১৮ গৰাকীকৈ মহিলাক হত্যা কৰাৰ অভিযোগত তেলেংগানাৰ হায়দৰাবাদত গ্ৰেপ্তাৰ হৈছে এগৰাকী ৪৫ লোক।
৪৫ জনীয়া লোকজনক হত্যাৰ অভিযোগত আৰক্ষীয়ে গ্ৰেপ্তাৰ হোৱাৰ পিছতে পোহৰলৈ আহিছে হলিউদৰ ছবিৰ দৰে এক থ্ৰীলাৰ সৃদশ কাহিনী।
ইণ্ডিয়া টুডে’ৰ বাতৰিৰ মতে ভেংকটাম্মা নামৰ এগৰাকী মহিলাক হত্যা কৰি পেট্ৰ’লৰে জ্বলাই দিয়া পিছতে হায়দৰাবাদ আৰক্ষীয়ে ২০ দিনীয়া অভিযানৰ পিছত অভিযুক্ত মাইনা ৰামুলা নামৰ ৪৫ বছৰীয়া লোকজনক গ্ৰেপ্তাৰ কৰিবলৈ সক্ষম হয়।
আৰক্ষীৰ মতে ভেংকটাম্মা নামৰ মহিলাগৰাকীৰ হত্যাৰ অভিযোগত গ্ৰেপ্তাৰ হোৱা মাইনা ৰামুলাই ইয়াৰ পূৰ্বেও হত্যাকাণ্ডৰ অপৰাধত কাৰাবাস খাটিছিল আৰু ২০১১ চনত এৰাগাডা চিকিৎসালয়ৰ পৰা চিকিৎসাধীন অৱস্থাত পলায়ন কৰিছিল।
শিল কটা শ্ৰমিক হিচাপে কৰ্মৰত লোকজনে ইতিমধ্যে বিভিন্ন অপৰাধ সংঘটিত কৰাৰ বাবে ২১ বাৰকৈ আৰক্ষীৰ হাতত গ্ৰেপ্তাৰ হৈছিল। আৰু ইয়াৰ অধিকাংশ অপৰাধেই আছিল মহিলা হত্যাকাণ্ড।
আৰক্ষীয়ে প্ৰকাশ কৰা অনুসৰি মাত্ৰ ২১ বছৰ বয়সতে বিবাহপাশত আৱদ্ধ হোৱা লোকজনে ২০০৩ চনৰ পৰা অপৰাধ জগতত ভৰি দিছিল।
বিয়াৰ পিছত খুব কম সময়তে পত্নীয়ে তেওঁক এৰি অন্য এজন লোকলৈ পলায় যোৱাৰ পিছতে মহিলাৰ প্ৰতি তেওঁ প্ৰতিশোধ পৰায়ণ হৈ পৰিছিল ৰামুলা। ইয়াৰ পিছতে তেওঁ ধনৰ বিনিময়ত মহিলাৰ সৈতে যৌন সম্পৰ্ক স্থাপন কৰি হত্যা কৰি আহিছিল।
আৰক্ষীৰ মতে ভুক্তভোগী মহিলাসকলক ৰামুলাই পানীয়ত বিষাক্ত পীল মিহলাই দি হত্যা কৰি তেওঁলোকৰ ধন-অলংকাৰ সম্পত্তি আদি লৈ পলায়ন কৰিছিল।
এই চিৰিয়েল অপৰাধৰ বাবে ৰামুলাক ২০১১ চনৰ ফেব্ৰুৱাৰীত নিম্ন আদালতে যাৱজ্জীৱন কাৰাদণ্ড বিহিছিল যদিও চেৰ্লাপল্লী কেন্দ্ৰীয় কাৰাগৰত কাৰাৰুদ্ধ হৈ থকা অৱস্থাত ৰামুলাৰ মাসনিক বিকৃতি ঘটাত চিকিৎসাৰ বাবে এৰাগাডা মানসিক চিকিৎসালয়ত ভৰ্তি কৰোৱা হৈছিল।
অপৰাধী ৰামুলাই সুযোগ বুজি ইয়াৰ পৰাই ২০১১ চনৰ ডিচেম্বৰ মাহত পলায়ন কৰি পুনৰ অপৰাধ সংঘটিত কৰি আহিছিল বুলি প্ৰকাশ কৰিছে আৰক্ষীয়ে।
ইয়াৰ পিছত ২০১৩ চনত ৰামুলাক আৰক্ষীয়ে গ্ৰেপ্তাৰ কৰে যদিও ২০১৮ চনত উচ্চ ন্যায়ালয়ে জামিনত মুকলি কৰি দিয়ে। ইয়াৰ পিছতে তেওঁ পুনৰ দুটা হত্যাকাণ্ড সংঘটিত কৰা বুলি প্ৰকাশ কৰিছে আৰক্ষীয়ে।
