দুটা দশক ধৰি বিচাৰাধীন হৈ থকা এটা গোচৰৰ তদন্তক লৈ গুজৰাট আৰক্ষীক তীব্ৰ ককৰ্থনা কৰিছে উচ্চতম ন্যায়ালয়ে। শীৰ্ষ আদালতে পৰ্যবেক্ষণ কৰে যে এজন নাগৰিকে এটা গোচৰৰ সমাধানৰ বাবে বিভিন্ন কাৰ্যালয়লৈ দৌৰিবলৈ বাধ্য হৈছে, তদন্তত অস্বাভাৱিক পলম হৈছে, সেয়া দেখিও সাংবিধানিক আদালতবোৰ নীৰৱ দৰ্শক হৈ থাকিব নোৱাৰে। উচ্চতম ন্যায়ালয়ে গুজৰাট আৰক্ষীক এই গোচৰৰ তদন্ত ছয় সপ্তাহৰ ভিতৰত সমাপ্ত কৰিবলৈ নিৰ্দেশ দিছে।
বিশ বছৰ পুৰণি জালিয়াতি আৰু প্ৰতাৰণা গোচৰৰ কথা উল্লেখ কৰি ন্যায়াধীশ সঞ্জয় কেৰোল আৰু ন্যায়াধীশ অগাস্টিন জৰ্জ মেছিয়ে কয় যে এই গোচৰত অভিযোগনামা দাখিল কৰাত অস্বাভাৱিক পলম হৈছে, যিটো অতি গুৰুতৰ।
এই গোচৰৰ প্ৰতিবেদন ২০১৪ চনত ন্যায়িক দণ্ডাধীশৰ আদালতত দাখিল কৰিছিল যদিও আদালতে সেই প্ৰতিবেদন গ্ৰহণ কৰিবলৈ অস্বীকাৰ কৰি পুনৰ তদন্ত কৰি ৬০ দিনৰ ভিতৰত প্ৰতিবেদন দাখিল কৰাৰ নিৰ্দেশ দিয়ে। কিন্তু সেই গোচৰত আৰু কোনো অগ্ৰগতি হোৱা নাই।
একেটা গোচৰতে পুনৰ ২০১৭ চনত গুজৰাট উচ্চ ন্যায়ালয়ে ছয় সপ্তাহৰ ভিতৰত তদন্তৰ প্ৰতিবেদন দাখিল কৰাৰ নিৰ্দেশ দিছিল। এই গোচৰৰ সৈতে জড়িত কিছু নথি-পত্ৰ আৰক্ষীৰ জিম্মাত থকা বুলিও জানিব পৰা গৈছে!
ইয়াৰ মাজতে অভিযোগকাৰীয়ে অভিযোগনামা দাখিল কৰিবলৈ অনুৰোধ জনাই কেইবাটাও কাৰ্যালয়লৈ তাঁত-বাতি কাৰি আহিছে যদিও কোনো ফল পোৱা নাই। তদন্তৰ সময়ত গোচৰৰ নথি-পত্ৰ হেৰাই যোৱাৰ ঘটনাকলৈও উচ্চতম ন্যায়ালয়ে উদ্বেগ প্ৰকাশ কৰিছে। উচ্চতম ন্যায়ালয়ৰ মতে, কিয় অস্বাভাৱিক পলম হৈছে বুলি প্ৰশ্ন উত্থাপন কৰি উচ্চ ন্যায়ালয়ে বিষয়টোত হস্তক্ষেপ কৰিব লাগিছিল।
