আফ্ৰিকান ৰাষ্ট্ৰ তাঞ্জানিয়াত আজি সংঘটিত হোৱা ভয়াৱহ বিমান দুৰ্ঘটনাত নিহতৰ সংখ্যা ১৯ গৰাকীলৈ বৃদ্ধি পাইছে। দেশখনৰ প্ৰধানমন্ত্ৰী কাছিম মাজালিৱাই এক বিবৃতি যোগে এই শোকাৱহ দুৰ্ঘটনাৰ হানি-বিঘিনিৰ বিষয়ে সদৰী কৰিছে।
উল্লেখ্য যে ৪৩ জন যাত্ৰী কঢ়িয়াই অনা বিমানখন আজি উত্তৰ-পশ্চিম চহৰ বুকোবাৰ ওচৰ চপাৰ সময়তে তাঞ্জানিয়াৰ ভিক্টোৰিয়া হ্ৰদত ডুব গৈছিল।
সূত্ৰ অনুসৰি বেয়া বতৰৰ বাবেই এই ভয়াৱহ দুৰ্ঘটনাটো সংঘটিত হৈছিল।
স্থানীয় কাগেৰা প্ৰাদেশিক আৰক্ষী কমাণ্ডাৰ উইলিয়াম মৱাম্পাঘালেই সংবাদ মাধ্যমৰ আগত উল্লেখ কৰা অনুসৰি বৰ্তমানো ঘটনাস্থলীত উদ্ধাৰ অভিযান চলাই থকা হৈছে।
মৃত লোকসকলৰ লগতে দুৰ্ঘটনাত পতিত বিমানখনত থকা আটাইগৰাকী লোককে ইতিমধ্যে উদ্ধাৰ কৰা হৈছে আৰু দুৰ্ঘটনাগ্ৰস্ত বিমানখন পানীৰ পৰা উলিয়াই অনা হৈছে বুলি তেওঁ লগতে উল্লেখ কৰে।
উদ্ধাৰ হোৱা আহত লোকসকলক স্থানীয় চিকিৎসালয়ত ভৰ্তি কৰা হৈছে বুলি বিষয়াগৰাকীয়ে লগতে কয়।
