ভাৰতে পুনৰবাৰ অষ্ট্ৰেলিয়াৰ মাটিত ইতিহাসৰ সৃষ্টি কৰিলে। সূৰ্যকুমাৰ যাদৱৰ নেতৃত্বত ভাৰতীয় দলটোৱে পাঁচখন খেলৰ টি-২০ শৃংখলাত ২-১ ব্যৱধানত জয়লাভ কৰি ১৩ বছৰৰ অপৰাজিত অভিলেখ বজাই ৰাখিছে। শনিবাৰে ব্রিজবেনত অনুষ্ঠিত হোৱা অন্তিমখন খেল বৰষুণৰ বাবে পৰিত্যক্ত হ’লেও যদিও টিম ইণ্ডিয়াই শৃংখলাত জয়লাভ কৰে৷ কিন্তু ট্ৰফী লাভ কৰাৰ মুহূৰ্তত সূৰ্য্যকুমাৰে দিয়া এটা মন্তব্যই এছিয়া কাপৰ বিতৰ্কক পুনৰ আলোচনাৰ মাজলৈ আনিলে।
সাংবাদিকে সোধাত সূৰ্যকুমাৰ যাদৱে হাঁহি হাঁহি কয়, “ট্ৰফী হাতত লৈ সঁচাকৈয়ে ভাল লাগে। আচলতে জয়ৰ পিছত ট্ৰফীটো হাতত ধৰি ৰখাৰ অনুভৱটো বেলেগ। কিছুদিন আগতে আমাৰ মহিলা দলো বিশ্বকাপ জিকিছিল, সেই ট্ৰফীও দেশলৈ আহিছে। এইবাৰ এই ট্ৰফীটো চুই ভাল লাগিছে, অন্ততঃ এইবাৰ ট্ৰফীটো চুবলৈ সক্ষম হৈছো।”, বহুতেই ভাবিছে যে অধিনায়কৰ মন্তব্যত এটা কৌতুক লুকাই আছে, যিয়ে এছিয়া কাপৰ ট্ৰফী বিতৰ্কৰ ইংগিত দিয়ে।
উল্লেখ্য যে ২০২৫ চনৰ এছিয়া কাপ জয় কৰাৰ পিছতো ভাৰতীয় দলটোৱে ট্ৰফী লাভ কৰা নাছিল। সেই ট্ৰফী এতিয়াও ডুবাইৰ এছিয়ান ক্ৰিকেট কাউন্সিলৰ (এচিচি) কাৰ্যালয়ত আছে। পাকিস্তান ক্ৰিকেট ব’ৰ্ডৰ অধ্যক্ষ মহছিন নাকভিয়ে তেওঁৰ অনুমতি অবিহনে ট্ৰফী আঁতৰাব নোৱাৰিব বুলি নিৰ্দেশ দিয়া বুলি জানিব পৰা গৈছে। আনকি তেওঁ ভাৰতীয় দলে তেওঁৰ হাতৰ পৰা ট্ৰফী ল’বলৈ দাবী জনায়, যিটো অধিনায়ক সূৰ্যকুমাৰ যাদৱ আৰু টিম ইণ্ডিয়াই স্পষ্টভাৱে নাকচ কৰে।
পেহেলগামত পাকিস্তানী উগ্ৰপন্থীৰ আক্ৰমণত ২৬ জন ভাৰতীয়ৰ মৃত্যুৰ পিছৰে পৰা ভাৰত-পাকিস্তানৰ সম্পৰ্কত ফাট মেলিছে। কেইমাহমানৰ ভিতৰতে পাকিস্তানৰ সৈতে ভাৰতৰ ক্ৰিকেট খেলক লৈ যথেষ্ট সমালোচনাৰ সৃষ্টি হয়। লগতে পাকিস্তান ক্ৰিকেট দল বৰ্জনৰ আহ্বান। অৱশ্যে শেষত খেলপথাৰত মুখামুখি হ’ল ভাৰত আৰু পাকিস্তান। প্ৰতিবাৰেই জয়ী হৈছিল টিম ইণ্ডিয়াই।
এছিয়া কাপৰ ফাইনেলত পাকিস্তানক পৰাস্ত কৰে সূৰ্য্য বাহিনীয়ে। ক্ৰীড়া মহলে দাবী কৰিছে যে ভাৰতীয় দলটোৱে খেলৰ পিছত পেহেলগামত নিহতসকলক শ্ৰদ্ধা জনাই পাক ক্ৰিকেটাৰসকলৰ সৈতে হাত নিমিলালে আৰু পিচিবিৰ অধ্যক্ষৰ পৰা ট্ৰফী গ্ৰহণ কৰিবলৈ অস্বীকাৰ কৰিছিল।
ভাৰতীয় ক্ৰিকেট নিয়ন্ত্ৰণ ব’ৰ্ডৰ সচিব দেৱজিৎ শইকীয়াই কৈছে যে ট্ৰফী বিবাদ নিষ্পত্তিৰ বাবে দুয়োখন ব’ৰ্ডৰ মাজত ইতিমধ্যে আলোচনা আৰম্ভ হৈছে। শেহতীয়াকৈ আই চি চিৰ বৈঠকৰ সময়ত ভাৰত আৰু পাকিস্তানৰ প্ৰতিনিধিৰ মাজত এখন বৈঠক অনুষ্ঠিত হয়, যিটো এতিয়ালৈকে ইতিবাচক বুলি বিবেচিত হৈছে।
তেওঁৰ ভাষাত, “দুয়ো পক্ষই গঠনমূলক আলোচনাত অংশ লৈছে। আইচিচিৰ উপস্থিতিত আলোচনা আৰম্ভ হৈছে আৰু অনাগত দিনত যদি বিষয়টো ইতিবাচক দিশত আগবাঢ়ে তেন্তে সমস্যাটো অতি সোনকালে সমাধান হ’ব।”
