মধ্য প্ৰদেশৰ গোৱালিয়ৰ অঞ্চলত অৱস্থিত দুটাকৈ বিশাল কাৰখানাত দিনে-নিশাই শ্বেম্পু, ডিটাৰজেণ্ট, ৰং আৰু বিভিন্ন ৰাসায়নিক মিহলি কৰি তৈয়াৰ কৰা হয় “গাখীৰ”।
কেইবা শ শ্ৰমিকে কাম কৰা বহু একৰ জুৰি বিস্তৃত এই কাৰখানাকেইটাই দৈনিক ২ লাখ লিটাৰ গাখীৰ উৎপাদন কৰে।
খাদ্য হিচাপে ভয়ানকভাৱে বিষাক্ত এই “গাখীৰ”এই নহয়, লগতে উৎপাদিত হয় চীজ আৰু পনীৰো।
কাৰখানাকেইটাৰ পৰা কেৱল মধ্য প্ৰদেশেই নহয়, দেশৰ আন বহুটো ৰাজ্যত গাখীৰ যোগান ধৰা হয়।
এই বিষাক্ত গাখীৰ আৰু দুগ্ধজাত সামগ্ৰীসমূহ দেশৰ ৰাজধানী নতুন দিল্লী, মহাৰাষ্ট্ৰ, হাৰিয়ানা, উত্তৰ প্ৰদেশ আৰু ৰাজস্থানত বিক্ৰী হোৱাটো এতিয়ালৈকে নিশ্চিত কৰা হৈছে।
অসম বা উত্তৰ-পূবৰ আন ৰাজ্যলৈ সেই গাখীৰ অহাটো এতিয়ালৈকে নিশ্চিত হোৱা নাই।
বাতৰি মতে, এই বিষাক্ত দুগ্ধজাত সামগ্ৰীসমূহ ব্ৰেণ্ডেদ বিপণিত বিক্ৰী কৰা হয়।
শুকুৰবাৰে আৰক্ষীয়ে কাৰখানাটোত তালাচী চলাই ৬২ গৰাকী লোকক গ্ৰেপ্তাৰ কৰাৰ পিছতে এই কথা পোহৰলৈ আহিছে।
আৰক্ষীৰ অভিযানৰ সময়ত জব্দ হোৱা সামগ্ৰী আৰু বাহনৰ সংখ্যা শুনিলে আপুনি কাৰখানাটোৰ উৎপাদনৰ পৰিমাণ অনুমান কৰিব পাৰিব।
জব্দ হৈছে গাখীৰ পৰিবহণৰ বাবে শাৰী পাতি থকা ২০খন টেংকাৰ আৰু ১১খন পিক আপ ভেন!
লগতে, বিষাক্ত ১০০০০ লিটাৰ গাখীৰ, ৫ কুইণ্টল খ’য়া আৰু ২ কুইণ্টল পনীৰ।
মৰেনা জিলাৰ অম্বা আৰু ভিন্দ জিলাৰ লাহৰত থকা কাৰখানা দুটাত বিশেষ অভিযানকাৰী গোটে অভিযান চলাইছিল।
আৰক্ষী অধীক্ষক ৰাজেশ ভাদৰিয়াই সংবাদ মাধ্যমত এইসমূহ তথ্য সদৰী কৰিছে।
খবৰ মতে, ৩০ শতাংশ বিশুদ্ধ গাখীৰৰ সৈতে বাকী ৰাসায়নিক সামগ্ৰীসমূহ যোগ দি এই বিষাক্ত গাখীৰ উৎপাদন কৰা হয়।
এই বিষাক্ত দুগ্ধজাত সামগ্ৰী উৎপাদনত ব্যৱহাৰ কৰিবলৈ মজুত ৰখা বৃহৎ পৰিমাণৰ ৰিফাইনদ অইল, গ্লুক’জ পাউদাৰ, পনীয়া ডিটাৰজেণ্ট, চেম্পু, বগা ৰং, maltodextrin powder, sodium thiosulfate আৰু অন্যান্য ৰাসায়নিক সামগ্ৰী অভিযানত জব্দ হৈছে বুলি আৰক্ষী বিষয়াগৰাকীয়ে জনায়।
বাতৰি মতে, এনে ১ লিটাৰ ভেজাল গাখীৰ উৎপাদন ব্যয় মাত্ৰ ৫টকা আৰু তাক লিটাৰত ৫০ টকা পৰ্য্যন্ত বিক্ৰী কৰা হয়।
