ গভীৰ উদ্বেগ প্ৰকাশ কৰিছে। তেওঁ সতৰ্ক কৰি দিছে যে যদিহে অতি সোনকালে অৰ্থনীতিত ডাঙৰ সংস্কাৰমূলক পদক্ষেপ গ্ৰহণ কৰা নহয়, তেন্তে দেশখনে অতি সোনকালেই এক ভয়ংকৰ অৰ্থনৈতিক সংকটৰ সন্মুখীন হ’ব পাৰে।
সামাজিক মাধ্যম এক্সত কৰা এটা প‘ষ্টত স্বামীয়ে দাবী কৰিছে যে ২০২০ চনৰ পৰাই ভাৰতৰ অৰ্থনীতি ক্ৰমান্বয়ে দুৰ্বল হ’বলৈ আৰম্ভ কৰিছে। তেওঁ লগতে কয় যে যদিহে সময় থাকোঁতে সঠিক ব্যৱস্থা গ্ৰহণ কৰা নহয়, তেন্তে এই বছৰৰ শেষৰ ফালে দেশৰ অৰ্থনীতি সম্পূৰ্ণৰূপে ভাঙি পৰাৰ সম্ভাৱনা আছে। এই বিষয়ত তেওঁ প্ৰধানমন্ত্ৰী নৰেন্দ্ৰ মোদী আৰু বিত্ত মন্ত্ৰালয়ক কঠোৰ সমালোচনা কৰি অভিযোগ কৰে যে তেওঁলোকে অৰ্থনীতিৰ এই কঠিন প্ৰত্যাহ্বানসমূহ সঠিকভাৱে মোকাবিলা কৰাত ব্যৰ্থ হৈছে।
দেশৰ অৰ্থনীতিক অধিক অৱনতিৰ পৰা ৰক্ষা কৰিবলৈ আৰু পুনৰ উন্নয়নৰ পথলৈ ঘূৰাই আনিবলৈ স্বামীয়ে দেশৰ আন অৰ্থনীতিবিদ আৰু পণ্ডিতসকলক সঠিক সমাধানৰ উপায় আগবঢ়াবলৈ আহ্বান জনাইছে।
