আমেঠিৰ প্ৰাক্তন সাংসদ তথা কেন্দ্ৰীয় মন্ত্ৰী স্মৃতি ইৰাণীৰ নাম আমেঠিৰ ভোটাৰ তালিকাৰ পৰা হঠাতে নোহোৱা হৈ পৰিছে। এগৰাকী প্ৰাক্তন কেন্দ্ৰীয় মন্ত্ৰী তথা জ্যেষ্ঠ বিজেপি নেত্ৰীৰ নাম ভোটাৰ তালিকাৰ পৰা কেনেকৈ বাদ পৰিল, সেই বিষয়ে তদন্ত কৰিবলৈ জিলা প্ৰশাসনে নিৰ্দেশ দিছে। এই খবৰে এতিয়া ৰাজনৈতিক মহলত তীব্ৰ চাঞ্চল্যৰ সৃষ্টি কৰিছে।
স্মৃতি ইৰাণী আমেঠিৰ মেদান মাৱাই গাঁৱৰ বাসিন্দা। উল্লেখযোগ্য যে, ২০১৯ চনৰ লোকসভা নিৰ্বাচনত তেওঁ কংগ্ৰেছৰ নেতা ৰাহুল গান্ধীক পৰাস্ত কৰিছিল আৰু সেইবাৰ তেওঁ আমেঠিতেই নিজৰ ভোটাধিকাৰ সাব্যস্ত কৰিছিল। নিৰ্বাচনৰ কেইমাহমান আগতেই তেওঁ তাত এটা ঘৰ ভাড়ালৈ লৈ থাকিবলৈ আৰম্ভ কৰিছিল আৰু সেই অঞ্চলৰ ভোটাৰ হিচাপে নিজৰ নাম পঞ্জীয়ন কৰিছিল।
নিৰ্বাচনৰ পূৰ্বে দিয়া প্ৰতিশ্ৰুতি অনুসৰি, পৰৱৰ্তী সময়ত তেওঁ আমেঠিত মাটি কিনি ঘৰ সাজিছিল আৰু ২০২২ চনৰ পৰা তাত স্থায়ীভাৱে বসবাস কৰিবলৈ লৈছিল। ২০১৯ আৰু ২০২৪ চনৰ লোকসভা নিৰ্বাচন আৰু ২০২২ চনৰ বিধানসভা নিৰ্বাচনত তেওঁ একেৰাহে তিনিবাৰকৈ আমেঠিতেই ভোট দিছিল। বৰ্তমান উত্তৰ প্ৰদেশত ভোটাৰ তালিকা সংশোধনৰ কাম চলি আছে। কিন্তু শেহতীয়াকৈ প্ৰকাশ পোৱা নতুন ভোটাৰ তালিকাত তেওঁৰ নামটো নাই বুলি জানিব পৰা গৈছে।
মেদান মাৱাই গাঁও পঞ্চায়তৰ গাঁওপ্ৰধানে প্ৰথমে লক্ষ্য কৰে যে প্ৰাক্তন সাংসদগৰাকীৰ নাম ভোটাৰ তালিকাত নাই। ২০২৪ চনৰ শেহতীয়া লোকসভা নিৰ্বাচনত স্মৃতি ইৰাণী কংগ্ৰেছৰ প্ৰাৰ্থী কিশোৰী লাল শৰ্মাৰ হাতত পৰাস্ত হৈছিল। বৰ্তমানৰ সাংসদ কিশোৰী লাল শৰ্মায়ো প্ৰাক্তন সাংসদগৰাকীৰ নাম ভোটাৰ তালিকাৰ পৰা কৰ্তন হোৱা ঘটনাত আচৰিত হৈছে বুলি প্ৰকাশ কৰিছে।
আমেঠিৰ জিলা উপায়ুক্ত তথা গৌৰীগঞ্জ বিধানসভাৰ ৰিটাৰ্নিং বিষয়া সঞ্জয় চৌহানে কয় যে তেওঁলোকে এই বিষয়টো অতি গুৰুত্বসহকাৰে লৈছে। কাৰণ স্মৃতি ইৰাণী সেই বিধানসভা সমষ্টিৰেই এগৰাকী ভোটাৰ আছিল। প্ৰাক্তন মন্ত্ৰীগৰাকীৰ নাম তালিকাৰ পৰা ডিলিট হোৱাটো এটা আচৰিত ঘটনা আৰু কাৰ গাফিলতিৰ বাবে এনে হ’বলৈ পালে সেয়া তদন্ত কৰা হৈছে। ইপিনে, আমেঠিৰ জিলা বিজেপিৰ সভাপতি সুধাংশু শুক্লাই জানিবলৈ দিয়ে যে তেওঁলোকে ইতিমধ্যে জিলা নিৰ্বাচন কাৰ্যালয়ত আবেদন দাখিল কৰিছে। প্ৰশাসনেও আশ্বাস দিছে যে চূড়ান্ত ভোটাৰ তালিকাত প্ৰাক্তন কেন্দ্ৰীয় মন্ত্ৰীগৰাকীৰ নাম পুনৰ অন্তৰ্ভুক্ত কৰা হ’ব।
