তেলেংগানাৰ নিজামবাদ জিলাত এক চাঞ্চল্যকৰ হত্যাকাণ্ড সংঘটিত হৈছে য’ত এগৰাকী মহিলাই চিকিৎসাধীন অৱস্থাত থকা নিজৰ স্বামীক কেনুলাৰ জৰিয়তে টয়লেট ক্লীনাৰ প্ৰয়োগ কৰি হত্যা কৰাৰ অভিযোগ উত্থাপন হৈছে। আৰক্ষীয়ে সোমবাৰে জানিবলৈ দিয়া মতে, বিবাহ বহিৰ্ভূত সম্পৰ্কৰ বাবেই এই জঘন্য হত্যাকাণ্ড সংঘটিত কৰা হৈছে আৰু ইতিমধ্যে আৰক্ষীয়ে পত্নীকে ধৰি ঘটনাৰ সৈতে জড়িত আন দুজন লোকক গ্ৰেপ্তাৰ কৰিছে। যোৱা ১ জুলাইত মৃতকৰ মাতৃয়ে দাখিল কৰা এক এজাহাৰৰ ভিত্তিত আৰক্ষীয়ে তদন্ত আৰম্ভ কৰি সমগ্ৰ ঘটনা পোহৰলৈ আনে।
আৰক্ষীৰ সূত্ৰই প্ৰকাশ কৰা অনুসৰি, মৃত ব্যক্তিগৰাকীক ৩৫ বছৰীয়া প্ৰশান্ত বুলি চিনাক্ত কৰা হৈছে। তেওঁ এখন উপসাগৰীয় দেশত কৰ্মৰত আছিল। যোৱা ১ জুলাইত প্ৰশান্তৰ মাতৃয়ে আৰক্ষীৰ ওচৰত অভিযোগ দাখিল কৰা অভিযোগ অনুসৰি তেওঁ যোৱা ৩০ জুনত পুত্ৰৰ মৃত্যুৰ খবৰ লাভ কৰে। অভিযোগকাৰীয়ে আৰক্ষীক জনোৱা মতে, তেওঁৰ পুত্ৰ যে ঘৰলৈ আহিছিল আৰু মৃত্যুৰ পূৰ্বে কি কি ঘটনা ঘটিছিল, সেই বিষয়ে তেওঁ একেবাৰেই অৱগত নাছিল। পুত্ৰৰ মৃত্যু ৰহস্যজনক বুলি উল্লেখ কৰি তেওঁ বোৱাৰীয়েক সন্ধ্যাৰ ওপৰত সন্দেহ উপজিছে বুলি আৰক্ষীক অৱগত কৰিছিল।
পৰৱৰ্তী সময়ত আৰক্ষীয়ে কাৰিকৰী প্ৰমাণ আৰু তদন্তৰ জৰিয়তে লাভ কৰা তথ্য অনুসৰি, ৩২ বছৰীয়া সন্ধ্যাৰ ৩৫ বছৰীয়া অনিল নামৰ এজন ব্যক্তিৰ সৈতে অবৈধ সম্পৰ্ক আছিল। আৰক্ষীয়ে প্ৰকাশ কৰা এক বিবৃতিত উল্লেখ কৰা হৈছে যে সন্ধ্যা আৰু অনিলে তেওঁলোকৰ এই সম্পৰ্কৰ মাজত প্ৰশান্তক এক বাধা হিচাপে গণ্য কৰিছিল আৰু সেয়েহে তেওঁক হত্যা কৰাৰ পৰিকল্পনা কৰিছিল। এই ষড়যন্ত্ৰ কাৰ্যকৰী কৰাৰ বাবে তেওঁলোকে ভেংকট সাই নামৰ আন এজন ব্যক্তিৰ সহায় লৈছিল। পৰিকল্পনা অনুসৰি, যোৱা ২৯ জুনত সাইয়ে প্ৰশান্তৰ বাসগৃহলৈ গৈ তেওঁক অত্যধিক পৰিমাণে সুৰাপান কৰায়। তাৰ পিছত সাইয়ে প্ৰশান্তক অট্টালিকাটোৰ ছাদলৈ লৈ যায় আৰু টেলিফোনযোগে সন্ধ্যাই দিয়া নিৰ্দেশ মৰ্মে তেওঁক তললৈ পেলাই দিয়ে।
ছাদৰ পৰা পৰি যোৱাৰ ফলত প্ৰশান্ত গুৰুতৰভাৱে আহত হৈছিল যদিও তেওঁৰ মৃত্যু হোৱা নাছিল। লগে লগে সন্ধ্যা আৰু সাইয়ে মিলি প্ৰশান্তক চিকিৎসাৰ বাবে এখন চৰকাৰী চিকিৎসালয়লৈ লৈ যায়। পৰৱৰ্তী সময়ত তেওঁলোকে আহত প্ৰশান্তক এখন ব্যক্তিগত চিকিৎসালয়লৈ স্থানান্তৰ কৰে আৰু তাৰ পিছত ঘৰলৈ লৈ আহে। ঘৰলৈ অনাৰ পিছত অনিলৰ উচটনি মৰ্মে সন্ধ্যাই চিকিৎসাধীন প্ৰশান্তৰ শৰীৰত লগোৱা কেনুলাৰ জৰিয়তে টয়লেট ক্লীনাৰ আৰু নিচাযুক্ত ঔষধ প্ৰয়োগ কৰে। ইয়াৰ উপৰিও সন্ধ্যাই প্ৰশান্তক বিচনাৰ পৰা তললৈ পেলাই দিয়ে, যাৰ ফলত তেওঁৰ মৃত্যু ঘটে।
আৰক্ষীৰ জেৰাৰ সময়ত অভিযুক্তসকলে নিজৰ অপৰাধ স্বেচ্ছাই স্বীকাৰ কৰে। তদন্তকাৰী আৰক্ষীৰ দলে তিনিওগৰাকী অভিযুক্তক গ্ৰেপ্তাৰ কৰি আদালতত হাজিৰ কৰোৱায়। পৰৱৰ্তী সময়ত ন্যায়িক প্ৰক্ৰিয়া অনুসৰি আদালতে তিনিওজনকে কাৰাগাৰলৈ প্ৰেৰণ কৰে বুলি আৰক্ষীৰ বিবৃতিটোত প্ৰকাশ কৰা হৈছে। সমগ্ৰ ঘটনা সন্দৰ্ভত বৰ্তমান আৰক্ষীৰ আইনী প্ৰক্ৰিয়া অব্যাহত আছে।
