অসমত বিদেশী ভাষা শিক্ষাৰ ক্ষেত্ৰত এক নতুন দিগন্তৰ সূচনা কৰি তেজপুৰ বিশ্ববিদ্যালয়ে প্ৰথমবাৰৰ বাবে জাপানীজ ভাষাৰ পাঠ্যক্ৰম আৰম্ভ কৰাৰ প্ৰস্তুতি চলাইছে। উচ্চশিক্ষাৰ সমান্তৰালভাৱে ছাত্ৰ-ছাত্ৰীসকলৰ দক্ষতা বৃদ্ধিৰ লক্ষ্যৰে আৰম্ভ কৰিবলগীয়া এই পাঠ্যক্ৰম কেৱল বিশ্ববিদ্যালয়খনৰ শিক্ষাৰ্থীসকলৰ মাজতেই সীমাবদ্ধ নাথাকি, বাহিৰৰ আগ্ৰহী প্ৰাৰ্থীসকলৰ বাবেও মুকলি থাকিব বুলি জানিবলৈ দিছে। সকলো পৰিকল্পনা অনুসৰি আগবাঢ়িলে চলিত মাহৰ শেষৰ ফালৰ পৰাই এই পাঠ্যক্ৰম আনুষ্ঠানিকভাৱে আৰম্ভ হোৱাৰ সম্ভাৱনা প্ৰকাশ কৰিছে ।
বিশ্ববিদ্যালয়খনৰ বিদেশী ভাষা বিভাগৰ মুৰব্বী অধ্যাপক হেমজ্যোতি মেধিয়ে জানিবলৈ দিয়া মতে, ইতিমধ্যে জাপানীজ ভাষাৰ শিক্ষক নিযুক্তিৰ বাবে প্ৰয়োজনীয় সাক্ষাৎকাৰ প্ৰক্ৰিয়া সম্পন্ন হৈছে আৰু অতি শীঘ্ৰেই ইয়াৰ ফলাফল ঘোষণা কৰা হ’ব। নিযুক্তিপ্ৰাপ্ত শিক্ষকগৰাকীয়ে দায়িত্ব গ্ৰহণ কৰাৰ পিছতেই পাঠ্যক্ৰমটোৰ আনুষ্ঠানিক আৰম্ভণি ঘটিব। এই প্ৰসংগত অধ্যাপক মেধিয়ে কয়, “বিশ্ববিদ্যালয়ৰ শিক্ষাৰ্থীসকলে এই কোৰ্চটো স্কীল এনহেন্সমেণ্ট কোৰ্চ (Skill Enhancement Course) বা অ’পেন ইলেক্টিভ (Open Elective) হিচাপেও গ্ৰহণ কৰিব পাৰিব। একে সময়তে বাহিৰৰ আগ্ৰহী শিক্ষাৰ্থীসকলৰ বাবেও আৱেদন কৰাৰ সুবিধা থাকিব।”
উল্লেখ্য যে, তেজপুৰ বিশ্ববিদ্যালয়ত বৰ্তমান মেণ্ডাৰিণ আৰু জাৰ্মান ভাষাৰ পাঠ্যক্ৰম চলি আছে। ২০২৪ চনৰ পৰা স্নাতক (বি এ) স্তৰত চীনৰ মেণ্ডাৰিণ ভাষাৰ পাঠ্যক্ৰম আৰম্ভ কৰা হৈছিল আৰু এতিয়া এই বিদেশী ভাষাৰ তালিকাত জাপানীজ ভাষাও নতুনকৈ সংযোজন হ’ব। বিশ্ববিদ্যালয় কৰ্তৃপক্ষই সদৰী কৰা অনুসৰি, শেহতীয়াকৈ জাপান ফাউণ্ডেচনৰ সৈতে অনুষ্ঠিত এক কাৰ্যসূচীৰ জৰিয়তে দুয়োপক্ষৰ মাজত যোগসূত্ৰ স্থাপন হৈছে। আনহাতে, উত্তৰ-পূব ভাৰত আৰু জাপানৰ মাজত পাৰস্পৰিক সহযোগিতা বৃদ্ধি কৰাৰ ক্ষেত্ৰত অসম চৰকাৰেও শেহতীয়াকৈ বিশেষ পদক্ষেপ গ্ৰহণ কৰিছে, যিয়ে এই পাঠ্যক্ৰমৰ প্ৰাসংগিকতা অধিক বৃদ্ধি কৰিছে।
এই নতুন পাঠ্যক্ৰমৰ জৰিয়তে মূলতঃ জাপানীজ ভাষা শিক্ষাত গুৰুত্ব আৰোপ কৰা হ’ব যদিও ই শিক্ষাৰ্থীসকলৰ বৃত্তিগত জীৱনতো বিশেষ প্ৰভাৱ পেলাব। বিশ্ববিদ্যালয় কৰ্তৃপক্ষৰ মতে, আভিযান্ত্ৰিক (Engineering), তথ্য প্ৰযুক্তি (IT) বা আতিথ্য ব্যৱস্থাপনা (Hospitality) খণ্ডৰ দৰে বৃত্তিমূলক ক্ষেত্ৰত ইতিমধ্যে ডিগ্ৰী লাভ কৰা শিক্ষাৰ্থীসকলৰ বাবে এই ভাষাজ্ঞানে জাপানত উচ্চ অধ্যয়ন বা কৰ্মসংস্থাপনৰ নতুন দুৱাৰ মুকলি কৰাত বিশেষভাৱে সহায়ক হ‘ব।
ইতিমধ্যে বহুসংখ্যক আগ্ৰহী শিক্ষাৰ্থীয়ে পাঠ্যক্ৰমটোৰ বিষয়ে জানিবলৈ বিশ্ববিদ্যালয় কৰ্তৃপক্ষৰ সৈতে যোগাযোগ কৰিছে। শিক্ষকগৰাকীয়ে দায়িত্ব গ্ৰহণ কৰাৰ লগে লগে বিশ্ববিদ্যালয়ৰ ৱেবছাইটত এই সম্পৰ্কীয় সবিশেষ তথ্য আৰু আনুষ্ঠানিক জাননী প্ৰকাশ কৰা হ’ব বুলি সদৰী কৰিছে।
