তৎকাল যা-যোগাৰে “অন্ধকাৰ” কৰিলে হস্তীৰ গুজৰাট গমন

গুজৰাটলৈ প্ৰচণ্ড গ্ৰীষ্ম প্ৰৱাহৰ মাজত চাৰিটা হাতী পৰিবহণৰ পৰিকল্পনা স্থগিত ৰাখিবলৈ অসমৰ বন বিভাগে লোৱা সিদ্ধান্তত বন্যপ্ৰাণী অধিকাৰ কৰ্মীসকলক উৎফুল্লিত হৈ পৰিছে।

কিন্তু, আহমেদাবাদৰ জগন্নাথ মন্দিৰলৈ হাতী চাৰিটা পৰিবহণৰ প্ৰাৰম্ভিক সিদ্ধান্তটো উঠাই ল’বলৈ অসমৰ মুখ্য বন্যপ্ৰাণী ৱাৰ্দেন ৰঞ্জনা গুপ্তাক ইমান সময় লাগিল কিয়?

অপ্ৰাপ্তবয়স্ক হাতী চাৰিটাৰ পৰিবহণ প্ৰক্ৰিয়াটো খৰধৰ কৰিবলৈ অসমৰ বন বিভাগৰ ওপৰত কোনো ধৰণৰ এক “চাপ” আছিল নেকি?

গুজৰাটলৈ হাতী চাৰিটাৰ পৰিবহণত অসমৰ বন বিভাগে স্পষ্টকৈ অনুমতি প্ৰদান কৰিছিল।

জয়তাৰা নামৰ হাতীজনীৰ বাবে গুজৰাটৰ বন বিভাগে আপত্তিহীনতাৰ প্ৰমাণ পত্ৰ (Letter no. WLP/26/B/1020/2019-20, dated 12/06/2019) দিয়াৰ দিনাই অসমৰ বন বিভাগেও পৰিবহণৰ অনুমতি (Office order no. 396) প্ৰদান কৰিছিল।

একেদৰে, বাবুলাল নামৰ অপ্ৰাপ্তবয়স্ক মতা হাতীটোক গুজৰাট বন বিভাগে আপত্তিহীনতাৰ প্ৰমাণ পত্ৰ প্ৰদান কৰিছিল ১২ জুনত, আৰু একেদিনাই অসমৰ বন বিভাগে পৰিবহণৰ অনুমতি (Office order no. 397) প্ৰদান কৰিছিল।

আন দুটা হাতী— ৰূপসিং আৰু ৰাণীৰ কাহিনী আৰু আকৰ্ষণীয়। দুয়োটা হাতীয়েই বন্দী অৱস্থাত জন্ম হোৱা নহয় আৰু বনৰ পৰা ধৰা বুলি সন্দেহ কৰা হৈছে।

ৰূপসিঙৰ ক্ষেত্ৰত গুজৰাটৰ পৰা আপত্তিহীনতাৰ প্ৰমাণ পত্ৰ আহিছিল ১৩ জুনত, আৰু অসমৰ বন বিভাগে পৰিবহণৰ অনুমতি (Office order no. 401) সেইদিনাই প্ৰদান কৰিছিল। ৰূপসিঙক ১৩ জুনৰ দিনাই মাইক্ৰ’চিপ লগোৱা হৈছিল বুলি নিৰ্দেশটোত উল্লেখ আছিল।

ৰূপসিঙৰ বাওঁফালৰ আগঠেঙত উপশম নোহোৱা গুলীৰ আঘাত থকাৰ কথা অসমৰ বন বিভাগে জনা নাছিল নেকি?

ৰাণী নামৰ চতুৰ্থ হাতীজনীৰ পৰিবহণৰ অনুমতি দিয়া হৈছিল ১৪ জুনত, আৰু গুজৰাট বন বিভাগৰ আপত্তিহীনতাৰ প্ৰমাণ পত্ৰও সেইদিনাই জাৰি কৰা হৈছিল। মাইকী অপ্ৰাপ্তবয়স্ক হাতীজনীকো ১৩ জুনতে মাইক্ৰ’চিপ লগোৱা হৈছিল।

হুকুমদাৰ খান নামৰ জনৈক ব্যক্তিৰ ভূমিকাই গুজৰাটৰ জগন্নাথ মন্দিৰলৈ হাতী পৰিবহণৰ সমগ্ৰ বিতৰ্কটোকে “অন্ধকাৰ” কৰি পেলালে, কাৰণ তেওঁ আছিল এগৰাকী “দালাল”।

হাতীকেইটাৰ পৰিবহণৰ অগ্ৰগতি বুজ লোৱাৰ বাবে জগন্নাথ মন্দিৰৰ প্ৰতিনিধি দলৰ গুৱাহাটীলৈ অহাৰ সময়ত বুধবাৰে অসমৰ মুখ্য বন্যপ্ৰাণী ৱাৰ্দেন কাৰ্য্যালয়ত হুকুমদাৰ খানো উপস্থিত আছিল।

অৱশেষত বৃহস্পতিবাৰে অসমৰ বন বিভাগে তিনিচুকীয়াৰ পৰা আহমেদাবাদৰ জগন্নাথ মন্দিৰলৈ অপ্ৰাপ্তবয়স্ক হাতী চাৰিটা পৰিবহণৰ সিদ্ধান্ত স্থগিত ৰখাৰ সিদ্ধান্ত ল’লে।

ৰঞ্জনা গুপ্তাই নিৰ্দেশটোত কৈছে যে উত্তৰ ভাৰতত চলিত গ্ৰীষ্ম প্ৰৱাহৰ পৰিপ্ৰেক্ষিতত হাতীকেইটাৰ পৰিবহণৰ নিৰ্দেশটো স্থগিত ৰখা হৈছে।

বুধবাৰে সন্ধিয়া পশু বিশেষজ্ঞ সমিতিয়ে দাখিল কৰা প্ৰতিবেদনৰ সঁহাৰিৰূপে স্থগনাদেশৰ বাহিৰে অসমৰ বন বিভাগৰ হাতত আন উপায় নাছিল।

পশু বিশেষজ্ঞসকলে মত পোষণ কৰিছিল যে খুব কম ঘৰ্মগ্ৰন্থি থকা বাবে হাতীৰ তাপ নিয়ন্ত্ৰণ ব্যৱস্থাটো অত্যন্ত দুৰ্বল, যাত্ৰাকালত হাতীকেইটাৰ হীট ষ্ট্ৰ’ক হোৱাৰ পূৰ্ণ সম্ভাৱনা আছিল।

আশ্চৰ্য্যজনকভাৱে, ৰূপসিং আৰু ৰাণীৰ বন্দী অৱস্থাত জন্মৰ বিষয়টোত অসমৰ বন বিভাগে “সন্দেহ” “আওকাণ” কৰিলে।

বনৰীয়া জন্তু ধৰাৰ ক্ষেত্ৰত বন্যপ্ৰাণী (সুৰক্ষা) আইন, ১৯৭২ৰ অত্যন্ত কঠোৰ বিধি আছে, আইনখনৰ ধাৰা ২(১৬)ত ইয়াক চিকাৰ ৰূপে সংজ্ঞায়িত কৰা হৈছে।

আইনখনৰ ৯নং ধাৰাই ১নং সূচীৰ জন্তু হিচাপে বনৰ পৰা হাতী ধৰা নিষিদ্ধ কৰিছে। ই এক অ-আপোচসাধ্য অপৰাধ, তিনিৰ পৰা সাত বছৰলৈকে কাৰাৱাসযোগ্য, আৰু জৰিমনা ন্যূনতম ১০০০০টকা।