জম্মু-কাশ্মীৰৰ কুপৱাৰাত ২০২৩ চনত সংঘটিত জিম্মাত নিৰ্যাতনৰ এক গুৰুতৰ ঘটনাৰ তদন্তৰ বাবে উচ্চতম ন্যায়ালয়ে চিবিআইক নিৰ্দেশ দিছে। ন্যায়াধীশ বিক্ৰম নাথ আৰু ন্যায়াধীশ সন্দীপ মেহতাৰ বিচাৰপীঠে সোমবাৰে এই গোচৰৰ শুনানিৰ সময়ত অভিযুক্ত আৰক্ষী বিষয়াসকলক এমাহৰ ভিতৰত গ্ৰেপ্তাৰৰ নিৰ্দেশ দিছে। ইয়াৰ লগতে, জম্মু-কাশ্মীৰ প্ৰশাসনক ভুক্তভোগী আৰক্ষী কনিষ্টবল খুৰশ্বিদ আহমেদ চৌহানক ৫০ লাখ টকাৰ ক্ষতিপূৰণ প্ৰদানৰ নিৰ্দেশ দিছে।
২০২৩ চনৰ ২০ ফেব্ৰুৱাৰীৰ পৰা ২৬ ফেব্ৰুৱাৰীলৈ খুৰশ্বিদক কুপৱাৰাৰ যুটীয়া জেৰা কেন্দ্ৰত (জে আই চি) ছদিনৰ বাবে অবৈধভাৱে আটক কৰি অমানৱীয় নিৰ্যাতন চলোৱা হৈছিল। তেওঁৰ অভিযোগ অনুসৰি, তেওঁক প্ৰহাৰৰ কৰাৰ লগতে যৌনাংগ কাটি পেলোৱাৰ দৰে নৃশংস নিৰ্যাতন চলোৱা হৈছিল। এই ঘটনাৰ পিছত তেওঁ জম্মু-কাশ্মীৰ উচ্চ ন্যায়ালয়ত গোচৰ দাখিল কৰি নিজৰ মৌলিক অধিকাৰৰ লংঘনৰ কথা উত্থাপন কৰিছিল। কিন্তু, তেওঁৰ বিৰুদ্ধে ভাৰতীয় দণ্ডবিধিৰ (আই পি চি) ধাৰা ৩০৯ (আত্মহত্যাৰ চেষ্টা)ৰ অধীনত এখন এফআইআৰ ৰুজু কৰা হৈছিল। উচ্চতম ন্যায়ালয়ে এই এফআইআৰ বাতিল কৰি কয় যে এনে গোচৰৰ জাৰি ৰখাটো ন্যায়ৰ প্ৰতি অপমান।
আদালতে চিবিআইক এই দুবছৰ পুৰণি ঘটনাৰ তদন্তৰ বাবে এখন বিশেষ তদন্তকাৰী দল (এছ আই টি) গঠন কৰিবলৈ নিৰ্দেশ দিছে। লগতে, কুপৱাৰাৰ জে আই চিৰ কাৰ্যপ্ৰণালীত থকা ‘গাঁথনিগত সমস্যা’ৰ তদন্ত কৰি এনে নিৰ্যাতনৰ কাৰণসমূহ মূল্যায়ন কৰিবলৈ নিৰ্দেশ দিয়া হৈছে। বিচাৰপীঠে জোৰ দি কয় যে এনে ঘটনাই আৰক্ষীৰ জেৰা প্ৰক্ৰিয়াৰ গুৰুতৰ ত্ৰুটি আৰু দায়সামৰাৰ সংস্কৃতিক উদঙাই দিয়ে।
উচ্চতম ন্যায়ালয়ৰ এই ৰায়ত জিম্মাত নিৰ্যাতনৰ বিৰুদ্ধে ভাৰতীয় সংবিধানৰ ২১ নং অনুচ্ছেদৰ অধীনত থকা মৌলিক অধিকাৰৰ সুৰক্ষাৰ বিষয়টো স্পষ্ট হৈ পৰিছে। আদালতে স্পষ্ট কৰিছে যে আৰক্ষীৰ তদন্তৰ অধিকাৰ আছে, কিন্তু এনে অমানুষিক পদ্ধতিৰ জৰিয়তে জোৰকৈ স্বীকাৰোক্তি আদায় কৰাটো সম্পূৰ্ণৰূপে গ্ৰহণযোগ্য নহয়।
