অৱশেষত জামিন লাভ কৰিলে দিল্লীৰ মুখ্যমন্ত্ৰী তথা আম আদমী পাৰ্টিৰ মুৰব্বী অৰবিন্দ কেজৰিৱালে। শুকুৰবাৰে উচ্চতম ন্যায়ালয়ে তেওঁৰ জামিন আবেদন মঞ্জুৰ কৰে।
আবকাৰী দুৰ্নীতিৰ গোচৰত গ্ৰেপ্তাৰ কৰা হৈছিল অৰবিন্দ কেজৰিৱালক। লোকসভা নিৰ্বাচনৰ পূৰ্বে তেওঁক গ্ৰেপ্তাৰ কৰা হৈছিল। অৱশ্যে নিৰ্বাচনৰ সময়ত তেওঁক এদিনৰ বাবে জামিন মঞ্জুৰ কৰিছিল উচ্চতম ন্যায়ালয়ে।
তাৰ পিছত যোৱা ২১ মে’ৰ পৰা দিল্লীৰ মুখ্যমন্ত্ৰীগৰাকী তিহাৰ জেলত বন্দী হৈ আছে। ইয়াৰ পূৰ্বে ইডি গোচৰত জামিন লাভ কৰিছিল কেজৰিৱালে। এতিয়া চিবিআইৰ গোচৰত জামিন লাভ কৰি জেলৰ পৰা মুক্তি পাবলৈ গৈ আছে।পূৰ্বৰ শুনানিত তেওঁৰ জামিনত বাধা দিবলৈ চিবিআইয়ে কঠোৰ যুঁজ দিছিল।
কেজৰিৱালৰ অধিবক্তা অভিষেক মনু সিংভীয়ে কয়, দিল্লীৰ মুখ্যমন্ত্ৰীগৰাকীয়ে দেশৰ পৰা পলায়ন কৰাটো সম্ভৱনে? কিয় জামিনৰ বিৰোধিতা কৰিছে চিবিআইয়ে? তদুপৰি আৱকাৰী গোচৰৰ অধিকাংশ অভিযুক্তই জামিন লাভ কৰিছে। তাৰ পিছত তেওঁৰ ক্লায়েণ্টে কিয় জামিন নাপাব, তেওঁ সেই প্ৰশ্ন উত্থাপন কৰে।
লগতে পঢ়কঃ চুইজাৰলেণ্ডৰ বেংকৰ পৰা জব্দ ২৬০০ কোটি টকা! আদানী কাণ্ডত এক নতুন টুইষ্ট
শুকুৰবাৰে উচ্চতম ন্যায়ালয়ে কেজৰিৱালক জামিন মঞ্জুৰ কৰি কয় যে ইমান দিনে কাৰোবাক জেলত ৰখাটো স্বাধীনতাৰ বঞ্চনাৰ সমান।
জামিন পোৱাৰ ফলস্বৰূপে ৬ মাহৰ পাছত জেলৰ পৰা মুক্তি পালে কেজৰিৱালে। অৱশ্যে ইয়াৰ পূৰ্বে চিবিআইয়ে তদন্তত ব্যাঘাত জন্মোৱাৰ আশংকা প্ৰকাশ কৰিছিল। দিল্লীৰ মুখ্যমন্ত্রীগৰাকীয়ে প্রথমে জামিনৰ বাবে নিম্ন ন্যায়ালয়লৈ যাব লাগে বুলি মন্তব্য কৰিছিল৷ দিল্লী উচ্চ ন্যায়ালয়ে দিছিল এনে ৰায়।
সেই ৰায়ৰ বিৰুদ্ধে কেজৰিৱালে উচ্চতম ন্যায়ালয়ত গোচৰ ৰুজু কৰিছিল। উচ্চতম ন্যায়ালয়ে পৰ্যবেক্ষণ কৰে যে অৰবিন্দ কেজৰিৱালক হয়তো চিবিআইয়ে গ্ৰেপ্তাৰ কৰিছিল যাতে ইডি গোচৰত জামিনত মুকলি হব নোৱাৰে।
এই গোচৰৰ ৰায়দানত চিবিআইৰ ভূমিকাক লৈ কাৰ্যকৰীভাৱে প্ৰশ্ন উত্থাপন কৰিছে উচ্চতম ন্যায়ালয়ে। ন্যায়াধীশ উজ্জ্বল ভূঞা আৰু ন্যায়াধীশ সূৰ্য কান্তৰ খণ্ড বিচাৰপীঠে কয় যে ২২ মাহৰ পাছতো চিবিআইয়ে তেওঁক গ্ৰেপ্তাৰ কৰাৰ প্ৰয়োজনীয়তা অনুভৱ কৰা নাছিল। আৰু তেওঁক কিয় ইমান দিন জেলত ৰখা হৈছে তাৰ কোনো সুনিৰ্দিষ্ট উত্তৰ দিব নোৱাৰিলে কেন্দ্ৰীয় সংস্থাটোৱে।
লগতে পঢ়কঃমায়াজাল! পত্নীকো লাগে, প্ৰেমিকাকো এৰিব নিবিচাৰে; ৪ বছৰৰ লীলা-খেলাৰ অন্তত সোমাল জেলত
উচ্চতম ন্যায়ালয়ে দিল্লীৰ মুখ্যমন্ত্ৰীক জামিন মঞ্জুৰ কৰে যদিও কেইবাটাও চৰ্ত আৰোপ কৰে। কাৰাগাৰৰ পৰা ওলাই অহাৰ পিছত কেজৰিৱালে কোনো ফাইলত চহী কৰিব নোৱাৰিব বুলি স্পষ্ট কৰি দিয়া হৈছে। নিজৰ কাৰ্যালয়লৈও যাব নোৱাৰিব।
