তামুলপুৰ আৰক্ষীয়ে আজি এক অভিযান চলাই গুৱাহাটীৰ পৰা চুৰি হোৱা এ এছ ১৪-এফ চি-৭৬৪৪ নম্বৰৰ এখন টাটা চুম’ গাড়ী উদ্ধাৰ কৰিবলৈ সক্ষম হয়। তামুলপুৰ মহকুমা সদৰৰ চাৰংবাৰীত চলোৱা উক্ত অভিযানত চুৰি গাড়ীখনৰ সৈতে আৰক্ষীয়ে চুৰিকাণ্ডত জড়িত দুগৰাকী যুৱককো আটক কৰে।
আটকাধীন যুৱকদুজনক গুৱাহাটী লাল গণেশৰ অজিত বসুমতাৰীৰ সন্তান ৰাহুল বসুমতাৰী আৰু ধীৰাজ চৌধুৰীৰ পুত্ৰ অজয় চৌধুৰী বুলি আৰক্ষীয়ে জানিবলৈ দিয়ে। তেওঁলোকৰ পৰা আৰক্ষীয়ে চুৰি কাৰ্যত ব্যৱহৃত এ এছ ০১-জে চি-৪০৫৪ নম্বৰৰ এখন চুইফট ডিজায়াৰ গাড়ী জব্দ কৰে।
তামুলপুৰ থানাৰ ভাৰপ্ৰাপ্ত আৰক্ষী পৰিদৰ্শক অসীম বৰাই জনোৱা মতে এক গোপন সূত্ৰৰ জৰিয়তে গুৱাহাটীৰ পৰা চুৰি হোৱা টাটা চুম’ গাড়ীখন তামুলপুৰৰ ফালে আনি থকাৰ সম্ভেদ লাভ কৰি তেওঁ গান্ধীবাৰী আৰক্ষী চকীৰ ভাৰপ্ৰাপ্ত বিষয়া ৰাজেন বড়োৰ সহযোগত তামুলপুৰ মহকুমা সদৰৰ মাজমাজিয়াৰ চাৰংবাৰীত অভিযান চলায়।
টাটা চুম’ গাড়ীখন তামুলপুৰৰ এটি গেৰেজলৈ আনি গাড়ীখনৰ চকা আৰু নম্বৰ প্লেট সলনি কৰি থকা সময়তেই আৰক্ষীয়ে দুই চোৰসহ গাড়ীখন জব্দ কৰিবলৈ সক্ষম হয়।
অৱশ্যে সুযোগ বুজি গাড়ীখনৰ পৰা দুজন চোৰ পলাই যাবলৈ সক্ষম হয়। ধৃত চোৰ দুজনৰ পৰা আৰক্ষীয়ে এছ বি আইৰ ৭খন বেংক পাছবুক, এখন কানাড়া বেংকৰ পাছবুক, কানাড়া বেংকৰ এখন ৩০ হাজাৰ টকাৰ চেক, এছ বি আইৰ ৪ লাখ ৮০ হাজাৰ টকাৰ এখন চেক, বিজয়া বেংকৰ এক লাখ টকাৰ চেক এখন, আনোৱাৰ হুছেইন নামৰ এজন লোকৰ পাছপ’ৰ্ট, হেলেনা বেগম নামৰ এগৰাকী মহিলাৰ পান কাৰ্ড আৰু ৩টা মোবাইল হেণ্ডছেটকে ধৰি বহু আপত্তিজনক নথি-পত্ৰ উদ্ধাৰ কৰে।
আটাকাধীন দুই যুৱকক অধিক তথ্য বাবে সম্প্ৰতি তামুলপুৰ আৰক্ষীয়ে মাৰথন জেৰা অব্যাহত ৰাখিছে।