বিধানসভাত গৃহীত ১০খন বিধেয়ক ৰাজভৱনত পেলাই ৰখাৰ বাবে উচ্চতম ন্যায়ালয়ৰ ৰোষৰ সন্মুখীন হৈছে তামিলনাডুৰ ৰাজ্যপাল আৰ এন ৰবি। ৰাজ্যপালৰ এই কাৰ্যক “অবৈধ” আৰু “স্বেচ্ছাচাৰী” পদক্ষেপ বুলি তীব্ৰ সমালোচনা কৰে দেশৰ শীর্ষ আদালতখনে।
কেৱল সেয়াই নহয়, উচ্চতম ন্যায়ালয়ে কঠোৰভাৱে জনাই দিছে যে ৰাজ্যপালে ৰাজভৱনত এনেদৰে বিধেয়ক ব্লক কৰি ৰাখিব নোৱাৰে। মুঠৰ ওপৰত তামিলনাডুত ৰাজ্য চৰকাৰ আৰু ৰাজ্যপালৰ মাজত চলি থকা সংঘাতৰ বাবে উচ্চতম ন্যায়ালয়ত মুখ থেকেচা খালে ৰাজ্যপাল ৰবিয়ে।
অ-বিজেপি ৰাজ্যৰ ৰাজ্যপাল আৰু চৰকাৰৰ মাজত সংঘাত নতুন কথা নহয়। ৰাজ্যপাল আৰ এন ৰবিয়ে তামিলনাডুতো এই নীতি গ্ৰহণ কৰিছিল। অভিযোগ অনুসৰি বিধানসভাত গৃহীত হোৱাৰ পিছতে স্বাক্ষৰ নকৰাকৈয়ে ১০খন বিধেয়ক ৰখাই থৈছিল ৰাজ্যপালগৰাকীয়ে। এই তালিকাত বিশ্ববিদ্যালয়ৰ উপাচাৰ্য নিযুক্তি সন্দৰ্ভত এখন বিধেয়কও সন্নিবিষ্ট কৰা হৈছিল।
ৰাজ্যপালৰ অসহযোগৰ বিৰুদ্ধে তামিলনাডু চৰকাৰে উচ্চতম ন্যায়ালয়ৰ কাষ চাপিছিল। মঙলবাৰে গোচৰৰ শুনানিত ন্যায়াধীশ জে বি পাদ্ৰীৱাল আৰু আৰ মহাদেৱনৰ বিচাৰপীঠে স্পষ্ট কৰি দিয়ে যে ৰাজ্যপালে গৃহীত হোৱা বিধেয়ক পেলাই ৰাখিব নোৱাৰে।
এই গোচৰৰ শুনানিৰ সময়ত উচ্চতম ন্যায়ালয়ে সংবিধানৰ ২০০ নং অনুচ্ছেদৰ কথা উনুকিয়াই দি কয় যে, “ৰাজ্যপালগৰাকীয়ে মন্ত্ৰীসভাৰ সমৰ্থন আৰু পৰামৰ্শৰে কাম কৰাটো বাধ্যতামূলক।”
আদালতে লগতে কয় যে ৰাজ্যপালে বন্ধুৰ দৰে ৰাজ্য চৰকাৰক সহযোগিতা আৰু পথ প্ৰদৰ্শন কৰিব লাগিব। ৰাজনৈতিক মতাদৰ্শক একাষৰীয়া কৰি সাংবিধানিক শপতৰ দ্বাৰা পৰিচালিত কৰিব লাগিব। বাধা দিয়া নহয়, ৰাজ্যপাল ৰাজ্য চৰকাৰৰ অনুঘটক হ’ব।”
আদালতৰ মতে, ১০খন বিধেয়ক গৃহীত কৰি বিধানসভাৰ দ্বাৰা পুনৰ বিবেচনা কৰাৰ পিছত ৰাজ্যপালৰ ওচৰ পালে স্বাক্ষৰ নকৰাকৈ ৰাষ্ট্ৰপতিৰ অনুমোদনৰ বাবে ৰখাটো কেৱল অবৈধ নহয়, ই এক স্বেচ্ছাচাৰী পদক্ষেপ।
আদালতে কয় যে ১০খন বিল পুনৰ বিবেচনাৰ অন্তত ৰাজ্যপাললৈ প্ৰেৰণ কৰাৰ দিনৰ পৰা চূড়ান্ত বুলি গণ্য কৰা হ’ব। যিহেতু বিধেয়কখনত স্বাক্ষৰ কৰাৰ কোনো নিৰ্দিষ্ট সময়সীমা নাই, সেয়েহে যুক্তিসংগত সময়সীমাৰ ভিতৰত স্বাক্ষৰ কৰিব লাগে। নিৰ্দিষ্ট সময়ৰ ভিতৰত কাম সম্পূৰ্ণ কৰাৰ নিৰ্দেশ দিয়াৰ সম্পূৰ্ণ ক্ষমতা আদালতৰ আছে।
আদালতে কয় যে যদি ৰাজ্যপালসকলে বিধেয়কখন উত্থাপন হোৱাৰ পাছত ৰাষ্ট্ৰপতিলৈ প্ৰেৰণ কৰাৰ প্ৰয়োজনীয়তা অনুভৱ কৰে তেন্তে এমাহৰ ভিতৰত এই বিষয়ত সিদ্ধান্ত ল’ব লাগে। যদিহে বিধেয়কখন অনুমোদন দিয়া নহয়, তেন্তে তিনিমাহৰ ভিতৰত ৰাজ্যপালে বিষয়টোৰ ওপৰত সিদ্ধান্ত ল’ব লাগিব। কোনো বিধেয়ক এনেদৰে অনিৰ্দিষ্টকাললৈ পেলাই ৰাখিব নোৱাৰি বুলি জনাইছে উচ্চতম ন্যায়ালয়ে।
