আই আই টি খড়গপুৰ আৰু উত্তৰ প্ৰদেশৰ নয়দাৰ এখন বিশ্ববিদ্যালয়ত দুজন ছাত্ৰ-ছাত্ৰীৰ মৃত্যুৰ ঘটনাৰ বাবে উচ্চতম ন্যায়ালয়ে নিজা কৈ তদন্তৰ সিদ্ধান্ত গ্ৰহণ কৰিছে। যোৱা সপ্তাহত আই আই টি খড়গপুৰৰ চতুৰ্থ বৰ্ষৰ এজন ছাত্ৰৰ মৃতদেহ হোষ্টেলত ওলমি থকা অৱস্থাত উদ্ধাৰ হৈছিল। ছাত্ৰজনক আত্মহত্যাৰ সন্দেহ কৰা হৈছে। একেদৰে, নয়দাৰ এখন বিশ্ববিদ্যালয়ৰ হোষ্টেলতো এগৰাকী ছাত্ৰীৰ মৃতদেহৰ লগতে এখন ছুইচাইড নোট উদ্ধাৰ হৈছে। এই দুয়োটা ঘটনাৰ তদন্তৰ বাবে উচ্চতম ন্যায়ালয়ৰ ন্যায়াধীশ জে বি পাৰ্দিৱালা আৰু ন্যায়াধীশ আৰ মহাদেৱানৰ বিচাৰপীঠে নিজা কৈ তদন্তৰ কথা ঘোষণা কৰিছে।
উচ্চতম ন্যায়ালয়ে দুয়োখন শিক্ষানুষ্ঠানৰ পৰা এই মৃত্যুৰ ঘটনা সন্দৰ্ভত বিতং প্ৰতিবেদন দাখিল কৰিবলৈ নিৰ্দেশ দিছে। আদালতে মন্তব্য কৰিছে যে শিক্ষা ব্যৱস্থাত কিছু গুৰুতৰ সমস্যা আছে। বিচাৰপীঠে জানিব বিচাৰিছে যে এই ঘটনাৰ পিছত আৰক্ষীক তৎকালে অৱগত কৰা হৈছিল নেকি। লগতে, জ্যেষ্ঠ অধিবক্তা অপৰ্ণা ভাটক এই গোচৰত এমিকাছ কুৰিয়া হিচাপে হাজিৰ হ’বলৈ নিৰ্দেশ দিয়া হৈছে। তেওঁক এফআইআৰ ৰুজুৰ সময় আৰু কৰ্তৃপক্ষই আৰক্ষীক তৎকালে জাননী দিয়াৰ বিষয়ে তথ্য সংগ্ৰহ কৰিবলৈও নিৰ্দেশ দিছে।
উল্লেখ্য যে নয়দাৰ মৃত ছাত্ৰজন দন্ত অস্ত্ৰোপচাৰ বিভাগৰ দ্বিতীয় বৰ্ষৰ ছাত্ৰ আছিল। উদ্ধাৰ হোৱা ছুইচাইড নোটত বিশ্ববিদ্যালয়ৰ দন্ত চিকিৎসা বিভাগৰ এজন পুৰুষ আৰু এগৰাকী মহিলা শিক্ষয়িত্ৰীৰ বিৰুদ্ধে মানসিক হাৰাশাস্তিৰ অভিযোগ উত্থাপন কৰা হৈছে। ইয়াৰ উপৰিও, যোৱা সাত মাহত আই আই টি খড়গপুৰত চতুৰ্থবাৰৰ বাবে এনে ধৰণৰ মৃত্যুৰ ঘটনা সংঘটিত হৈছে। এই লৈ উচ্চতম ন্যায়ালয়ে আশ্চৰ্য প্ৰকাশ কৰিছে।
প্ৰসংগক্ৰমে পূৰ্বৰ এটা গোচৰত, ২৪ মাৰ্চত উচ্চতম ন্যায়ালয়ে কৈছিল যে প্ৰতিটো আত্মহত্যাৰ গোচৰত এফআইআৰ ৰুজু কৰাৰ প্ৰয়োজন। আদালতে জানিব বিচাৰিছে যে আই আই টি খড়গপুৰ আৰু নয়দা বিশ্ববিদ্যালয়ৰ এই ঘটনাৰ পিছত কৰ্তৃপক্ষই কি পদক্ষেপ গ্ৰহণ কৰিছে। লগতে, যদি এফআইআৰ ৰুজুত পলম বা কোনো ত্ৰুটি ধৰা পৰে, তেন্তে আদালতে অৱমাননাৰ বাবে ব্যৱস্থা গ্ৰহণ কৰিব পাৰে বুলিও সতৰ্ক কৰিছে। সোমবাৰে এই গোচৰৰ পৰৱৰ্তী শুনানিৰ দিন ধাৰ্য কৰিছে।
