‘‘নাগৰিকত্ব সংশোধনী বিধেয়কৰ বিৰুদ্ধে অসমত যি ধাৰাবাহিক আন্দোলন চলি আছে, সেয়া গুৰুত্বহীন। কিয়নো অসমৰ ৰাইজে আমাৰ চৰকাৰ বনাইছে আৰু আমি সেয়ে কৈছোঁ আমাৰ প্ৰতি আস্থা আৰু বিশ্বাস ৰাখক, সকলো ঠিক হৈ যাব।‘’ চিৰাং জিলাৰ বিজনীত সোমবাৰে বি টি এ ডি এলেকাত প্ৰথমবাৰৰ বাবে স্থাপন হ’বলগীয়া সৈনিক স্কুলৰ আধাৰশিলা স্থাপন অনুষ্ঠানত এইদৰে কয় মুখ্য মন্ত্ৰী সোণোৱালে।
তদুপৰি, নাগৰিকত্ব সংশোধনী বিধেয়ক কোনো নতুন নহয় বুলি উল্লেখ কৰি সোণোৱালে কয় যে ১৯৫০ চনৰ পৰাই ভাৰতত বিভিন্ন দেশৰ পৰা উৎপীড়নৰ বলি হৈ ভাৰতত প্ৰৱেশ কৰা সংখ্যালঘুসকলক যি ধৰণে নাগৰিকত্ব প্ৰদান কৰি থকা হৈছে, এইখন সেই নীতিৰ আধাৰতে বনোৱা আইনহে।
‘’ইয়াত একো নতুনত্ব নাই, অসমবাসীৰ ক্ষতি হ’ব পৰা একো নাই ইয়াত। বৰঞ্চ ইয়াৰ দ্বাৰা সকলো খিলঞ্জীয়া লোকক সুৰক্ষাহে দিয়া হ’ব,‘’-সোণোৱালে কয়।
উল্লেখযোগ্য যে চিৰাং জিলাৰ বিজনীত সোমবাৰে সৈনিক স্কুলৰ আধাৰশিলা স্থাপন কৰে মুখ্য মন্ত্ৰী সৰ্বানন্দ সোণোৱালে। সকলো সুবিধাযুক্ত আৱাসিক উত্তৰ-পূৰ্বাঞ্চল সৈনিক স্কুল (নৰ্থ-ইষ্ট মিলিটেৰী স্কুল)খনৰ সোমবাৰে আধাৰশিলা স্থাপন কৰা হয়। উক্ত স্কুলখন হ’ব নাগপুৰৰ ভোনছালা সৈনিক স্কুলৰ স্বীকৃতিপ্ৰাপ্ত।
আনহাতে, সোমবাৰে মুখ্য মন্ত্ৰীৰ আগমণকলৈ সমগ্ৰ বিজনী অঞ্চলতে কটকটীয়া নিৰাপত্তা ব্যৱস্থা গঢ়ি তোলা হৈছিল। কিন্তু এনে নিৰাপত্তা ব্যৱস্থাৰ মাজতে এছ এফ আই আৰু কৃষক মুক্তি সংগ্ৰাম সমিতিৰ কৰ্মীয়ে মুখ্য মন্ত্ৰীৰ কনভয়ৰ সন্মুখত ক’লা পতাকা জোকাৰি প্ৰতিবাদ সাব্যস্ত কৰে।
মুখ্য মন্ত্ৰীক ক’লা পতাকা প্ৰদৰ্শন কৰা সংগঠন দুটাৰ পাঁচজন কৰ্মীক আৰক্ষীয়ে আটক কৰি বিজনী থানাত আবদ্ধ কৰি ৰাখে।
