ৰাজ্যৰ বেতন বঞ্চিত প্ৰাথমিক শিক্ষকৰ দীর্ঘদীনিয়া সমস্যাটো অৱশেষত অসম চৰকাৰে সমাধান কৰাৰ বাবে কেবিনেটত সিদ্ধান্ত গ্রহণ কৰিছে । স্বাভাৱিকতে ৰাজ্যৰ বেতন বঞ্চিত শিক্ষক সকল উৎফুল্লিত হৈ পৰা দেখা গৈছে ।
দীর্ঘদীনিয়া সমস্যাটো সমাধানৰ ক্ষেত্রত অসম চৰকাৰে গ্রহণ কৰা ঐতিহাসিক সিদ্ধান্তৰ বাবে সদৌ অসম বেতন বঞ্চিত কৰ্মৰত প্ৰাথমিক শিক্ষক সন্থাৰ সাধাৰণ সম্পাদক বসন্ত নেওগ, কাৰ্যকৰী সভাপতি কুশল বুঢ়াগোহাঁই আৰু কেন্দ্ৰীয় সভানেত্রী হেমাঞ্জলী ভুঞা দত্তই মুখ্যমন্ত্রী সৰ্বানন্দ সোণোৱাল আৰু শিক্ষামন্ত্রী হিমন্ত বিশ্ব শর্মাৰ লগতে অসম চৰকাৰক ধন্যবাদ আৰু কৃতজ্ঞতা জ্ঞাপন কৰিছে ।
তাৰোপৰি অবিভক্ত শিৱসাগৰ জিলাৰ সন্মানীয় বিধায়ক ক্ৰমে কুশল দুৱৰী, প্ৰদীপ হাজৰিকা, সাংসদ তপন কুমাৰ গগৈ আৰু মন্ত্রী যোগেন মহন ডাঙৰীয়াৰ মুখ্য উদ্যোগৰ বাবে ই সম্ভৱ হৈ উঠিল বুলি জানিবলৈ দিছে সাধাৰণ সম্পাদক বসন্ত নেওগে ।তেওঁলোকলৈও সন্থাৰ তৰফৰ পৰা বিশেষভাৱে কৃতজ্ঞতা জ্ঞাপন কৰাৰ বিষয়ে সদৰী কৰিছে ।
ৰাজ্যৰ বেতন বঞ্চিত শিক্ষক সকলৰ সমগ্র সমস্যাটো চৰকাৰ আৰু জনসাধাৰণৰ দৃষ্টিগোচৰ কৰাৰ ক্ষেত্রত অসমৰ বিভিন্ন প্ৰান্তৰ সন্মানীয় সাংবাদিক সকলৰ অৱদান অপৰিসীম । এই ক্ষেত্রত শিৱসাগৰ জিলাৰ যৌথ সংগ্রামী মঞ্চৰ অন্তভুর্ক্ত প্ৰতিটো সংগঠনৰ অভূতপূর্ব সঁহাৰি আৰু পূৰ্ণ সহযোগিতাৰ চিৰদিন স্মৰণীয় আৰু চিৰকৃতজ্ঞ হৈ ৰোৱাৰ উপৰিও সন্মিলনী, বিভিন্ন দল সংগঠন, শিক্ষক কৰ্মচাৰী সংগঠনৰ ভূমিকাকো কৃতজ্ঞতা জনাইছে সম্পাদক বসন্ত নেওগে ।
সমস্যা সমাধানৰ ক্ষেত্রত বিভিন্ন সময়ত পৰামর্শ আগবঢ়াই অহা শিৱসাগৰ জিলা প্ৰাথমিক শিক্ষা বিষয়া আব্দুল জেলিল ডাঙৰীয়াকো কৃতজ্ঞতা জ্ঞাপন কৰিছে সদৌ অসম বেতন বঞ্চিত কৰ্মৰত প্ৰাথমিক শিক্ষক সন্থাই ।
প্ৰায় দুটা দশকজোৰা এটা সমস্যা সমাধান কৰাৰ বাবে বিত্ত তথা শিক্ষামন্ত্রী হিমন্ত বিশ্ব শর্মাৰ লগতে আৰু শিৱসাগৰ জিলাৰ দুগৰাকী বিধায়ক ক্ৰমে প্ৰদীপ হাজৰিকা, কুশল দুৱৰী,আৰু মন্ত্রী যোগেন মহনক শিৱসাগৰ জিলা বেতন বঞ্চিত শিক্ষক সকলে অহা ১৬ অক্টোবৰত শিৱসাগৰৰ যুৱ দলত আদৰণি জনাব ।
উল্লেখ্য যে কিছু দিনৰ পূর্বে বিত্তমন্ত্রী হিমন্ত বিশ্ব শর্মা নাজিৰা ভ্রমণৰ সময়ত নাজিৰাৰ শিক্ষয়িত্রী সকলক পিঠা খুৱাব লাগিব বুলি এক ধেমেলীয়া মন্তব্য কৰিছিল । সেই অনুসৰি শিক্ষক সন্থাৰ উপ-সভানেত্রী মধুস্মৃতি গগৈ আৰু নাজিৰাৰ শিক্ষয়িত্রী সকলে ১৬ অক্টোবৰত মন্ত্রী হিমন্ত বিশ্ব শর্মাক পিঠা খুৱাবৰ বাবে ও প্ৰস্তুতি চলাইছে বুলি সম্পাদক বসন্ত নেওগে জানিবলৈ দিছে । উল্লেখ্য যে ৰাজ্যখনৰ শিক্ষক সকলৰ দীর্ঘদীনিয়া সমস্যাটো সমাধান হোৱাৰ পথত যদিও কিছু আসোঁৱাহ ৰৈ যোৱা দেখা গৈছে বুলি জানিব পৰা গৈছে ।
থাকি যোৱা আসোঁৱাহ বোৰ দুৰ কৰিবৰ বাবে ১৬ অক্টোবৰ দিনা মন্ত্রী গৰাকীক আবেদন জনাব বুলি সন্থাৰ সাধাৰণ সম্পাদক বসন্ত নেওগ আৰু কাৰ্যকৰী সভাপতি কুশল বুঢ়াগোহাঁয়ে জানিবলৈ দিছে । গতিকে অবিভক্ত শিৱসাগৰ জিলাৰ সকলো শিক্ষককে আদৰণি অনুষ্ঠানত উপস্থিত থাকিবৰ বাবে আহ্বান জনাইছে ।