২৩৪খন আসন থকা তামিলনাডু বিধানসভা নিৰ্বাচনৰ এগজিট প’লৰ ফলাফলে ৰাজনীতিৰ পথাৰখনত এক নতুন চমক সৃষ্টি কৰিছে। এগজিট প’লৰ মতে, অভিনেতা বিজয়ৰ দল তামিলাগা ভেট্ৰি কাঝাগামে (টিভিকে) প্ৰথমবাৰৰ বাবে নিৰ্বাচনত অৱতীৰ্ণ হৈয়েই এক শক্তিশালী ফলাফল দেখুৱাবলৈ সক্ষম হ’ব। এই ভৱিষ্যদ্বাণীৰ পিছতেই এআইএডিএমকে দলে বিজয়ৰ দলৰ সৈতে আলোচনা কৰাৰ বাবে বিকল্পৰ সন্ধান কৰিছে বুলি বিশেষ সূত্ৰৰ পৰা জানিব পৰা গৈছে।
এক্সিছ মাই ইণ্ডিয়াৰ শেহতীয়া সমীক্ষা অনুসৰি, বিজয়ৰ দল টিভিকে-এ ৯৮খনৰ পৰা ১২০খন আসন লাভ কৰাৰ সম্ভাৱনা আছে। আনহাতে, ডি এম কে নেতৃত্বাধীন মিত্ৰজোঁটে ৯২খনৰ পৰা ১১০খন আসন আৰু এন ডি এ-এ ২২খনৰ পৰা ৩২খন আসন লাভ কৰিব পাৰে বুলি অনুমান কৰা হৈছে। ভোটৰ শতাংশৰ ফালৰ পৰাও টিভিকে-এ প্ৰায় ৩৫ শতাংশ ভোট লাভ কৰিব পাৰে, যিটো বৰ্তমানৰ শাসকীয় দলটোৰ প্ৰায় সমান। ইয়াৰ বিপৰীতে, এআইএডিএমকে নেতৃত্বাধীন মিত্ৰজোঁটে প্ৰায় ২৩ শতাংশ ভোট লাভ কৰাৰ প্ৰকল্প কৰা হৈছে।
এই সমীক্ষাত মুখ্যমন্ত্ৰী পদৰ বাবে জনসাধাৰণৰ পছন্দৰ বিষয়েও এক আকৰ্ষণীয় তথ্য পোহৰলৈ আহিছে। বৰ্তমানৰ মুখ্যমন্ত্ৰী এম কে ষ্টেলিনক ৩৫ শতাংশ লোকে পছন্দ কৰাৰ বিপৰীতে, ৩৭ শতাংশ সমৰ্থনৰ সৈতে বিজয় মুখ্যমন্ত্ৰী হিচাপে ৰাইজৰ আটাইতকৈ বেছি পছন্দৰ ব্যক্তি হৈ পৰিছে। বিশেষকৈ কনিষ্ঠ ভোটাৰসকলৰ মাজত বিজয়ৰ জনপ্ৰিয়তা অতি প্ৰবল। ১৮ৰ পৰা ১৯ বছৰ বয়সৰ প্ৰথমবাৰৰ ভোটাৰৰ ৬৮ শতাংশ, ২০ৰ পৰা ২৯ বছৰৰ ৫৯ শতাংশ আৰু ৩০ৰ পৰা ৩৯ বছৰৰ ৪৫ শতাংশ লোকে টিভিকে দলক সমৰ্থন কৰিছে। ছাত্ৰ-ছাত্ৰী, নিবনুৱা যুৱক-যুৱতী, অ’বিচি, অনুসূচিত জাতি, সংখ্যালঘু সম্প্ৰদায়ৰ লগতে গাঁও আৰু চহৰ সকলোতে বিজয়ৰ দলে জনপ্ৰিয়তা অৰ্জন কৰিছে।
ৰাজ্যখনৰ ভোটাৰসকলে পৰিৱৰ্তন বিচাৰিছে বুলি এগজিট প’লৰ পৰা স্পষ্ট হৈ পৰিছে। প্ৰায় ৩৫ শতাংশ ভোটাৰে পৰিৱৰ্তনৰ আশাতেই ভোট দিছে বুলি উল্লেখ কৰিছে, আৰু টিভিকে দলৰ সমৰ্থকসকলৰ মাজত এই হাৰ ৭৭ শতাংশলৈকে দেখা গৈছে। ২০২৬ চনৰ এই বিধানসভা নিৰ্বাচনত বিজয়ৰ দলৰ প্ৰকৃত ফলাফল কি হ’ব, সেয়া অহা ৪ মে’ৰ ভোট গণনাৰ দিনাহে নিশ্চিতভাৱে জানিব পৰা যাব। অৱশ্যে এইখিনিতে উল্লেখ কৰা প্ৰয়োজন যে, এগজিট প’ল হৈছে ভোটদানৰ পিছত ভোটাৰৰ মতামতৰ ওপৰত ভিত্তি কৰি কৰা এক সমীক্ষাহে, যাৰ জৰিয়তে ৰাইজৰ মেজাজ বুজাৰ চেষ্টা কৰা হয়, আৰু ইয়াৰ ভৱিষ্যদ্বাণী কেতিয়াবা ভুলো হ’ব পাৰে।
