শ্ৰীলংকাৰ স্কুল ক্ৰিকেটত ৰাষ্ট্ৰীয় অভিলেখ ভংগ কৰিলে অসমৰ এগৰাকী কিশোৰ প্ৰদ্যুন শইকীয়াই।
চলিত বৰ্ষৰ ১৭ অনুৰ্ধৰ ৰাষ্ট্ৰীয় স্কুল ক্ৰিকেটৰ এটা চিজনত ৬ টা শতকীয় ইনিংছৰে সৰ্বমুঠ ১২৯৯ ৰাণ কৰি প্ৰদ্যুন শইকীয়াই এই অভিলেখ গঢ়িছে। ইয়াতে তেওঁৰ দ্বিশতকৰ লগতে সৰ্বোচ্চ অপৰাজিত ত্ৰিশতকীয় ইংনিছো আছে।
শ্ৰীলংকাত ১৭ অনুৰ্ধৰ শাখাত কোনোৱে প্ৰথমবাৰৰ বাবে ১০০০ ৰাণ কৰাৰ অভিলেখ গঢ়ে প্ৰদ্যুনে।
কলম্বোৰ ব্ৰিটিছ স্কুলৰ ছাত্ৰগৰাকীয়ে আন্ত:স্কুল প্ৰতিযোগিতাত ১০০০ ৰাণ অতিক্ৰম কৰি বিৰল কৃতিত্ব কঢ়িয়াই আনে।
অসম মূলৰ আক্ৰমণাত্মক বাওঁহতীয়া বেটছমেন প্ৰদ্যুনে প্ৰথমগৰাকী খেলুৱৈ হিচাপে এই অভিলেখ গঢ়ে নিজৰ ১৪ টা সাৱলীল ইনিংছৰ জৰিয়তে।
প্ৰদ্যনে ১০ বছৰ বয়সত ব্ৰিটিছ স্কুলত যোগদান কৰে আৰু তেতিয়াৰে পৰা জুনিয়ৰ আৰু ছিনিয়ৰ ক্ৰিকেট প্ৰতিযোগিতাত এগৰাকী দ্ৰুত ৰাণ সংগ্ৰহকাৰী হিচাপে বিবেচিত হৈ আহিছে।
উল্লেখযোগ্য যে প্ৰদ্যুন শইকীয়াৰ পিতৃ প্ৰদীপ শইকীয়া আৰু মাতৃ ববিতা শইকীয়া গুৱাহাটীৰ বাসিন্দা আৰু বৰ্তমান কৰ্মসূত্ৰে শ্ৰীলংকাৰ কলম্বোত আছে। গুৱাহাটীৰ দীঘলীপুখুৰীৰ সূৰ্যকুমাৰ ভূঞা পথৰ ৩৩ নং গৃহৰ বাসিন্দা এই শইকীয়া পৰিয়াল।
প্ৰদীপ শইকীয়াই ডনবস্কো হাইস্কুল, কটন কলেজত শিক্ষা গ্ৰহণ কৰাৰ লগতে অসম আভিযান্ত্ৰিক মহাবিদ্যালয়ৰ পৰা ইলেকট্ৰিকেল ইঞ্জিনিয়াৰিঙৰ স্নাতক আৰু আই এম বাংগালোৰৰ পৰা এম বি এ ডিগ্ৰী গ্ৰহণ কৰিছে। বৰ্তমান তেওঁ কলম্বোত ইনফ’টেকছ গ্ল’বেল প্ৰাইভেট লিমিটেডৰ কাৰ্যবাহী সঞ্চালক হিচাপে কৰ্মৰত হৈ আছে।
প্ৰদীপ শইকীয়া প্ৰাক্তন ন্যায়াধীশ প্ৰয়াত খগেন্দ্ৰ নাথ শইকীয়াৰ পুত্ৰ আৰু প্ৰদ্যুন প্ৰয়াত ন্যায়াধীশ গৰাকীৰ নাতি।
