ডিগবৈৰ অইল টাৰ্মিনেলত চলি থকা গুণ্ডাটেক্স সংগ্ৰহত শেহতীয়াকৈ অসম চৰকাৰে কৰা হস্তক্ষেপৰ ফলত জিলা প্ৰশাসনে গোলাই এছ’চিয়েশ্যনৰ গুণ্ডাৰাজ বন্ধ কৰিবলৈ বাধ্য হয়। ।
জিলা প্ৰশাসনে দেওবাৰৰ পৰা নিৰাপত্তাৰক্ষী মোতায়েন কৰিছে। ফলত টেংকাৰ চালক সকলে সুকলমে ল’ডিং কৰিব পাৰিছে।
উল্লেখযোগ্য যে অইল টাৰ্মিনেলত বিধায়ক সুৰেন ফুকনৰ পৃষ্ঠপোষকতাত চলি থকা গুণ্ডাৰাজত অতিষ্ঠ হৈ সমগ্ৰ উত্তৰ-পূবত অসম পেট্ৰ’লিয়াম মজদুৰ ইউনিয়নে ধৰ্মঘট কৰিছিল। আৰু ইয়াৰ ফলস্বৰূপে চৰকাৰে এই ছিণ্ডিকেট উৎখাত কৰিবলৈ বাধ্য হয়।
ইফালে মুখ্য মন্ত্ৰী সৰ্বানন্দ সোণোৱালে এই অইল টাৰ্মিনেলত চলি থকা ছিণ্ডিকেটৰ ক্ষেত্ৰত চি আই ডিৰ তদন্ত ঘোষণা কৰাত অসম পেট্ৰ’লিয়াম মজদুৰ ইউনিয়নে মুখ্য মন্ত্ৰী গৰাকীৰ এই পদক্ষেপক আদৰণি জনাইছে।
আনহাতে অসম পেট্ৰ’লিয়াম মজদুৰ ইউনিয়নৰ উজনি অসম শাখাৰ সভাপতি ৰঞ্জন চৌধুৰীয়ে মুখ্য মন্ত্ৰীয়ে ঘোষণা কৰা চি আই ডি তদন্তত যাতে কোনো কাৰণতে কোনো সাৰি যাব নোৱাৰে বুলি উল্লেখ কৰি ছিণ্ডিকেটৰাজ চলোৱা গোলাই এছ’চিয়েশ্যনক ৰক্ষণাবেক্ষণ দিয়া সকলো তদন্তৰ আওতাত সোমাব লাগিব বুলি কয়।
লগতে ডিগবৈ টাৰ্মিনেলৰ উপ-মহাপ্ৰবন্ধক টাব্ৰেজ আহমেদৰ উপৰি আন আন বিষয়া সকলকো তদন্তৰ আওতাত আনিলেহে তদন্ত প্ৰক্ৰিয়াটো সম্পূৰ্ণ হ’ব বুলি সভাপতি গৰাকীয়ে কয়।
তাৰোপৰি যোৱা ২৯ আগষ্ট আৰু ১ ছেপ্টেম্বৰৰ টাৰ্মিনেলৰ চি চি টি ভি কেমেৰাৰ সকলো ভিডিঅ’ ফুটেজ তদন্তৰ বাবে সংৰক্ষিত কৰি ৰাখিবৰ বাবেও চৌধুৰীয়ে আহ্বান জনায়।