দেওবাৰে তামিলনাডুত এক নতুন ইতিহাসৰ সৃষ্টি হ’ল। দীঘলীয়া ৰাজনৈতিক জটিলতাৰ অন্ত পেলাই তামিলনাডুৰ মুখ্যমন্ত্ৰী হিচাপে শপত গ্ৰহণ কৰিলে দক্ষিণৰ জনপ্ৰিয় ছুপাৰষ্টাৰ থলপতি বিজয়ে। দেওবাৰে পুৱা চেন্নাইৰ জৱাহৰলাল নেহৰু ইণ্ডোৰ ষ্টেডিয়ামত অনুষ্ঠিত হোৱা এক জাকজমকীয়া অনুষ্ঠানত ৰাজ্যপাল ৰাজেন্দ্ৰ বিশ্বনাথ আৰলেকাৰে তেওঁক পদ আৰু গোপনীয়তাৰ শপত বাক্য পাঠ কৰোৱায়। এই বিশেষ অনুষ্ঠানত বিজয়ৰ বিশেষ বান্ধৱী তথা অভিনেত্ৰী তৃষা কৃষ্ণণ আৰু কংগ্ৰেছৰ সাংসদ তথা লোকসভাৰ বিৰোধী দলৰ নেতা ৰাহুল গান্ধীও উপস্থিত আছিল।
শপত গ্ৰহণ অনুষ্ঠানৰ বাবে বিজয়ে বগা ছাৰ্ট, ক’লা ব্লেজাৰ আৰু ক’লা ৰঙৰ ট্ৰাউজাৰ পিন্ধি ষ্টেডিয়ামত উপস্থিত হৈছিল। তেওঁ মঞ্চত উঠাৰ লগে লগে তেওঁৰ ৰাজনৈতিক দল টিভিকেৰ হাজাৰ হাজাৰ কৰ্মী আৰু সমৰ্থকে হাতচাপৰি বজাই তেওঁক উষ্ম আদৰণি জনায়। বিজয়ে যেতিয়া তামিল ভাষাত শপত গ্ৰহণ কৰিবলৈ আৰম্ভ কৰে, তেতিয়া গোটেই ষ্টেডিয়ামত এক আৱেগিক পৰিৱেশৰ সৃষ্টি হয়। শপত গ্ৰহণৰ পিছতেই প্ৰধানমন্ত্ৰী নৰেন্দ্ৰ মোদীয়েও বিজয়ক মুখ্যমন্ত্ৰী হোৱাৰ বাবে শুভেচ্ছা জ্ঞাপন কৰে। উল্লেখযোগ্য যে, যোৱা ছয় দশকত দ্ৰাবিড় জনগোষ্ঠীৰ বাহিৰৰ পৰা তামিলনাডুৰ মুখ্যমন্ত্ৰীৰ আসনত বহা বিজয়েই হৈছে প্ৰথমগৰাকী ব্যক্তি।
বিজয়ৰ লগতে তেওঁৰ দলৰ আন নজন নেতায়ো মন্ত্ৰী হিচাপে শপত গ্ৰহণ কৰে। যোৱা কেইবাদিনো ধৰি তামিলনাডুত চৰকাৰ গঠনক লৈ এক ডাঙৰ অনিশ্চয়তা চলি আছিল। ২৩৪ খন আসন থকা তামিলনাডু বিধানসভাত চৰকাৰ গঠনৰ বাবে ১১৮ খন আসনৰ প্ৰয়োজন হয়। নিৰ্বাচনত বিজয়ৰ দলে সৰ্বাধিক ১০৮ খন আসন লাভ কৰিছিল যদিও সংখ্যাগৰিষ্ঠতা প্ৰমাণ কৰিবলৈ তেওঁলোক কিছু পিছপৰি আছিল। অৱশেষত কংগ্ৰেছৰ পাঁচজন, বাওঁদলৰ চাৰিজন, ভিচিকেৰ দুজন আৰু আইইউএমএলৰ দুজন বিধায়কৰ সমৰ্থন লাভ কৰাৰ পিছত বিজয়ৰ দলে প্ৰয়োজনীয় মেজিক নাম্বাৰ অতিক্ৰম কৰিবলৈ সক্ষম হয় আৰু সফলতাৰে তামিলনাডুত নতুন চৰকাৰ গঠন কৰে।
