আৰাৱলী পৰ্বতৰ সংজ্ঞা সলনিৰ সৈতে জড়িত গোচৰটোৰ পূৰ্বৰ ৰায়দান স্থগিত ৰাখিছে উচ্চতম ন্যায়ালয়ে। ২০ নৱেম্বৰৰ নিৰ্দেশ এতিয়াৰ বাবে কাৰ্যকৰী নহ’ব বুলি কোৱা হৈছে। উচ্চতম ন্যায়ালয়ে কয় যে এই গোচৰৰ পৰৱৰ্তী শুনানি অহা ২১ জানুৱাৰীত হ’ব।
মুখ্য ন্যায়াধীশ সূৰ্য কান্তৰ নেতৃত্বত গঠিত বিচাৰপীঠে য’ত য’ত যি যি জটিলতা আছে সেইবোৰ মীমাংসা কৰিবলৈ কেন্দ্ৰক নিৰ্দেশ দিছে। বিচাৰপীঠৰ আন দুজন সদস্য হৈছে ন্যায়াধীশ জে কে মহেশ্বৰী আৰু ন্যায়াধীশ এ জি মছিহ।
উচ্চতম ন্যায়ালয়ে কেন্দ্ৰৰ লগতে ৰাজস্থান, গুজৰাট, দিল্লী আৰু হাৰিয়ানা (এই চাৰিখন ৰাজ্যত আৰাৱলী পৰে) চৰকাৰলৈও জাননী প্ৰেৰণ কৰিছে। আদালতে তেওঁলোকক এই নিজাববীয়া (suo moto) গোচৰত তেওঁলোকৰ স্থিতি জনাবলৈ কৈছে।
মুখ্য ন্যায়াধীশগৰাকীয়ে কয় যে প্ৰতিবেদন বা যি ৰায়দান দিয়া হৈছে, সেইটোক লৈ কাম আৰম্ভ কৰাৰ পূৰ্বে স্বচ্ছ আৰু নিৰপেক্ষ প্ৰক্ৰিয়াৰ প্ৰয়োজন। যাৰ জৰিয়তে কেইবাটাও বিষয়ত স্পষ্ট নিৰ্দেশনা দিয়া হ’ব। উচ্চতম ন্যায়ালয়ে কয় যে পূৰ্বৰ পেনেলে আৰাৱলী সন্দৰ্ভত দিয়া প্ৰতিবেদন যদি কাৰ্যকৰী কৰা হয় তেন্তে পৰিৱেশৰ ওপৰত ইয়াৰ প্ৰভাৱৰ মূল্যায়নৰ বাবে বিশেষজ্ঞৰ এখন সমিতি গঠন কৰিব লাগিব। পূৰ্বৰ কমিটীৰ অধিকাংশ সদস্যই আছিল আমোলা।
আৰাৱলী অঞ্চল খনিজ পদাৰ্থৰে চহকী। সেই অঞ্চলত খনন কৰিব পাৰি। কিন্তু উচ্চতম ন্যায়ালয়ে এই পৰিকল্পনা বিশেষজ্ঞৰ দ্বাৰা প্ৰস্তুত কৰিব লাগিব বুলি কৈছে আৰু আদালতে অনুমোদন নকৰালৈকে সেই পৰিকল্পনাৰ কাম আৰম্ভ কৰিব নোৱাৰিব। কেৱল সেয়াই নহয়, চূড়ান্ত সিদ্ধান্তলৈ অহাৰ আগতে অংশীদাৰসকলৰ দৃষ্টিভংগী আৰু মতামত (যিসকল সেই অঞ্চলৰ যিকোনো কামৰ দ্বাৰা প্ৰত্যক্ষভাৱে প্ৰভাৱিত হ’ব পাৰে)ও ল’ব লাগিব বুলি আদালতে কয়।
যদিহে পাহাৰটো মাটিৰ পৰা ১০০ মিটাৰতকৈ বেছি ওখ নহয়, তেন্তে সেই পাহাৰটোক আৰু আৰৱলী পৰ্বতমালাৰ অংশ বুলি ধৰিব নোৱাৰি। ইয়াৰ পূৰ্বে কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰালয়ে দিয়া আৰাৱলীৰ এই সংজ্ঞাৰ ওপৰত উচ্চতম ন্যায়ালয়ে ছীলমোহৰ মাৰিছিল। ইয়াৰ পিছত দেশৰ বিভিন্ন প্ৰান্তৰ পৰা পৰিৱেশ কৰ্মীসকলে তীব্ৰ প্ৰতিবাদ সাব্যস্ত কৰে।
এই সংজ্ঞা কাৰ্যকৰী হ’লে সেই অঞ্চলৰ সামগ্ৰিক পৰিবেশৰ ওপৰত বিপুল প্ৰভাৱ পৰিব, আৰু সমগ্ৰ উত্তৰ ভাৰতৰ পৰিবেশৰো পৰিৱৰ্তন হ’ব বুলি দাবী কৰা হৈছিল। এই প্রতিবেদন কার্যকৰী হ’লে আৰাৱলীৰ অধিকাংশ অঞ্চল আৰু পাহাৰ বুলি গণ্য কৰা নহ’ব বুলি প্রতিবাদকাৰীসকলে দাবী জনাইছে৷ অনিয়ন্ত্ৰিত খননৰ কাম বৃদ্ধি হোৱাৰ লগতে অঞ্চলটোৰ সমগ্ৰ পৰিৱেশ তন্ত্ৰ ক্ষতিগ্ৰস্ত হ’ব।
কেৱল সেয়াই নহয়, বাধাহীন খনন কাৰ্য্যই দিল্লী আৰু ইয়াৰ আশে-পাশে থকা অঞ্চলৰ প্ৰদূষণ আৰু অধিক বৃদ্ধি কৰিব বুলি দাবী কৰা হৈছিল। যদিও চৰকাৰে সেই দাবী মানি ল’ব বিচৰা নাই, বাধাহীন খনন নহ’ব বুলি খোদ বনমন্ত্ৰীয়ে দাবী কৰিছিল। নতুন সংজ্ঞা অনুসৰি আৰৱালীৰ কোনো ক্ষতি নহ’ব।
এই উত্তেজনাৰ মাজতে উচ্চতম ন্যায়ালয়ে বিষয়টোত নিজাববীয়াকৈ (suo motu) হস্তক্ষেপ কৰে। সোমবাৰে দেশৰ শীর্ষ আদালতত শুনানি অনুষ্ঠিত হয়৷ উচ্চতম ন্যায়ালয়ে পূৰ্বৰ ৰায়দান স্থগিত ৰাখিছে।
