অহা দেওবাৰে পুনৰ সমুখ সমৰত নামিব ভাৰত-পাকিস্তান। অৱশ্যে এই যুঁজ ৰাজনৈতিক নহয়। ভাৰতীয় সেনাৰ সেনাধ্যক্ষ মনোজ পাণ্ডে আৰু পাকিস্তান সেনাৰ সেনা-প্ৰধান খামাৰ জাভেদ বাজৱাৰ মাজত নহয়, এইবাৰ প্ৰতিদ্বন্দিতা হ’ব ৰোহিত বাহিনী আৰু বাবৰ বাহিনীৰ মাজত।
যোৱা ১৬ অক্টোবৰৰ পৰা অষ্ট্ৰেলিয়াৰ মেলবৰ্ণত আৰম্ভ হৈছে টি-২০ বিশ্বকাপ। টি-২০ বিশ্বকাপ ২০২২ৰ প্ৰথম খন ভাৰত-পাকিস্তানৰ খেল অনুষ্ঠিত হ’ব অহা দেওবাৰে ১ বাজি ৩০ মিনিটত অষ্ট্ৰেলিয়াৰ খেল পথাৰত।
উল্লেখ্য যে ২০০৭ চনত হোৱা টি-২০ বিশ্বকাপত প্ৰথম আৰু অন্তিমবাৰৰ বাবে দলপতি মহেন্দ্ৰ সিং ধোনীৰ নেতৃত্বত ভাৰতীয় ক্ৰিকেট দলে জয় লাভ কৰিছিল।
এতিয়ালৈকে ভাৰতে ৭ খন টি-২০ বিশ্বকাপৰ মাত্ৰ এখনত হে জয় লাভ কৰাৰ বিপৰীতে ২০০৯,২০১০, ২০১২ আৰু ২০২১ চনত অনুষ্ঠিত হোৱা এই খেলত গ্ৰুপ পৰ্যায়তে বাহিৰ হৈছিল ভাৰতীয় ক্ৰিকেট দল।
এতিয়া অহা দেওবাৰৰ খেলখনৰ বাবে অধীৰ উৎকন্ঠাৰে ৰৈ আছে সমগ্ৰ দেশবাসীৰ লগতে বিশ্বৰ ক্ৰিকেট অনুৰাগীসকল। সকলোৰে মনত এতিয়া এটাই প্ৰশ্ন – ৰোহিত শৰ্মাৰ নেতৃত্বত যোৱা অভিজ্ঞ ভাৰতীয় ক্ৰিকেট দলটোৱে এইবাৰ টি-২০ বিশ্বকাপ আঁজুৰি আনিবলৈ সক্ষম হ’ব নে ?
