মধ্যপ্ৰদেশৰ উপ নিৰ্বাচনক কেন্দ্ৰ কৰি ক্ৰমশ বৃদ্ধি পাইছে ৰাজনৈতিক দলসমূহৰ উৎকণ্ঠা।
অহা ৩ নৱেম্বৰত ২৮ খন বিধানসভাৰ আসনৰ বাবে উপ নিৰ্বাচন অনুষ্ঠিত হ’ব মধ্যপ্ৰদেশত।
ক’ৰ’ণাকালীন অৱস্থাত সভা সমিতি অনু্ষ্ঠিত কৰি উপ নিৰ্বাচনৰ প্ৰচাৰৰ চলালে ৰাজ্যখনত ক’ৰ’ণাৰ প্ৰকোপ বৃদ্ধি পাব বুলি প্ৰকাশ কৰি নিৰ্বাচনী প্ৰচাৰত মধ্যপ্ৰদেশ উচ্চ ন্যায়ালয়ৰ গোৱালিয়ৰ বেঞ্চ-এ এক নিষেধাজ্ঞা জাৰি কৰিছিল।
সোমবাৰে দেশৰ সৰ্বোচ্চ ন্যায়ালয়েও এই নিষেধাজ্ঞাক বাহাল ৰাখি নিৰ্বাচন আয়োগক কঠোৰভাৱে ক’ৰ’ণা বিধি মানি চলিবলৈ নিৰ্দেশ দিছে।
উল্লেখ্য যে যোৱা ২০ অক্টোবৰত উপ নিৰ্বাচনৰ প্ৰচাৰৰ সংক্ৰান্তীয় এটা গোচৰৰ শুনানিৰ পিছত মধ্যপ্ৰদেশ উচ্চ ন্যায়ালয়ৰ গোৱালিয়ৰ বেঞ্চ-এ ভাৰ্চুৱেলি নিৰ্বাচনী প্ৰচাৰৰ কৰিবলৈ প্ৰাৰ্থীসকলক নিৰ্দেশ দিছিল।
ন্যায়ালয়ে স্পষ্টভাৱে নিৰ্দেশ প্ৰদান কৰি কৈছিল যে কোনো ৰাজনৈতিক দল আৰু প্ৰাৰ্থীয়ে ক’ৰ’ণা বিধি উলংঘা কৰি জনসভা আৰু জনসমাৱেশ অনুষ্ঠিত কৰিব নোৱাৰিব।
ইফালে যিবোৰ অঞ্চলত ভাৰ্চুৱেলি প্ৰচাৰ কৰা সম্ভৱ নহয় সেইবোৰ ঠাইত সীমিত সংখ্যক লোকৰ উপস্থিতিত সভাৰ আয়োজন কৰিলেও জিলা প্ৰশাসনৰ পৰা অনুমতি লোৱাৰ লগতে নিৰ্বাচন আয়োগৰো অনুমতি ল’ব লাগিব দল তথা প্ৰাৰ্থীয়ে।
সভাত কিমানজন লোক উপস্থিত থাকিব তাৰ হিচাপ জিলা প্ৰশাসনক আগতীয়াকৈ দিব লাগিব আৰু তাতকৈ এজনো অধিক লোক উপস্থিত থাকিব নোৱাৰিব। আৰু উপস্থিত থাকবিলগীয়া লোকৰ দ্বিগুণ মাস্ক আৰু চেনিটাইজাৰৰ প্ৰশাসনৰ হাতত আগতীয়াকৈ জমা দিব লাগিব প্ৰাৰ্থীয়ে।
গোৱালিয়ৰ বেঞ্চৰ এই ৰায়ৰ পিছতে আৰম্ভ হয় বিতৰ্কৰ। ৰাজ্যখনৰ ৰাজনৈতিক দলসমূহে এই ৰায়ৰ বিৰোধিতা কৰি সৰ্বোচ্চ ন্যায়ালয় আৰু নিৰ্বাচন আয়োগৰ দাৰস্থ হয়। আনকি বিজেপিৰ দুজন প্ৰাৰ্থীয়ে পৃথকে পৃথকে উচ্চতম ন্যায়ালয়ত এই ৰায়ৰ বিৰুদ্ধে আবেদনো কৰে।
আৰু আজি সোমবাৰে সৰ্বোচ্চ ন্যায়ালয়ে এই আবেদনৰ শুনানি গ্ৰহণ কৰি মধ্যপ্ৰদেশ উচ্চ ন্যায়ালয়ৰ গোৱালিয়ৰ বেঞ্চৰ পূৰ্বৰ ৰায়কে বাহাল ৰাখে।