বিশ্বৰ মহাকাশ গৱেষণাৰ ইতিহাসত এক উজ্জ্বল নক্ষত্ৰ হিচাপে পৰিগণিত হোৱা নাছাৰ (NASA) জ্যেষ্ঠ মহাকাশচাৰী সুনীতা উইলিয়ামছে তেওঁৰ সুদীৰ্ঘ ২৭ বছৰীয়া বৰ্ণিল কেৰিয়াৰৰ পৰা অৱসৰ গ্ৰহণ কৰিছে। মহাকাশত কেইবাটাও অভিলেখ স্থাপন কৰাৰ লগতে অদম্য সাহস আৰু নেতৃত্বৰ পৰিচয় দিয়া উইলিয়ামছক নাছাই ‘মানৱ মহাকাশ ভ্ৰমণৰ পথপ্ৰদৰ্শক’ আখ্যাৰে সন্মান জনাইছে। শেহতীয়াকৈ মহাকাশত এক কঠিন প্ৰত্যাহ্বান নেওচি পৃথিৱীলৈ সুকলমে উভতি অহাৰ পিছত, বৰ্তমান ভাৰত ভ্ৰমণৰ মাজতে প্ৰকাশ পোৱা তেওঁৰ অৱসৰৰ খবৰে সমগ্ৰ বিশ্বৰে মহাকাশ প্ৰেমীসকলৰ মাজত বিশেষ চৰ্চা লাভ কৰিছে।
নাছাই প্ৰকাশ কৰা তথ্য অনুসৰি, ২০২৫ চনৰ ২৭ ডিচেম্বৰৰ পৰাই তেওঁৰ অৱসৰ কাৰ্যকৰী হৈছে। ৬০ বছৰীয়া উইলিয়ামছ বৰ্তমান ভাৰত ভ্ৰমণত আছে। যোৱা মঙলবাৰে (২০ জানুৱাৰী, ২০২৬) তেওঁ আমেৰিকান চেণ্টাৰত (American Center) আয়োজিত এক মত-বিনিময় অনুষ্ঠানত অংশগ্ৰহণ কৰি মহাকাশৰ ৰোমাঞ্চকৰ অভিজ্ঞতাৰ বিষয়ে উল্লেখ কৰে।
উল্লেখ্য যে উইলিয়ামছে মহাকাশত মুঠ ৬০৮ দিন অতিবাহিত কৰিছে। এজন নাছাৰ মহাকাশচাৰী হিচাপে এই তালিকাত তেওঁৰ স্থান দ্বিতীয়। তেওঁ মুঠ ৯ বাৰ মহাকাশত খোজ দিছে যিটো মুঠ ৬২ ঘণ্টা ৬ মিনিট, যিটো এগৰাকী মহিলাৰ বাবে সৰ্বাধিক সময়ৰ বিশ্ব অভিলেখ। তদুপৰি, উইলিয়ামছ মহাকাশত মাৰাথন দৌৰা পৃথিৱীৰ প্ৰথমগৰাকী ব্যক্তি। আমেৰিকাৰ নৌসেনাৰ এগৰাকী অৱসৰপ্ৰাপ্ত কেপ্তেইন হিচাপে তেওঁ ৪০ বিধ ভিন্ন প্ৰকাৰৰ বিমানত ৪,০০০ ঘণ্টাতকৈও অধিক সময় উৰণৰ অভিজ্ঞতা অৰ্জন কৰিছে।
২০২৪ চনৰ জুন মাহত বোয়িং ষ্টাৰলাইনাৰৰ (Boeing Starliner) আঠ দিনীয়া এক অভিযানত গৈ যান্ত্ৰিক বিজুতিৰ বাবে তেওঁ মহাকাশত আবদ্ধ হৈ পৰিছিল। পৰৱৰ্তী সময়ত সেই আঠ দিনীয়া যাত্ৰাটো ন মাহলৈ বৃদ্ধি পাইছিল আৰু ২০২৫ চনৰ মাৰ্চ মাহতহে তেওঁ স্পেচএক্সৰ (SpaceX) সহায়ত পৃথিৱীলৈ সুকলমে উভতি আহে।
১৯৬৫ চনৰ ১৯ ছেপ্টেম্বৰত আমেৰিকাৰ ওহিঅ’ত জন্মগ্ৰহণ কৰা সুনীতা উইলিয়ামছৰ পিতৃ আছিল গুজৰাটৰ মেহছানা জিলাৰ দীপক পাণ্ড্য আৰু মাতৃ আছিল স্লোভেনিয়ান মূলৰ উৰ্চুলিন বনী পাণ্ড্য। অৱসৰৰ মুহূৰ্তত তেওঁ কয়, “মহাকাশ মোৰ আটাইতকৈ প্ৰিয় ঠাই। নাছাত ২৭ বছৰীয়া এই যাত্ৰা মোৰ বাবে এক বিৰল সন্মান আছিল। মোৰ সহকৰ্মীসকলৰ মৰম আৰু সমৰ্থনৰ বাবেই এয়া সম্ভৱ হৈছে। অনাগত দিনত চন্দ্ৰ আৰু মঙল গ্ৰহৰ অভিযানৰ বাবে আমি যি ভেঁটি স্থাপন কৰিছোঁ, তাৰ সফলতাক লৈ মই উৎসাহিত।”
