উত্তৰ প্ৰদেশৰ মুজাফ্ফনগৰ গৌড় মঠ আশ্ৰমৰ স্বয়ম্ভু ভগৱান স্বামী ভক্তিভূষণ মহাৰাজক নাবালকৰ ওপৰত যৌন উৎপীড়ন চলোৱাৰ অভিযোগত গ্ৰেপ্তাৰ কৰা হৈছে।
আশ্ৰমখনৰ পৰা যৌন উৎপীড়নৰ বলি হোৱা ১০ গৰাকীকৈ নাবালককো উদ্ধাৰ কৰিছে আৰক্ষীয়ে।
স্বামী ভক্তিভূষণ মহাৰাজে নাবালক কেইগৰাকীক জোৰকৈ আশ্ৰমখনত আৱদ্ধ কৰি যৌন উৎপীড়ন চলাই অহাৰ অভিযোগ উত্থাপন কৰা হৈছে।
স্থানীয় সূত্ৰৰ অনুসৰি দীৰ্ঘদিন ধৰি অসম, ত্ৰিপুৰা আৰু মিজোৰাম আদিৰ নাবালকক শিক্ষাদান কৰাৰ উদ্দেশ্যে আশ্ৰমখনত ভৰ্তি কৰোৱা হয়।
নাবালকসকলক আশ্ৰমখনত ভৰ্তি কৰোৱাৰ পিছতে স্বামী মহাৰাজে তেওঁলোকৰ ওপৰত অকথ্য যৌন নিৰ্যাতন চলাবলৈ আৰম্ভ কৰে। নাবালকসকলে বাধা প্ৰদান কৰিলে মাৰ-ধৰো কৰা হয় বুলি জনাইছে সূত্ৰটোৱে।
এই সমগ্ৰ দুষ্কাৰ্যৰ সন্দৰ্ভত অৱগত হোৱাৰ পিছত উত্তৰ প্ৰদেশৰ শিশু কল্যাণ বিভাগৰ বিষয়াৰ এটা দলে যোৱা মঙলবাৰে অভিযান চলায়।
অভিযানকালত দলটোৱে আশ্ৰমখনৰ পৰা ১০ গৰাকীৰো অধিক নাবালকক উদ্ধাৰ কৰে।
তেওঁলোকৰ বয়স ৭ বছৰ পৰা ১৬ বছৰৰ ভিতৰত বুলি জানিব পৰা গৈছে।
ইতিমধ্যে নাবালক কেইগৰাকীৰ স্বাস্থ্য পৰীক্ষা কৰোৱা হৈছে বুলি জানিবলৈ দিছে স্থানীয় প্ৰশাসনৰ বিষয়াই।
ইয়াৰ পিছতে আশ্ৰমখনৰ স্বয়ম্ভু ভগৱান স্বামী ভক্তিভূষণ মহাৰাজক আৰক্ষীয়ে গ্ৰেপ্তাৰ কৰি তেওঁৰ বিৰুদ্ধে শিশু নিৰ্যাতন আইনসহ ভাৰতীয় দণ্ডবিধিৰ বিভিন্ন ধাৰাত গোচৰ ৰুজু কৰিছে।
