পবিত্ৰ গংগা নদীৰ বুকুত নাও চলাই ইফতাৰ কৰা আৰু বিৰিয়ানী খাই তাৰ হাড় নদীত দলিয়াই দিয়াৰ অভিযোগত কাৰাগাৰত বন্দী হৈ থকা আন ছয়গৰাকী অভিযুক্তকো এলাহাবাদ উচ্চ ন্যায়ালয়ে জামিন মঞ্জুৰ কৰিছে। ন্যায়াধীশ ৰাজীৱ লোচন শুক্লাৰ বিচাৰপীঠে এই ৰায় প্ৰদান কৰে। ইয়াৰ পূৰ্বে যোৱা পোন্ধৰ মে’ত এই একেখন বিচাৰপীঠে পাঁচগৰাকী আৰু ন্যায়াধীশ জিতেন্দ্ৰ কুমাৰ সিনহাৰ বিচাৰপীঠে তিনিগৰাকী অভিযুক্তৰ জামিন মঞ্জুৰ কৰিছিল। আদালতে উল্লেখ কৰে যে অভিযুক্তসকলে নিজৰ কৰ্মৰ বাবে ক্ষমা খুজিছে। বাকী থকা ছয়জন অভিযুক্তৰ জামিন আবেদন গ্ৰহণ কৰি আদালতে কয় যে এই একেটা গোচৰতে ইতিমধ্যে আঠজন অভিযুক্তই পূৰ্বে জামিন লাভ কৰিছে, গতিকে বৰ্তমানৰ আবেদনকাৰী সকলো জামিন পোৱাৰ যোগ্য। উল্লেখযোগ্য যে ইয়াৰ পূৰ্বে বাৰাণসীৰ নিম্ন আদালতে এই আটাইকেইজন অভিযুক্তৰে জামিন আবেদন খাৰিজ কৰিছিল, যাৰ পিছত তেওঁলোকে উচ্চ ন্যায়ালয়ৰ কাষ চাপিছিল।
এই গোচৰৰ শুনানিৰ সময়ত ন্যায়াধীশ ৰাজীৱ লোচন শুক্লাৰ বিচাৰপীঠে গুৰুত্বপূৰ্ণ মন্তব্য কৰি কয় যে গংগা নদী কেৱল হিন্দুসকলৰে নহয়, বৰঞ্চ সমগ্ৰ দেশৰে আস্থাৰ প্ৰতীক। আদালতে উল্লেখ কৰে যে অভিযুক্তসকলে দাখিল কৰা শপতনামাত তেওঁলোকে নিজৰ কৰ্মৰ বাবে অনুতাপ প্ৰকাশ কৰিছে আৰু তেওঁলোকৰ পৰিয়ালেও সমাজত সৃষ্টি হোৱা ক্ষোভৰ বাবে দুখ প্ৰকাশ কৰিছে। চৰকাৰী পক্ষৰ অতিৰিক্ত মহাধিবক্তা অনুপ ত্ৰিবেদীয়ে এই সমগ্ৰ ঘটনাটোক এক গভীৰ ষড়যন্ত্ৰ বুলি সন্দেহ প্ৰকাশ কৰিছিল যদিও আদালতে কয় যে অভিযুক্তসকলক কাৰাগাৰত আৱদ্ধ কৰি নো ৰাখিও গোচৰৰ পৰৱৰ্তী তদন্ত চলাই যাব পৰা যাব। যোৱা সোতৰ মাৰ্চৰ পৰা কাৰাগাৰত থকা এই যুৱকসকলে ভৱিষ্যতে এনে ধৰণৰ কাম নকৰাৰ প্ৰতিশ্ৰুতি দিছে। তেওঁলোকৰ কোনো অপৰাধমূলক পটভূমি নথকা আৰু ইতিমধ্যে ভোগ কৰা কাৰাবাসৰ সময়ক লক্ষ্য ৰাখি আদালতে তেওঁলোকক জামিন প্ৰদান কৰে।
এই সমগ্ৰ ঘটনাটো সংঘটিত হৈছিল সোতৰ মাৰ্চত, যেতিয়া শাসকীয় বিজেপি দলৰ যুৱ মৰ্চাৰ বাৰাণসী মহানগৰ সভাপতি ৰজত জয়ছোৱালে ধৰ্মীয় অনুভূতিত আঘাত সনাৰ অভিযোগ তুলি আৰক্ষীৰ ওচৰত এজাহাৰ দাখিল কৰিছিল। এজাহাৰকাৰী যুৱ নেতাগৰাকীৰ মতে পবিত্ৰ গংগা নদীত মুছলিম যুৱকসকলে মাংস ভক্ষণ কৰাটো সনাতন ধৰ্মৰ অনুগামীসকলে সহ্য নকৰে। তেওঁ এই কাৰ্যৰ তীব্ৰ বিৰোধিতা কৰি যুৱককেইজনে এক বিশেষ ধৰ্মীয় কট্টৰপন্থী চিন্তাধাৰাক প্ৰশ্ৰয় দিয়া বুলিও দাবী কৰিছিল। ইয়াৰ পিছতে আৰক্ষীয়ে ভাৰতীয় ন্যায় সংহিতাৰ ধৰ্মীয় বিদ্বেষ বিয়পোৱা, পবিত্ৰ স্থানক অপবিত্ৰ কৰা, জনসাধাৰণক আমনি কৰা আৰু জল প্ৰদূষণ প্ৰতিৰোধ আইনৰ বিভিন্ন ধাৰাত গোচৰ ৰুজু কৰি তেওঁলোকক গ্ৰেপ্তাৰ কৰিছিল।
উচ্চ ন্যায়ালয়ৰ পৰা আটাইকেইজন অভিযুক্তই জামিন লাভ কৰাৰ পিছত গোচৰ তৰা ৰজত জয়ছোৱালে সংবাদ মাধ্যমৰ আগত কয় যে ন্যায়ালয়ৰ এই আদেশ আদৰণীয়। ইয়াৰ দ্বাৰা সেই যুৱককেইজনে এক শিক্ষা পাব আৰু সমাজলৈও এটা ভাল বাৰ্তা যাব। তেওঁ লগতে হুংকাৰ দিয়ে যে যদিহে তেওঁলোকৰ আচৰণত কোনো পৰিৱৰ্তন দেখা নাযায়, তেন্তে ভৱিষ্যতে আৰু অধিক কঠোৰ পদক্ষেপ গ্ৰহণ কৰা হ’ব। আনহাতে এই সমগ্ৰ ঘটনাটোৰ সন্দৰ্ভত এক বিশেষ দিশ পোহৰলৈ আহিছে। সামাজিক মাধ্যমত ভাইৰেল হোৱা সেই নিৰ্দিষ্ট ভিডিঅ’টোৰ সত্যতা নিৰূপণ কৰাৰ পিছত অল্ট নিউজ নামৰ সংবাদ প্ৰতিষ্ঠানটোৱে প্ৰকাশ কৰিছে যে নদীৰ পানীত হাড় দলিয়াই দিয়াৰ কোনো স্পষ্ট প্ৰমাণ তেওঁলোকৰ অনুসন্ধানত পোৱা নগ’ল।
