অসমত টাটা গ্ৰুপৰ ৪০ হাজাৰ কোটি টকাৰ বিনিয়োগৰ সিদ্ধান্তক আদৰণি আম আদমি পাৰ্টীৰ

আধুনিক ভাৰত নিৰ্মাণত অপৰিসীম অৱদান আগবঢ়োৱা, দেশৰ অন্যতম বৃহৎ উদ্যোগ গোষ্ঠী টাটা গ্ৰুপৰ টাটা ইলেক্ট্ৰনিকছে অসমৰ জাগীৰোডত ৪০ হাজাৰ কোটি টকাৰ বিনিয়োগেৰে এক বৃহৎ প্ৰকল্প হাতত লৈছে৷ 

কৰ্মহীন ৮৫% মহিলাৰ নিযুক্তিৰ লক্ষ্যৰে সামাজিক দায়বদ্ধতাৰ পৰিচয় দিয়া টাটা গ্ৰুপৰ এই সিদ্ধান্তক উম্ম আদৰণি জনাইছে আম আদমি পাৰ্টী অসমে৷

আজি এক প্ৰেছ বিজ্ঞপ্তিৰ জৰিয়তে আম আদমি পাৰ্টী অসমৰ সভাপতি ডা’ ভবেন চৌধুৰীয়ে কয় যে তথ্য আৰু প্ৰযুক্তি উদ্যোগ সমূহৰ বাবে অসম আটাইতকৈ উপযুক্ত স্থান৷ কুৰি শতিকাৰ শেষৰ ফালে সমগ্ৰ ভাৰতবৰ্ষতেই যি প্ৰযুক্তিৰ উত্থান ঘটিছিল তাৰ সুযোগ অসমে গ্ৰহণ কৰিব পৰা নাছিল যদিও শেহতীয়াকৈ বহু কেইটা আগশাৰীৰ উদ্যোগ অসমলৈ আহিছে৷ এইয়া অসমবাসীৰ বাবে সুখবৰ৷ হাইদৰাবাদ, বেংগালুৰুৰ দৰে ঠাইত প্ৰযুক্তিমূলক উদ্যোগৰ প্ৰসাৰৰ ফলত সেই ঠাই সমূহত শিক্ষিত নিবনুৱাৰ সংখ্যা যথেষ্ট হ্ৰাস পাইছে যদিও উদ্বেগজনকভাৱে ভাৰতবৰ্ষৰ নিবনুৱাৰ হাৰ ১০% লৈ বৃদ্ধি হ’ল৷ 

ডা০ চৌধুৰীয়ে আৰু উল্লেখ কৰে যে সামাজিক দায়বদ্ধতা থকা বহুজাতিক কোম্পানী সমূহৰ অসম আগমনে কিছু পৰিমাণে হ’লেও নিবনুৱা সমস্যাৰ সমাধানত সহায় হ’ব৷ সেয়ে টাটা গ্ৰুপলৈ থলুৱা নিযুক্তি নিশ্চিত কৰিবলৈ আম আদমি পাৰ্টীয়ে আহ্বান জনাইছে৷