শুকুৰবাৰে নিৰপেক্ষতা আৰু স্বচ্ছতাৰ এক সুকীয়া নিদৰ্শনৰ সাক্ষী হৈ ৰ’ল উচ্চতম ন্যায়ালয়। আজি আছিল ন্যায়াধীশ বি আৰ গাভাইৰ নেতৃত্বৰ বিচাৰপীঠত ৰাহুল গান্ধীৰ সাংসদ পদ বাতিলৰ নিৰ্দেশক প্ৰত্যাহ্বান জনাই তৰা গোচৰৰ শুনানি। নিজে নহ’লেও তেওঁৰ পৰিয়ালটো দীৰ্ঘদিন ধৰি কংগ্ৰেছৰ সৈতে প্ৰত্যক্ষ বা পৰোক্ষভাৱে জড়িত হৈ আছে। গতিকে ন্যায়াধীশ গাভাইয়ে ৰাহুলৰ গোচৰৰ পৰা নিজকে আঁতৰাই আনিব বিচাৰিলে।
শুনানিৰ আৰম্ভণিতে ন্যায়াধীশ গাভাইয়ে আদালতত কয় যে তেওঁৰ পৰিয়ালটো কংগ্ৰেছৰ সৈতে জড়িত। দুয়োপক্ষৰ অধিবক্তাৰ পৰা তেওঁ জানিব বিচাৰে, তেওঁলোকে এতিয়াও বিচাৰেনে যে তেওঁ এই গোচৰৰ শুনানি গ্ৰহণ কৰক?
তেওঁৰ বক্তৱ্য শেষ হোৱাৰ পিছতে ৰাহুল গান্ধীৰ অধিবক্তা অভিষেক মনু সিংভী আৰু পূৰ্ণেশ মোডীৰ অধিবক্তা মহেশ জেঠমালানী দুয়োজনে কয় যে তেওঁলোকৰ কোনো আপত্তি নাই। নিৰপেক্ষতা আৰু স্বচ্ছতাৰ স্বাৰ্থত ন্যায়াধীশ গাভাইয়ে পূৰ্বেই যিধৰণে কংগ্ৰেছৰ সৈতে পৰিয়ালৰ সম্পৰ্কৰ কথা প্ৰকাশ কৰিলে, সেইটোৱে নেটজগতৰ লগতে সকলোৰে প্ৰশংসা লাভ কৰিছে।
ন্যায়াধীশ বি আৰ গাভাইয়ে ঠিক কি কৈছিল? তেওঁৰ ভাষাত, “শুনানিৰ পূৰ্বে মই এটা কথা স্পষ্ট কৰিব বিচাৰিছো, যদিও সদস্য নহয়, মোৰ দেউতা বহুদিন কংগ্ৰেছৰ সৈতে জড়িত আছিল। সিংভী ডাঙৰীয়া, আপুনিও ভালদৰেই জানে, চল্লিশ বছৰতকৈও অধিক সময় কংগ্ৰেছৰ সৈতে জড়িত হৈ থকাৰ বাবে, মোৰ ভাইটি নিজেই কংগ্ৰেছৰ সৈতে প্ৰত্যক্ষভাৱে জড়িত। মই বিচাৰো যে শুনানিৰ পূৰ্বে আপোনালোকে নিজৰ মাজতে আলোচনা কৰক আৰু মোক কওক যে মই এই গোচৰটো আচলতে শুনা উচিত নে নাই।’’
লগতে পঢ়ক: ইছৰোৱে দিছে খবৰ! সহজেই কক্ষপথ সলনি কৰি চন্দ্ৰৰ ওচৰলৈ গতি কৰিছে চন্দ্ৰযান-৩
দুয়োগৰাকী অধিবক্তাই কয় যে তেওঁলোকৰ কোনো আপত্তি নাই। তাৰ পাছত ন্যায়াধীশগৰাকীয়ে কয়, ‘’কংগ্ৰেছৰ সৈতে মোৰ পৰিয়ালৰ সম্পৰ্কৰ বিষয়ে সকলোৱে জনা উচিত বুলি মই ভাবো। ভৱিষ্যতে এই বিষয়ে কোনো আলোচনা হোৱাটো নিবিচাৰো। আমি সকলোৱে জানো মোৰ দেউতা, সিংভীজী আপোনাৰ পিতৃ আৰু মহেশ জেঠমালানীৰ পিতৃ – তিনিওজনেই একেলগে সংসদত আছিল। তিনিওজন বৰ ভাল বন্ধু আছিল। এসময়ত ৰাম জেঠমালানীৰ দৰে বিশিষ্ট অধিবক্তাৰ জুনিয়ৰ হিচাপে কাম কৰি মই অতিশয় সন্মানিত আৰু গৌৰৱান্বিত।”
শেহতীয়াকৈ বিভিন্ন গোচৰত ন্যায়পালিকা, ন্যায়াধীশ তথা ন্যায়াধীশৰ পক্ষপাতিত্বৰ অভিযোগ উত্থাপন হৈ আহিছে। কলকাতা উচ্চ ন্যায়ালয়ৰ বিভিন্ন ন্যায়াধীশ‘ৰ ‘ৰাজনৈতিকভাৱে প্ৰেৰিত’ পৰ্যবেক্ষণ,, চুৰাটৰ নিম্ন আদালত, ৰাহুল গান্ধীৰ সংসদ পদ বাতিলৰ ৰায় দিয়া গুজৰাট উচ্চ ন্যায়ালয়ৰ ন্যায়াধীশ, তেওঁলোকৰ সৈতে বিজেপিৰ সম্পৰ্ক, দেশৰ প্ৰাক্তন মুখ্য ন্যায়াধীশৰ ঐতিহাসিক ৰায়দানৰ পিছত ৰাজ্যসভাত ৰাষ্ট্ৰপতিৰ সাংসদ পদৰ মনোনয়ন আদিয়ে নিৰপেক্ষতাৰ ওপৰত বিভিন্ন প্ৰশ্ন উত্থাপন কৰিছে।
লগতে পঢ়ক: সাক্ষাৎকাৰৰ নামত হোটেললৈ মাতি আনি অভিনেত্ৰীক ধৰ্ষণ; আৰক্ষীক অভিযোগ ভুক্তভোগীৰ
এনে এক পৰিবেশৰ মাজতে ন্যায়াধীশ বি আৰ গাভাইৰ উক্ত ভূমিকাক দেশ তথা সমাজৰ চুকে-কোণে শলাগিছে।
