বাক্সা জিলাৰ তামুলপুৰ মহকুমাত অতি সম্প্ৰতি অগ্নি মানৱৰ (ফায়াৰ মেন) তাণ্ডৱে তীব্ৰ সন্ত্ৰাসৰ সৃষ্টি কৰিছে।
১ জানুৱাৰিৰ নিশা আচিনাক্ত দুৰ্বৃত্তই কুমাৰীকাটা ডন বক্স’ বিদ্যালয় চৌহদত মনিফেছ বেচৰা নামৰ এগৰাকী।শিক্ষকৰ ঘৰৰ বাৰাণ্ডাত থকা এখন বাইক জ্বলোৱাৰ চাঞ্চল্য মাৰ নৌযাওতেই পুনৰ শুকুৰবাৰে নিশা প্ৰায় ১১-০০ বজাত নাগ্ৰীজুলি আৰক্ষী চকীৰ অধীনৰ বাল্টিপাৰ গাঁৱত এটি পৰিয়ালৰ বাৰাণ্ডাত থকা এখন স্কুটি জ্বলাই দিয়ে।
জানিব পৰা মতে, শুকুৰবাৰে নিশা বাল্টিপাৰ গাঁও নিবাসী বৃহত্তৰ নাগ্ৰীজুলি অঞ্চলৰ সমাজকৰ্মী ঘনশ্যাম খনালৰ ঘৰৰ বাৰাণ্ডাত গ্ৰীলৰ বেৰৰ ভিতৰত থকা এ এছ- ০১-বি পি-৮০৯৫ নম্বৰৰ স্কুটি খনত অগ্নি সংযোগ কৰে।
নিশা ডাউদাউকৈ জুই জ্বলাত পোহৰ দেখা পাই ঘনশ্যাম খনাল সহ পৰিয়ালৰ লোক বাহিৰলৈ ওলাই আহে আৰু বহু চেষ্টা কৰি স্কুটি খনৰ জুই নূমুৱাবলৈ সক্ষম হয়।
দুৰ্বৃত্তই ঘনশ্যাম খনালৰ পদূলিত থকা ধান খেৰৰ দম এটাটো অগ্নি সংযোগ কৰে।
পৰিয়ালটোৰ হাঁহাকাৰ শুনি নিশা ওচৰ চুবুৰীয়া আহি ঘনশ্যামৰ ঘৰৰ চৌহদত উপস্থিত হয় আৰু জুই নিৰ্বাপন কৰে।
ঘনশ্যাম খনালে আজি সংবাদ মাধ্যমৰ আগত প্ৰকাশ কৰা মতে স্কুটি খনৰ ওচৰত দুটা গেছ ভৰ্তি ছিলিণ্ডাৰ আছিল আৰু সময়মতে সাৰ পোৱাৰ বাবে ভয়াবহ অগ্নিকাণ্ডৰ পৰা ৰক্ষা পৰে পৰিয়ালটো।
নিশাই ঘটনাৰ সন্দৰ্ভত নাগ্ৰীজুলি আৰক্ষীক খবৰ দিয়াত নাগ্ৰীজুলি আৰক্ষী চকীৰ ভাৰপ্ৰাপ্ত বিষয়া কৈলাস মালাকৰৰ নেতৃত্বত এটি আৰক্ষীৰ দল ঘটনাস্থলীত উপস্থিত হয় আৰু ঘটনাৰ বুজে লয়।
আজি পুৱা ঘনশ্যাম খনালে নাগ্ৰীজুলি আৰক্ষী চকীত এজাহাৰ দাখিল কৰিছে।
ইপিনে, একে নিশাই নাগ্ৰীজুলি বজাৰস্থিত নিকুঞ্জ দাসৰ দোকানৰ বেৰ ভাঙি আছিনাক্ত দুৰ্বিত্বই প্ৰৱেশ কৰি নগদ ধনৰ লগতে দোকানৰ ভিতৰত থকা কেইবাহাজাৰ টকাৰ বহু মূল্যবান সামগ্ৰী লুটি নিয়ে।
ইয়াৰ উপৰিও কালি নিশাৰ ভাগতেই দুৰ্বৃত্বৰ দলে বাল্টিপাৰ গাঁওৰ দুৰ্গা দুলালৰ ঘৰৰ চৌহদত প্ৰৱেশ কৰি পানী যোগানৰ বানে ব্যৱহাৰ কৰা এটি মটৰ চুৰি কৰি নিয়াৰ চেষ্টা চলায় যদিও ব্যৰ্থ হয়।
নিশা নাগ্ৰীজুলি অঞ্চলত সংঘটিত হোৱা কেইবাটাও ঘটনাৰ পিছত সমগ্ৰ নাগ্ৰীজুলি অঞ্চলত আতংক আৰু চাঞ্চল্যৰ সৃষ্টি হৈছে।
দুৰ্বৃত্বৰ দলক অতি শীঘ্ৰে কৰায়ত্ত কৰাৰ বাবে অঞ্চলটোৰ ৰাইজে আৰক্ষী প্ৰশাসনক দাবী জনাইছে।
ঘটনাৰ সন্দৰ্ভত নাগ্ৰীজুলি আৰক্ষীয়ে জোৰদাৰ তদন্ত অব্যাহত ৰাখিছে।