NEET-SS-pattern: ছুপাৰ স্পেছিয়েলিটি পাঠ্যক্ৰমৰ বাবে নেশ্যনেল এলিজিবিলিটি এন্ট্ৰেন্স টেষ্ট (NEET) অহা ১৩ আৰু ১৪ নৱেম্বৰত অনুষ্ঠিত হ’ব। যোৱা ২৩ জুলাইত পৰীক্ষাৰ জাননী প্ৰকাশ পাইছে।
কিন্তু যোৱা ২৩ জুলাইতে হঠাতে নেশ্যনেল বোৰ্ড অৱ এক্সাম (NBE)য়ে পৰীক্ষাৰ ধৰণ (Pattern)ত কিছু সাল-সলনি ঘটোৱাৰ কথা জনাই দিয়ে।
ইয়াৰ পাছতে ৪১গৰাকী চিকিৎসকে এই নিৰ্দেশনাৰ বিৰুদ্ধে আদালতত প্ৰত্যাহ্বান জনায়।
উচ্চতম ন্যায়ালয়ৰ ন্যায়াধীশ ৱাই চন্দ্ৰচূড় আৰু ন্যায়াধীশ বি ভি নাগৰত্নৰ খণ্ড বিচাৰপীঠে যুৱ চিকিৎসকসকলৰ জীৱনক লৈ খেলা নকৰিবলৈ সকীয়াই দিছে।
সৰ্বোচ্চ আদালতখনে কয়, ‘’পৰীক্ষাৰ নটিফিকেশ্যন প্ৰকাশৰ পাছত পেটাৰ্ণ সলনিৰ কিয় ইমান প্ৰয়োজন আছিল? কিয়নো কেইজনমানৰ হাতত ক্ষমতা আছে। তেওঁলোকে ভাৱিছে যিকোনো উপায়ে সেয়া ব্যৱহাৰ কৰিব লাগিব। ক্ষমতাৰ এই খেলত যুৱ চিকিৎসকসকলক ফুটবলৰ দৰে ব্যৱহাৰ নকৰিব।‘’
উচ্চতম ন্যায়ালয়ৰ খণ্ড বিচাৰপীঠখনে গোটেই বিষয়টো বিবেচনা কৰি চাবলৈ কৈছে। চিকিৎসকসকলে অধ্যয়নৰ বাবে বহুদিন ব্যয় কৰিছে। ইপিনে পৰীক্ষাৰ বাবে মাত্ৰ আৰু দুমাহ বাকী আছে।
আৰু পঢ়ক: অসমত খিলঞ্জীয়াৰ প্ৰকৃত সংজ্ঞা নাই; বিজেপিৰ সংখ্যালঘু নেতা মমিনুল আৱালৰ বিস্ফোৰক মন্তব্য
ন্যায়াধীশ দুগৰাকীয়ে জনায় যে কৰ্তৃপক্ষই যিধৰণে কাম কৰিছে তাত তেওঁলোক সন্তষ্ট নহয়। কেইজনমান আমোলাৰ সন্মুখত এই চিকিৎসকসকলক পেলাই দিব নোৱাৰি।
ইপিনে, বোৰ্ডে দাবী কৰে যে পেটাৰ্ণ সলনিৰ বিষয়টো যে হুৰমূৰকৈ কৰা হৈছে সেয়া নহয়।
কিন্তু খণ্ড বিচাৰপীঠে জনাই দিছে যে পৰীক্ষাৰ পেটাৰ্ণ চাইয়েইতো অধ্যয়ন কৰা হয়। তেনেক্ষেত্ৰত যুৱ চিকিৎসকলক অনাহকতে উদ্বেগৰ মাজলৈ পঠিওৱা হৈছে। এই বৰ্ষতো হ’বলৈ দিয়ক, বাকী তাৰপাছত চিন্তা কৰিব।
