আলফা (স্বাধীন)ৰ বিৰুদ্ধে কঠোৰ ব্যৱস্থাৰ বিপৰীতে এন এচ চি এন-কেৰ বিদ্ৰোহীৰ বাবে ভাৰতৰ নাগালেণ্ডত থকাৰ দৰে দেজিগনে’তেদ কেম্প মুকলিৰ পৰিকল্পনা কৰিছে বাৰ্মিজ আৰ্মি (স্থানীয়ভাৱে তাতমাদাও)এ।
বাৰ্মিজ আৰ্মিৰ বিষয়াই স্থানীয় সাংবাদিকক জনোৱা মতে উত্তৰ-পূব ভাৰতৰ বিদ্ৰোহীসকল যিহেতু ম্যানমাৰৰ নহয় আৰু তেওঁলোকে অবৈধভাৱে দেশখনত বাস কৰি আছে, গতিকে তেওঁলোকক বলপূৰ্বক উচ্ছেদ কৰিবলৈ তাতামাদাও বদ্ধপৰিকৰ।
লগতে পঢ়ক– বাৰ্মিজ আৰ্মিৰ দখলত এন এচ চি এন-কেৰ মুখ্য কাৰ্য্যালয়
তা গা বে’ছৰ সমীপতে থকা আলফা (স্বাঃ) শিবিৰত তাতমাদাও-এ কৰা আক্ৰমণত এজন গেৰিলা নিহত হোৱাৰ লগতে কেইবাজনো আহত হৈছিল।
নাগা স্বায়ত্তশাসিত এলেকাৰ সূত্ৰ অনুসৰি তা গাত তাতমাদাও-এ অভিযান অব্যাহত ৰখাৰ ফলত আলফা (স্বাঃ)কে ধৰি উত্তৰ-পূবৰ আন বিদ্ৰোহীসকলে পলায়নৰ চেষ্টা কৰিছে।
তাতমাদাও-ৰ শীৰ্ষ বিষয়াৰ মতে তা গাস্থিত এন এচ চি এন-কেৰ মূল ঘাটিৰ লগতে সংগঠনটোৰ অন্যান্য শিবিৰসমূহৰ শীঘ্ৰে অৱসান ঘটোৱা হ’ব আৰু সশস্ত্ৰ বিদ্ৰোহীসকলক ৰখাৰ বাবে দেজিগনে’তেদ কেম্পৰ ব্যৱস্থা কৰা হ’ব।
লগতে পঢ়ক– এন এচ চি এন-কে মুখ্যালয় দখলৰ পিছত ম্যানমাৰত কেনে আছে আলফা (স্বাঃ)?
খবৰ মতে তাতমাদাও-এ কেম্পসমূহত প্ৰি ফেব্ৰিকে’তেদ হাওজিং মে’তেৰিএল ব্যৱহাৰ কৰিব।
বিনাযুদ্ধে মুখ্য কাৰ্য্যালয় দখলৰ পিছত তাতমাদাও-এ বৰ্তমান খাপলাং গোটৰ শক্তি আৰু অস্ত্ৰ সামৰ্থ্যৰ বুজ লৈ আছে। বিদ্ৰোহীসকলে অস্ত্ৰ সমৰ্পণ নকৰে কিন্তু ইয়াৰ সম্পূৰ্ণ তথ্য তেওঁলোকে আৰ্মিক দাখিল কৰিব লাগিব।
ভাৰতৰ সৈতে ২০১৫ চনতে যুদ্ধবিৰতি ভংগ কৰা সত্ত্বেও ম্যানমাৰ চৰকাৰৰ সৈতে ২০১২ চনৰ পৰা থকা চুক্তি মানি চলিছিল এন এচ চি এন-কেই।
চুক্তিৰ স্বাৰ্থতে তা গা বে’ছলৈ আগ বাঢ়ি অহা তাতমাদাও-ৰ সৈতে মুখামুখি হোৱাৰ পৰা বিৰত থকা বুলি খাপলাঙৰ শীৰ্ষ নেতৃত্বই মন্তব্য কৰিছিল।
তা গাৰ ভিতৰুৱা অঞ্চলসমূহত অভিযান চলোৱাৰ বাবে শীতকালেই উপযুক্ত সময়।
ভাৰতবিৰোধী কাৰ্য্যকলাপৰ বাবে ম্যানমাৰ ভূমি ব্যৱহাৰ কৰিবলৈ দিয়া নহ’ব বুলি তাতমাদাও-ৰ কমাণ্ডাৰসকলে ইতিমধ্যেই ভাৰতীয় সেনা বিষয়াক প্ৰতিশ্ৰুতি দিছে।
ৰাষ্ট্ৰসংঘৰ শান্তিৰক্ষী বাহিনী আৰু অন্যান্য কম্বেত আৰু নন-কম্বেত ভূমিকাত ভাৰতে বাৰ্মিজ বিষয়াসকলক প্ৰশিক্ষণ দিবলৈ লোৱাৰ পৰা দুয়ো দেশৰ মাজত সহযোগিতামূলক মিলিটেৰি সম্পৰ্ক বৃদ্ধি পাইছে।
