জৱাহৰলাল নেহৰু বিশ্ববিদ্যালয়ৰ প্ৰাক্তন অধ্যাপিকা অমিতা সিঙে দাখিল কৰা মানহানিৰ গোচৰত জাৰি কৰা চমনক প্ৰত্যাহ্বান জনাই সংবাদ প্ৰতিষ্ঠান দ্য ৱায়াৰে দাখিল কৰা আবেদনৰ শুনানিৰ সময়ত এক গুৰুত্ব পূৰ্ণ ৰায় দান দিছে উচ্চতম ন্যায়ালয়ে। ৰায়দানত ন্যায়ালয়ে কয় যে মানহানি অপৰাধ হিচাপে গণ্য কৰা বন্ধ কৰাৰ সময় আহি পৰিছে। সোমবাৰে শুনানিৰ সময়ত এই মন্তব্য কৰিছে উচ্চতম ন্যায়ালয়ে।
উল্লেখ্য যে এই গোচৰটো ২০১৬ চনত প্ৰকাশিত এটা প্ৰবন্ধৰ সৈতে জড়িত। লেখাটোত অভিযোগ কৰা হৈছে যে, জেএনইউক সংগঠিত যৌন ৰেকেটৰ কেন্দ্ৰ হিচাপে বৰ্ণনা কৰা হৈছে, আৰু ছাত্ৰ-ছাত্ৰী আৰু অধ্যাপকসকলে ইয়াক ঘৃণামূলক অভিযান বুলি দাবী কৰিছে। ন্যায়াধীশ এম.এম. সুন্দৰেশে মন্তব্য কৰে যে, “মই ভাবো এই সকলোবোৰ অপৰাধমুক্ত কৰাৰ সময় আহি পৰিছে।” এই সন্দৰ্ভত আদালতে অমিতা সিঙলৈ জাননী জাৰি কৰে।
মানহানিৰ দৰে অপৰাধ ভাৰতীয় দণ্ডবিধিৰ ৩৫৬ ধাৰাৰ অন্তৰ্ভুক্ত যি ভাৰতৰ এখন পুৰণি আইনৰ ঠাইত গ্ৰহণ কৰা হৈছে। সততে এই আইন ৰাজনীতিবিদ আৰু ব্যৱসায়ীসকলে সাংবাদিক আৰু প্ৰতিদ্বন্দ্বীসকলৰ বিৰুদ্ধে ব্যৱহাৰ কৰে। কিন্তু বেছিভাগ গণতান্ত্ৰিক দেশতে মানুহে কেৱল মানহানিৰ বাবে দেৱানী গোচৰৰ সন্মুখীন হয়, কাৰাদণ্ডৰ নহয়। সুব্ৰমণিয়াম স্বামী, ৰাহুল গান্ধী, অৰবিন্দ কেজৰিৱালৰ দৰে নেতাৰ প্ৰত্যাহ্বানৰ পিছতো ২০১৬ চনত উচ্চতম ন্যায়ালয়ে পুৰণি আইনখন সমৰ্থন কৰিছিল।
