প্ৰতিৱেশী কম্বোডিয়াৰ ওপৰত থাইলেণ্ডে পুনৰ আক্ৰমণ আৰম্ভ কৰিছে। দেশখনে জনাইছে যে তেওঁলোকে ‘নিজৰ ভূখণ্ড পুনৰুদ্ধাৰৰ বাবে’ এই আক্ৰমণ চলাইছে।
দুয়োখন প্ৰতিৱেশী দেশৰ মাজত চলি থকা এই ৰক্তক্ষয়ী সংঘাত বন্ধ কৰিবলৈ আমেৰিকাৰ ৰাষ্ট্ৰপতি ড’নাল্ড ট্ৰাম্পকে ধৰি অন্যান্য মধ্যস্থতাকাৰীসকলে চেষ্টা চলাইছে। কিন্তু সেইসমূহক গুৰুত্ব নিদি তেওঁলোকে আক্ৰমণ-প্ৰত্যাক্ৰমণ অব্যাহত ৰাখিছে।
দেওবাৰ পৰ্যন্ত দুয়োখন দেশৰ সেনাৰ মাজত সীমাত সংঘৰ্ষ চলি আছে।
ইয়াৰ পূৰ্বে থাইলেণ্ডৰ সৈতে থকা সকলো ধৰণৰ সীমান্ত পথ বন্ধ কৰাৰ কথা ঘোষণা কৰিছিল কম্বোডিয়াই। এই দুয়োখন দেশৰ মাজত ৮০০ কিলোমিটাৰ দৈৰ্ঘ্যৰ সীমান্ত আছে। ঔপনিবেশিক কালত ভাগ কৰা এই সীমান্তক লৈ দুয়োখন দেশৰ মাজত বিবাদ আছে। তেওঁলোকে সীমান্তৱৰ্তী কিছু অঞ্চল নিজৰ বুলি দাবী কৰে।
নতুনকৈ আৰম্ভ হোৱা সংঘৰ্ষত এই বাতৰি লিখা পৰ্যন্ত ২৫ জন লোক নিহত হৈছে। নিহতসকলৰ ভিতৰত সেনাৰ লগতে অসামৰিক লোকো আছে।
থাইলেণ্ডৰ নৌ সেনাৰ মুখপাত্ৰ ৰিয়েৰ এডমিৰেল পাৰাখ ৰাট্টানচাইয়াপানৰ উদ্ধৃতি দি স্থানীয় সংবাদ মাধ্যম মাতিচোন অনলাইনে জনাইছে যে, ট্ৰাট প্ৰদেশৰ ওচৰত নিজৰ ভূখণ্ড পুনৰুদ্ধাৰৰ বাবে তেওঁলোকে নতুন সামৰিক অভিযান আৰম্ভ কৰিছে।
ৰাতিপুৱাৰ ভাগত আৰম্ভ হোৱা এই অভিযানত ব্যাপক সংঘৰ্ষ হোৱা বুলি জনাই নৌ বিষয়াগৰাকীয়ে কয় যে, আন্তঃৰাষ্ট্ৰীয় আইন অনুসৰি আত্মৰক্ষা আৰু ভৌগোলিক অখণ্ডতা ৰক্ষাৰ স্বাৰ্থত পুনৰ আক্ৰমণ চলোৱা হৈছে।
থাইলেণ্ডৰ সেনাই জনাইছে যে তেওঁলোকে শত্ৰু পক্ষক আঁতৰাই অঞ্চলটো পুনৰুদ্ধাৰ কৰিছে।
দেশখনৰ চৰকাৰী টেলিভিছন থাই পিবিএছেও জনাইছে যে, আক্ৰমণ চলোৱা স্থানৰ পৰা কম্বোডিয়াৰ সেনাক আঁতৰাই থাইলেণ্ডৰ সেনাই তাত তেওঁলোকৰ পতাকা উত্তোলন কৰিছে।
টিভি-৩ নামৰ থাইলেণ্ডৰ আন এক সংবাদ মাধ্যমে জনাইছে যে, দেওবাৰৰ পুৱাৰে পৰা স্থল সেনা, নৌ সেনা আৰু বিমান বাহিনীয়ে সীমান্তত যৌথ অভিযান আৰম্ভ কৰিছে।
শেহতীয়া সংঘৰ্ষত কিমান লোক হতাহত হৈছে, সেই বিষয়ে এতিয়ালৈকে সঠিককৈ জনা হোৱা নাই।
কম্বোডিয়াৰ নাগৰিকসকলে ছ’চিয়েল মিডিয়াত জনাইছে যে, থাইলেণ্ডে তেওঁলোকৰ সীমান্তৱৰ্তী পুৰছাত প্ৰদেশৰ থামাৰ দা অঞ্চলত গোলাবৰ্ষণ কৰিছে।
