মোবাইল তথা ভিডিঅ’ গেমৰ আসক্তিয়ে বৰ্তমান শিশু তথা কিশোৰ সকলক মানসিকভাৱে কেনেদৰে দুৰাগ্ৰস্ত কৰি তুলিছে, উত্তৰ প্ৰদেশত সংঘটিত এক চাঞ্চল্যকৰ কাণ্ডই তাৰ এক ভয়াৱহ প্ৰমাণ দাঙি ধৰিছে। উত্তৰ প্ৰদেশৰ লক্ষ্ণৌত এগৰাকী ১৬ বছৰীয়া কিশোৰে নিজ মাতৃক মোবাইল ফোনত গেম খেলিবলৈ বাধা দিয়াৰ বাবেই গুলীয়াই হত্যা কৰিছে।
আনকি পেছাদাৰী হত্যাকাৰীৰ দৰে কিশোৰজনে মাকক হত্যা কৰাৰ পিছত নিজ গৃহতে দুদিনৰ বাবে মৃতদেহ লুকুৱাই ৰাখিছিল।
ঘটনা সন্দৰ্ভত আৰক্ষীয়ে জানিবলৈ দিয়া মতে কিশোৰজনে মাতৃৰ সৈতে মোবাইলত গেম খেলাক কেন্দ্ৰ কৰি তৰ্কত লিপ্ত হৈছিল। মাকে গেম খেলিবলৈ বাধা প্ৰদান কৰাত ৰুষ্ট হৈ পৰে কিশোৰজন।
এই বিবাদৰ ফলশ্ৰুতিতে হিতাহিত জ্ঞান হেৰুৱাই দেওবাৰে পুৱতি নিশা কিশোৰজনে তেওঁৰ দেউতাকৰ অনুজ্ঞাপ্ৰাপ্ত থকা ৰিভলভাৰেৰে মাকক হত্যা কৰিছিল।
আকস্মকতে নিজ পুত্ৰই চলোৱা গুলীয়ে মহিলাগৰাকীৰ মূৰত আঘাত কৰিছিল আৰু লগে লগে তেওঁৰ মৃত্যু হৈছিল।
কিশোৰজনে ইয়াৰ পিছত মাকৰ মৃতদেহ লুকুৱাই ৰাখিছিল আৰু ন বছৰীয়া ভনীয়েকৰ সৈতে দুদিন তেনেকৈয়ে ঘৰত আছিল। তদুপৰি মৃতদেহৰ দুৰ্গন্ধ ঢাকিবলৈ কোঠাত ফ্ৰেচনাৰো ব্যৱহাৰ কৰিছিল কিশোৰজনে।
আনহাতে কিশোৰজনৰ ভনীয়েকে আৰক্ষীক জানিবলৈ দিয়া মতে যদি তাই এই বিষয়ে কাৰোবাক কয়, তেন্তে সি তাইকো হত্যা কৰাৰ ভাবুকি দিছিল।
মৃত মহিলাগৰাকীৰ স্বামী অৰ্থাৎ কিশোৰজনৰ দেউতাক সেনা বাহিনীত কৰ্মৰত সূত্ৰে পশ্চিম বংগত থাকে। কিশোৰজনে প্ৰথমে এটা ভুৱা কাহিনীৰে দেউতাকক মাকৰ মৃত্যুৰ খবৰ দিয়ে আৰু কয় যে ঘৰলৈ কোনো কামৰ বাবে অহা এজন ইলেক্ট্ৰিচিয়ানে মাকক গুলীয়াই হত্যা কৰিছে।
আনকি আৰক্ষীৰ আগতো কিশোৰজনে একেই কাহিনী অৱগত কৰিছিল। কিন্তু আৰক্ষীয়ে অনুসন্ধান কৰি এই কাহিনী সম্পূৰ্ণৰূপে কাল্পনিক বুলি জানিব পাৰে আৰু লগে লগে কিশোৰজনক জিম্মাত লয়।
ইতিমধ্যে কিশোৰজনে জেৰাৰ সময়ত নিজৰ অপৰাধ স্বীকাৰ কৰিছে বুলি আৰক্ষীৰ এগৰাকী শীৰ্ষ বিষয়াই জানিবলৈ দিছে।
