ৰাষ্ট্ৰসংঘৰ শৰণাৰ্থী উচ্চায়ুক্ত (ইউএনএইচচিআৰ)ৰ কাৰ্য্যপ্ৰণালীৰ ওপৰত কঠোৰ সমালোচনা ভাৰতৰ উচ্চতম ন্যায়ালয়ৰ। শৰণাৰ্থীৰ প্ৰমাণ পত্ৰ প্ৰদানৰ প্ৰক্ৰিয়াক লৈ ন্যায়ালয়ৰ বিচাৰপীঠে ক্ষোভ প্ৰকাশ কৰি কয় যে “তেওঁলোকে ইয়াত শ্ব’ৰুম খুলিছে। যাকে বিচাৰে তেওঁক প্ৰমাণ পত্ৰ দিছে। আমি সেইবোৰৰ বিষয়ে কথা ক’ব নিবিচাৰো।” চুডানৰ এজন নাগৰিকে নিজৰ পৰিয়ালৰ বাবে সুৰক্ষা বিচাৰি কৰা আবেদনৰ শুনানিৰ সময়ত ইউএনএইচচিআৰ কাৰ্য্যপ্ৰণালীত ক্ষোভিত হৈ বিচাৰপীঠে এনেদৰে মন্তব্য কৰে।
ঘটনাক্ৰম অনুসৰি চুডানৰ এই নাগৰিকজন ২০১৩ চনৰ পৰা ভাৰতত বাস কৰি আছে আৰু তেওঁৰ এগৰাকী পত্নী আৰু দুটা সন্তান আছে, এজনৰ বয়স মাত্ৰ ৪০ দিন। তেওঁৰ পৰিয়ালৰ হাতত ইউএনএইচচিআৰৰ দ্বাৰা প্ৰদান কৰা শৰণাৰ্থীৰ প্ৰমাণ পত্ৰ আছে বুলি তেওঁ দাবী কৰিছে। শেহতীয়াকৈ ভাৰতত আফ্ৰিকান নাগৰিকসকলক গ্ৰেপ্তাৰ কৰাৰ পৰিপ্ৰেক্ষিতত নিজৰ পৰিয়ালৰ বিৰুদ্ধে কঠোৰ ব্যৱস্থা গ্ৰহণৰ পৰা হাত সাৰিবলৈ তেওঁ উচ্চতম ন্যায়ালয়ত আবেদন কৰিছিল।
উচ্চতম ন্যায়ালয়ৰ ন্যায়াধীশ সূৰ্য কান্ত আৰু জয়মল্য বাগচীৰ বিচাৰপীঠত এই গোচৰৰ শুনানিৰ সময়ত আবেদনকাৰীৰ অধিবক্তাই যুক্তি দাঙি কয় যে আাবেদনকাৰীৰ পৰিয়ালক ইউএনএইচচিআৰে শৰণাৰ্থী হিচাপে চিনাক্ত কৰিছে আৰু তেওঁলোকৰ হাতত বৈধ প্ৰমাণ পত্ৰ আছে। অধিবক্তাগৰাকীয়ে আৰু কয় যে ইউএনএইচচিআৰে শৰণাৰ্থীৰ প্ৰমাণ পত্ৰ প্ৰদানৰ আগতে বিতং পৰীক্ষা-নিৰীক্ষা কৰে আৰু এই প্ৰক্ৰিয়াত সাধাৰণতে কেইবাবছৰ সময় লাগে।
কিন্তু ন্যায়াধীশ সূৰ্য কান্তে ইউএনএইচচিআৰৰ কৰ্মশৈলীৰ ওপৰত প্ৰশ্ন উত্থাপন কৰি কয়, “তেওঁলোকে ইয়াত এটা শ্ব’ৰুম খুলিছে। যাক বিচাৰে তেওঁক প্ৰমাণ পত্ৰ দিছে।” আইনী বাতৰি ৱেবছাইট ‘বাৰ এণ্ড বেঞ্চ’ৰ মতে, ন্যায়াধীশ বাগচিয়ে স্পষ্ট কৰি দিয়ে যে ভাৰতে ১৯৫১ চনৰ আন্তৰ্জাতিক শৰণাৰ্থী সন্ধিক আনুষ্ঠানিকভাৱে স্বীকৃতি দিয়া নাই। ফলত এই সন্দৰ্ভত আবেদনকাৰীৰ কোনো আইনী প্ৰতিকাৰ নাই।
