২০২০ চনৰ দিল্লী হিংসাৰ ষড়যন্ত্ৰমূলক গোচৰত অভিযুক্ত ওমৰ খালিদ, শ্বাৰ্জিল ইমামসহ ছজনৰ জামিন আবেদনৰ শপতনামা দাখিল নকৰাৰ বাবে উচ্চতম ন্যায়ালয়ে সোমবাৰে দিল্লী আৰক্ষীক তীব্ৰ সমালোচনা কৰে। ন্যায়াধীশ অৰবিন্দ কুমাৰ আৰু ন্যায়াধীশ এন ভি আঞ্জৰিয়াৰ বিচাৰপীঠে আৰক্ষীৰ অতিৰিক্ত সময়ৰ দাবী অস্বীকাৰ কৰি শুনানী শুকুৰবাৰলৈ স্থগিত ৰাখে।
বিচাৰপীঠে আৰক্ষীক প্ৰশ্ন কৰে যে পাঁচ বছৰ পাৰ হৈ গ’ল, অভিযুক্তসকলে বিচাৰ অবিহনে কাৰাগাৰত বন্দী হৈ আছে, তথাপিও জামিন আবেদনৰ শপতনামা কিয় দাখিল কৰা নাছিল? “এই বিষয়ত আৰু বিলম্ব সহ্য কৰা নহয় বুলি মত প্ৰকাশ কৰে বিচাৰপীঠে।
উল্লেখ্য যে, ২০২০ চনৰ ফেব্ৰুৱাৰীত নাগৰিকত্ব সংশোধনী আইন বিৰোধী প্ৰতিবাদৰ সময়ত উত্তৰ-পূব দিল্লীত সংঘটিত হিংসাত ৫৩ জনৰ মৃত্যু হৈছিল আৰু বহুজন আহত হৈছিল। দিল্লী আৰক্ষীয়ে জে এন ইউৰ প্ৰাক্তন ছাত্ৰ ওমৰ খালিদ, শ্বাৰ্জিল ইমাম, গুলফিছা ফাতিমা, মিৰান হাইদৰ, শিফা উৰ ৰেহমান আৰু অন্যান্যক ষড়যন্ত্ৰৰ অভিযোগত গ্ৰেপ্তাৰ কৰে। তেওঁলোকৰ বিৰুদ্ধে বেআইনী কাৰ্যকলাপ প্ৰতিৰোধ আইন (ইউএপিএ)ৰ অধীনত গোচৰ ৰুজু কৰা হৈছিল।
দিল্লী উচ্চ ন্যায়ালয়ে ২ ছেপ্টেম্বৰত এই ছগৰাকী অভিযুক্তৰ জামিন নাকচ কৰিছিল। ইয়াৰ্ব পিছতে দিল্লী উচ্চ ন্যায়ালয়ৰ এই ৰায়ৰ বিৰুদ্ধে তেওঁলোকে উচ্চতম ন্যায়ালয়ত আবেদন জনাইছিল। ২২ ছেপ্টেম্বৰত উচ্চতম ন্যায়ালয়ে আৰক্ষীলৈ শপতনামা দাখিলৰ নিৰ্দেশ দি জাননি জাৰি কৰিছিল, কিন্তু এমাহতকৈ অধিক সময় পাৰ হৈ যোৱাৰ পিছটো কোনো সঁহাৰি নজনালে আৰক্ষীয়ে।
অভিযোক্তসকলক প্ৰতিনিধিত্ব কৰি জেষ্ঠ অধিবক্তা কপিল সিব্বল আৰু অভিষেক মণি সিংহৱীয়ে আৰক্ষীৰ এনে আচৰণৰ বিৰোধিতা কৰি কয় যে অভিযুক্তসকলে পাঁচ বছৰতকৈ অধিক কাৰাগাৰত আছে। ই বিচাৰ অবিহনে শাস্তি প্ৰদানৰ দৰে কথা বুলি উল্লেখ কৰে।
উল্লেখ্য যে পৰৱৰ্তী শুনানীৰ দিন ৩১ অক্টোবৰলৈ ধাৰ্য কৰা হৈছে। আদালতে আৰক্ষীক শপতনামা দাখিলৰ বাবে শেহতীয়াকৈ সময় দিয়ে যদিও, কিন্তু জামিন আবেদনৰ উত্তৰ দাখিলত বিলম্ব কৰাৰ বাবে তীব্ৰ অসন্তোষ প্ৰকাশ কৰিছে।
