কেন্দ্ৰীয় চৰকাৰৰ প্ৰস্তাৱিত ‘বিকশিত ভাৰত গেৰাণ্টী‘ (ভিবি-জিআৰএএমজি) আঁচনিৰ নতুন গাঁথনিৰ তীব্ৰ বিৰোধিতা কৰিছে তামিলনাডুৰ মুখ্যমন্ত্ৰী চি যোচেফ বিজয়ে। বুধবাৰে প্ৰধানমন্ত্ৰী নৰেন্দ্ৰ মোদীলৈ এখন পত্ৰ প্ৰেৰণ কৰি মুখ্যমন্ত্ৰীগৰাকীয়ে দাবী কৰে যে এই নতুন ব্যৱস্থাই ৰাজ্যখনৰ ওপৰত ৫,০০০ কোটি টকাৰ অতিৰিক্ত আৰ্থিক বোজা জাপি দিয়াৰ লগতে আঁচনিখন ৰূপায়ণৰ ক্ষেত্ৰত একাধিক প্ৰত্যাহ্বানৰ সৃষ্টি কৰিব। তেওঁ সতৰ্ক কৰি দিয়ে যে ২০২৫ চনৰ আইনখনৰ নিৰ্দিষ্ট বিধানসমূহত প্ৰয়োজনীয় শিথিলতা আৰু পৰিৱৰ্তন নানিলে গ্ৰাম্য নিয়োগ কাৰ্যসূচীৰ ওপৰত নিৰ্ভৰশীল গ্ৰাম্যাঞ্চলৰ জনসাধাৰণ বেয়াকৈ ক্ষতিগ্ৰস্ত হ‘ব আৰু আঁচনিখন সুচাৰুৰূপে ৰূপায়ণ কৰাত বাধাৰ সৃষ্টি হ‘ব।
প্ৰধানমন্ত্ৰীলৈ প্ৰেৰণ কৰা পত্ৰখনত পুঁজিৰ আবণ্টন ব্যৱস্থা সন্দৰ্ভত মুখ্যমন্ত্ৰী বিজয়ে উল্লেখ কৰে যে বৰ্তমানৰ নিৰ্দেশনা অনুসৰি শ্ৰমিকৰ মজুৰি, সামগ্ৰী আৰু প্ৰশাসনিক দিশত কেন্দ্ৰ আৰু ৰাজ্যৰ মাজত পুঁজিৰ অনুপাত ৬০:৪০ নিৰ্ধাৰণ কৰা হৈছে। যোৱা দুটা দশক ধৰি এমজিএনআৰইজিএছ এক সুকীয়া গাঁথনিৰ অধীনত পৰিচালিত হৈ আহিছিল। এতিয়া হঠাতে কৰা এই পৰিৱৰ্তনে ৰাজ্যৰ ৰাজকোষৰ ওপৰত বহন কৰিব নোৱাৰা চাপৰ সৃষ্টি কৰিব বুলি তেওঁ উল্লেখ কৰে। ইয়াৰ ফলত উপলব্ধ কৰ্মদিনৰ সংখ্যা হ্ৰাস পাব পাৰে বা আন অত্যাৱশ্যকীয় কল্যাণমূলক আঁচনিসমূহৰ পুঁজিৰ অভাৱ ঘটিব পাৰে বুলি মুখ্যমন্ত্ৰীগৰাকীয়ে আশংকা প্ৰকাশ কৰে।
এই পৰিস্থিতিৰ প্ৰতি লক্ষ্য ৰাখি মুখ্যমন্ত্ৰীগৰাকীয়ে কেন্দ্ৰীয় চৰকাৰক শ্ৰমিকৰ মজুৰি আৰু প্ৰশাসনিক ব্যয়ৰ এশ শতাংশ পুঁজি বহন কৰিবলৈ আহ্বান জনাইছে। লগতে সামগ্ৰীৰ ব্যয়ৰ ক্ষেত্ৰত কেন্দ্ৰ আৰু ৰাজ্যৰ অংশীদাৰিত্ব ৭৫:২৫ অনুপাতত নিৰ্ধাৰণ কৰিবলৈ তেওঁ অনুৰোধ কৰে। আনহাতে, গাওঁ পঞ্চায়তসমূহৰ শ্ৰেণীবিভাজন আৰু ৰাজ্যৰ ভিতৰত পুঁজিৰ আবণ্টনৰ বাবে প্ৰস্তাৱিত কেন্দ্ৰীকৃত পদ্ধতিয়ে একপ্ৰকাৰৰ ‘সূক্ষ্ম পৰিচালনা’ৰ বাট মুকলি কৰিব বুলি তেওঁ ক্ষোভ প্ৰকাশ কৰে। তেওঁৰ মতে, সমগ্ৰ দেশৰ বাবে প্ৰযোজ্য হোৱাকৈ প্ৰস্তুত কৰা এনে উমৈহতীয়া পদ্ধতিয়ে আঞ্চলিক আৰ্থ-সামাজিক বৈচিত্ৰ্যক আওকাণ কৰে আৰু তৃণমূল পৰ্যায়ত পুঁজিৰ অসমান বিতৰণৰ আশংকা বৃদ্ধি কৰে। সেয়েহে স্থানীয় প্ৰয়োজনীয়তাৰ ভিত্তিত ৰাজ্যসমূহক নিজা পদ্ধতি যুগুত কৰাৰ বাবে অধিক স্বাধীনতা প্ৰদান কৰিবলৈ তেওঁ দাবী জনায়।
আঁচনিখনৰ নামকৰণৰ সন্দৰ্ভতো তামিলনাডুৰ মুখ্যমন্ত্ৰীগৰাকীয়ে গুৰুত্বপূৰ্ণ মত প্ৰকাশ কৰে। মহাত্মা গান্ধীৰ প্ৰতি সন্মান জনাই আৰু আঁচনিখনৰ মূল আদৰ্শৰ সৈতে সংগতি ৰাখি জনসাধাৰণৰ সদিচ্ছা বজাই ৰখাৰ উদ্দেশ্যে পূৰ্বৰ দৰেই আঁচনিখন মহাত্মা গান্ধীৰ নামত অব্যাহত ৰাখিবলৈও তেওঁ অনুৰোধ কৰিছে। ইয়াৰ উপৰিও, কৃষিৰ ভৰপক বতৰৰ অধিসূচনা সন্দৰ্ভত মুখ্যমন্ত্ৰী বিজয়ে কয় যে নতুন আইন অনুসৰি প্ৰতিটো বিত্তীয় বৰ্ষত শস্য সিঁচা আৰু চপোৱাৰ সময়ক সামৰি ৬০ দিনৰ বাবে আঁচনিৰ কাম স্থগিত ৰখাৰ নিয়ম কৰা হৈছে। কিন্তু ‘এল নিনো‘ৰ দৰে অপ্ৰত্যাশিত জলবায়ু পৰিৱৰ্তনে সঘনাই কৃষিৰ সময়সূচী সলনি কৰে, যাৰ ফলত অপ্ৰত্যাশিতভাৱে শ্ৰমিকৰ চাহিদা বৃদ্ধি পায়। সেয়েহে পূৰ্বনিৰ্ধাৰিত বন্ধৰ সময়তো জীৱিকাৰ সুৰক্ষাৰ বাবে নিয়োগৰ জৰুৰী প্ৰয়োজন হ‘ব পাৰে বুলি তেওঁ আঙুলিয়াই দিয়ে।
তামিলনাডুৱে গ্ৰাম্য নিয়োগ নিশ্চিতকৰণ আঁচনি ৰূপায়ণৰ ক্ষেত্ৰত সমগ্ৰ দেশৰ ভিতৰতে ধাৰাবাহিকভাৱে আগৰণুৱা ভূমিকা পালন কৰি আহিছে বুলি উল্লেখ কৰি মুখ্যমন্ত্ৰীগৰাকীয়ে কয় যে প্ৰস্তাৱিত সালসলনিসমূহ গ্ৰহণ কৰিলে আঁচনিখন অধিক সুদূৰপ্ৰসাৰী দৃষ্টিভংগীৰে কাৰ্যকৰী কৰিব পৰা যাব। গ্ৰাম্য সৱলীকৰণৰ ওপৰত অধিক গুৰুত্ব আৰোপ কৰি স্থানীয় পৰ্যায়ত ইয়াৰ সৰ্বোচ্চ প্ৰভাৱ নিশ্চিত কৰাৰ স্বাৰ্থত প্ৰধানমন্ত্ৰীয়ে তেওঁৰ প্ৰস্তাৱসমূহ সহানুভূতিৰে বিবেচনা কৰিব বুলি মুখ্যমন্ত্ৰী চি যোচেফ বিজয়ে পত্ৰখনৰ শেষত আশা প্ৰকাশ কৰে। বৰ্তমান এই প্ৰস্তাৱসমূহক লৈ কেন্দ্ৰীয় চৰকাৰ কিম্বা প্ৰধানমন্ত্ৰীৰ কাৰ্যালয়ৰ পৰা কোনো আনুষ্ঠানিক প্ৰতিক্ৰিয়া প্ৰকাশ কৰা হোৱা নাই।
