ৰূপালী পৰ্দাত জনপ্ৰিয়তাৰ শীৰ্ষত থাকিলেও ৰাজনীতিৰ পথাৰত চমক দেখুওৱাত ব্যৰ্থ হ’ল দক্ষিণৰ ছবি জগতৰ ছুপাৰষ্টাৰ কামাল হাছান।
তামিলনাডু বিধানসভাৰ নিৰ্বাচনত কোইম্বাটুৰ সমষ্টিৰ পৰা তীব্ৰ প্ৰতিদ্বন্দ্বিতা আগবঢ়াইও অৱশেষত জয়ৰ পৰা বঞ্চিত হ’ল কামাল হাছান।
বিজেপিৰ ভানাথি শ্ৰীনিবাসনৰ হাতত মাত্ৰ ১৫৪০টা ভোটত পৰাজিত হয় ছুপাৰষ্টাৰ গৰাকী।
দেওবাৰে অসমকে ধৰি পাঁচখন ৰাজ্যৰ বিধানসভাৰ নিৰ্বাচনী ফলাফল ঘোষণা কৰা হয়। তামিলনাডুত এআইএডিএমকে-বিজেপি মিত্ৰজোঁটক পৰাজিত কৰি এম কে ষ্টেলিন নেতৃত্বাধীন ডিএমকে ক্ষমতালৈ আহে।
নিৰ্বাচনত কামাল হাছানে নিজেই দল গঠন কৰি প্ৰতিদ্বন্দ্বিতা আগবঢ়ায়। কিন্তু দলটোৱে নিৰ্বাচনত কোনো প্ৰভাৱ পেলাব নোৱাৰিলে আৰু এখন আসনতো জয়ী হ’ব নোৱাৰিলে। কামাল হাছানে নিজেও বিজেপি প্ৰাৰ্থীগৰাকীৰ হাতত পৰাজিত হয়।
কামাল হাছানে টুইট কৰি বিজয়ৰ বাবে ডিএমকে নেতা ষ্টেলিনক শুভেচ্ছা জনায়।
তামিলনাডু বিধানসভাৰ ২৩৪ আসনৰ ভিতৰত ১৫৪খন আসনত প্ৰতিদ্বন্দ্বিতা আগবঢ়াইছিল কামাল হাছানৰ দল মাক্কাম নিধি মাইয়ামে। তদুপৰি, বাকী ৮০খন আসনত দুটা বন্ধুত্বপূৰ্ণ দল অল ইণ্ডিয়া সমথুবা মাক্কাল কাটছি আৰু ইণ্ডিয়া জননায়গ কাটছি’ক সমৰ্থন জনাইছিল।
কামাল হাছানৰ দলে নিৰ্বাচনত এখনো আসনত জয়লাভ কৰিব নোৱাৰিলে।