ভাৰতৰ উচ্চতম ন্যায়ালয়ে ন্যায়িক সেৱাত প্ৰৱেশৰ ক্ষেত্ৰত গুৰুত্ব পূৰ্ণ ৰায় দান দিছে। এতিয়াৰে পৰা প্ৰাৰ্থীসকলে ন্যায়িক সেৱাৰ পৰীক্ষা, যেনে অসামৰিক ন্যায়াধীশ (জুনিয়ৰ ডিভিজন) পদৰ বাবে যোগ্য হ’বলৈ অধিবক্তা হিচাপে কমেও তিনি বছৰৰ আইনী প্ৰেকটিছ থাকিব লাগিব বৌলি শেহতীয়া ৰায়্দানত প্ৰকাশ কৰিছে। এই সিদ্ধান্তই ২০০২ চনত আঁতৰোৱা এটা প্ৰয়োজনীয়তা পুনৰ প্ৰৱৰ্তন কৰিছে যি নতুনকৈ আইনৰ স্নাতকহোৱাসকলক পোনপটীয়াকৈ আবেদন কৰাত বাধা দিছিল। আদালতে কয় যে ব্যৱহাৰিক অভিজ্ঞতাৰ প্ৰয়োজনীয়তাৰ জৰিয়তে ন্যায়িক দক্ষতা নিশ্চিত কৰাৰ লক্ষ্যৰে এই নিয়ম প্ৰৱৰ্তন কৰা হৈছে। চলি থকা নিযুক্তিৰ ক্ষেত্ৰত এই নিয়ম প্ৰযোজ্য নহয়, ভৱিষ্যতৰ নিযুক্তিৰ ক্ষেত্ৰতহে প্ৰযোজ্য হ’ব বুলি সদৰী কৰিছে।
আদালতৰ এই সিদ্ধান্তই ব্যৱহাৰিক অভিজ্ঞতা নথকা সদ্য স্নাতকসকলক নিযুক্তি দিয়াৰ ফলত ন্যায়পালিকাত অদক্ষতাৰ সৃষ্টি হোৱাৰ উদ্বেগক সম্বোধন কৰিছে। ইতিমধ্যে কেইবাখনো উচ্চ ন্যায়ালয়ে উন্নত ন্যায়িক প্ৰদৰ্শনৰ বাবে দুবছৰ বা তিনিবছৰৰ অনুশীলনৰ প্ৰয়োজনীয়তাক সমৰ্থন কৰিছে। উচ্চতম ন্যায়ালয়ে সকলো উচ্চ ন্যায়ালয় আৰু ৰাজ্য চৰকাৰক এই নিয়ম সংশোধন কৰিবলৈ নিৰ্দেশ প্ৰদান কৰিছে। দেৱানী ন্যায়াধীশ (জ্যেষ্ঠ বিভাগ)ৰ বিভাগীয় পদোন্নতি ১০%ৰ পৰা ২৫%লৈ বৃদ্ধি কৰাৰ লগতে প্ৰৱেশ পৰ্যায়ৰ পদৰ বাবে তিনি বছৰীয়া প্ৰেকটিছৰ নিয়ম প্ৰৱৰ্তন কৰা হৈছে।
উচ্চতম ন্যায়ালয়ৰ এই সিদ্ধান্তই মিশ্ৰিত প্ৰতিক্ৰিয়াৰ সৃষ্টি কৰিছে। একাংশই ইয়াক ন্যায়িক মানদণ্ড উন্নত কৰাৰ পদক্ষেপ হিচাপে গণ্য কৰিলেও বহু আইন স্নাতকে কলেজৰ পিছতে ন্যায়িক সেৱাত প্ৰৱেশ কৰাৰ পৰিকল্পনা পলম হোৱাৰ বাবে হতাশ হৈ পৰিছে। ছ’চিয়েল মিডিয়াৰ পোষ্টসমূহৰ পৰা প্ৰাৰ্থীসকলৰ মাজত হতাশাৰ প্ৰতিফলন স্পষ্ট হৈ পৰিছে।
আন্হাতে কিছুমানে ইয়াক গভীৰ ন্যায়িক বিষয়ৰ “এলেহুৱা সমাধান” বুলি অভিহিত কৰিছে। আদালতে ফলপ্ৰসূ ন্যায়িক কাৰ্য্যকলাপৰ বাবে ব্যৱহাৰিক অভিজ্ঞতা অতি প্ৰয়োজনীয় বুলি মতপ্ৰকাশ কৰাৰ লগতে উচ্চাকাংক্ষী ন্যায়াধীশসকলক আবেদন কৰাৰ পূৰ্বে বাস্তৱ জগতৰ আইনী অভিজ্ঞতা লাভ কৰিবলৈ আহ্বান জনায়।
