তেজপুৰ বিশ্ববিদ্যালয়ত উপাচাৰ্য শম্ভু নাথ সিঙৰ সঘন অনুপস্থিতি আৰু প্ৰশাসনিক দুৰ্বলতাৰ বিৰুদ্ধে ছাত্ৰ-ছাত্ৰীয়ে চলাই থকা আন্দোলনে নতুন পাক লৈছে। বিশ্ববিদ্যালয়খন এতিয়া এক গভীৰ সংকটৰ সন্মুখীন হৈছে। শৈক্ষিক পৰিৱেশ উশৃঙ্খল হোৱাৰ লগতে প্ৰশাসনিক বিশৃংখলতাও দেখা গৈছে।
প্ৰকাশিত তথ্য অনুসৰি, ২০২৩ চনৰ এপ্ৰিলৰ পৰা ২০২৫ চনৰ ছেপ্টেম্বৰ মাহৰ ভিতৰত উপাচাৰ্য অধ্যাপক শম্ভু নাথ সিঙে মুঠ ৫১বাৰ চৰকাৰী ভ্ৰমণ কৰিছে। তেওঁ এই সময়ছোৱাত মুঠ ৩৮৮দিনেই কেম্পাছৰ বাহিৰত আছিল। বেছিভাগ সময় নতুন দিল্লী ভ্ৰমণ কৰাৰ কথা নথিপত্ৰত প্ৰতিফলিত হৈছে, ইয়াৰোপৰি জয়পুৰ, গুৱাহাটী আৰু অন্য স্থানলৈও ভ্ৰমণ কৰাৰ তথ্য পোহৰলৈ আহিছে। গড় হিচাপত তেওঁ প্ৰতিমাহে ১৬দিনকৈ কেম্পাছৰ বাহিৰত থাকিছিল বুলি অভিযোগ উঠিছে। তেওঁ কৰা আটাইতকৈ দীঘলীয়া ভ্ৰমণ আছিল ২০২৫ চনৰ ৪ ফেব্ৰুৱাৰী পৰা ২৫ ফেব্ৰুৱাৰীলৈ ২২দিনৰ।
ছাত্ৰ সমাজে অভিযোগ উত্থাপন কৰি কয়, উপাচাৰ্যৰ এই সঘন অনুপস্থিতিৰ ফলত বিশ্ববিদ্যালয়ত প্ৰশাসনিক স্থবিৰতাৰ সৃষ্টি হৈছে। বহুকেইটা একাডেমিক আৰু উন্নয়নমূলক সিদ্ধান্ত পলম হোৱা লগতে মানৱ সম্পদ, পৰীক্ষা, হোষ্টেল আৰু আর্থিক বিভাগত অসন্তোষ বৃদ্ধি পাইছে। উপাচাৰ্যৰ সৈতে যোগাযোগৰ সুযোগ কমি যোৱাৰ ফলত শীৰ্ষ নেতৃত্ব আৰু ছাত্ৰ-ছাত্ৰী, শিক্ষক তথা কৰ্মচাৰীসকলৰ মাজত গভীৰ দ্বন্দ্ব সৃষ্টি হৈছে।
৮ অক্টোবৰ তাৰিখে শতাধিক ছাত্ৰ-ছাত্ৰীয়ে বিশ্ববিদ্যালয়ৰ কাৰ্যালয়ৰ সন্মুখত প্ৰতিবাদ অব্যাহত ৰাখি উপাচাৰ্যৰ শৈক্ষিক কৰ্তব্যত গাফিলতি আৰু দায়িত্বহীনতাৰ অভিযোগ তোলে। তেওঁলোক উপাচাৰ্যৰ পদত্যাগ আৰু বিশ্ববিদ্যালয়ৰ কাৰ্যকৰী পৰিচালনাত স্বচ্ছতা আৰু জবাবদিহিতা স্থাপন কৰিবলৈ শিক্ষা মন্ত্ৰালয়ক হস্তক্ষেপৰ আহ্বান জনায়।
আন্দোলন তীব্ৰতৰ হোৱাৰ বাদে পিছত ১৬ অক্টোবৰ বৰ্তমানৰ ভাৰপ্ৰাপ্ত পঞ্জীয়ক প্ৰীতম দেৱে পদত্যাগ কৰে। লগতে ভাৰপ্ৰাপ্ত উপাচাৰ্য হিচাপে দায়িত্ব লৈছিল অধ্যাপক ৰাজা ৰফিকুল হক। কিন্তু এই পদবিন্যাসে অপৰিকল্পিত অৱস্থাৰ সৃষ্টি কৰিছে বুলি অভিযোগ উঠিছে। বহু কৰ্মচাৰী আৰু অধ্যাপকে এই প্ৰশাসনিক সালসলনি বিশ্ববিদ্যালয়ৰ আভ্যন্তৰীণ ব্যৱস্থাপনাৰ ওপৰত আঘাত হানিছে।
ইতোমধ্যে শিক্ষক মহলৰ একাংশই সঙ্কট সমাধানৰ বাবে আলোচনা আৰম্ভ কৰাৰ আহ্বান জনাইছে। অৱশ্যে উপাচাৰ্য শম্ভু নাথ সিঙ বা বিশ্ববিদ্যালয়ৰ তথ্য আৰু জনসংযোগ বিভাগে এই অভিযোগসমূহৰ বিষয়ে এতিয়ালৈকে কোনো মন্তব্য কৰা নাই।
উল্লেখযোগ্য যে, বিশ্ববিদ্যালয়খনৰ এই অৱস্থা কেতিয়ালৈ চলিব আৰু কেন্দ্রীয় চৰকাৰে ইয়াত কিধৰণৰ ভূমিকা গ্ৰহণ কৰিব, তাক লৈ সম্প্ৰতি কৌতূহল বৃদ্ধি পাইছে।
