উচ্চতম ন্যায়ালয়ৰ নিৰ্দেশত ইতিহাসত প্ৰথমবাৰৰ বাবে স্থগিত ৰখা হ’ব পুৰীৰ ঐতিহ্যপূৰ্ণ ৰথযাত্ৰা।
এইবছৰ আৰু বহু প্ৰতীক্ষিত পুৰীৰ ৰথযাত্ৰা আৰু অনুষ্ঠিত নহয়।
উচ্চতম ন্যায়ালয়ৰ মুখ্য ন্যায়াধীশ এছ এ ব’বডে মন্তব্য কৰে যে কৰ’না সংকটৰ সময়ত এই বছৰ ‘’ৰথযাত্ৰাৰ অনুমতি দিলে প্ৰভু জগন্নাথে আমাক ক্ষমা নকৰিব।
উল্লেখ্য যে অহা ২৩ জুনত জগন্নাথৰ ৰথযাত্ৰাৰ দিন। পুৰীৰ এই ঐতিহ্যপূৰ্ণ ৰথযাত্ৰাত লাখ লাখ মানুহৰ সমাগম হয়।
ইপিনে, জন সমাগম হ্ৰাস কৰাৰ বাবে ইয়াৰ পূৰ্বে উৰিষ্যা উচ্চ ন্যায়ালয়ে প্ৰভু জগন্নাথ, বলৰাম আৰু সুভদ্ৰাৰ ৰথ হাতী বা মেচিনেৰে টনাৰ নিৰ্দেশ দিছিল।
কিন্তু বৃহস্পতিবাৰে উচ্চতম ন্যায়ালয়ৰ নিৰ্দেশত পুৰীৰ ৰথযাত্ৰা এইবছৰৰ বাবে বন্ধ কৰা হ’ল।
উচ্চতম ন্যায়ালয়ে কৰ’না অতিমাৰীৰ প্ৰতি লক্ষ্য ৰাখি জন সমাগম হ’বলৈ দিব নোৱাৰি বুলি মন্তব্য কৰে।
সাধাৰম নাগৰিকৰ স্বাস্থ্যৰ কথা মনত ৰাখি এই নিৰ্দেশ দিবলৈ বাধ্য হোৱা বুলিও মুখ্য ন্যায়াধীশগৰাকীয়ে জানিবলৈ দিয়ে।
উৰিষ্যা বিকাশ পৰিষদ নামৰ এটি স্বেচ্ছাসেৱী সংস্থাই আদালতত আবেদন জনাই কৈছিল যে ৰথযাত্ৰা উপলক্ষে চলা ১০-১২দিনীয়া উৎসৱত কমেও দহ লাখ মানুহৰ সমাগম হয় আৰু তাত কিদৰে সামাজিক দূৰত্ব বজাই ৰখা হ’ব সেই বিষয়ে প্ৰশ্ন তুলিছিল।
সংস্থাটোৰ আবেদনৰ ভিত্তিতে উচ্চতম ন্যায়ালয়ে এইবাৰ পুৰীৰ জগন্নাথৰ ৰথযাত্ৰা স্থগিত ৰখাৰ নিৰ্দেশ দিয়ে।
