অসমৰ কলিতা জনগোষ্ঠীৰ সৰ্বোচ্চ সংগঠন কলিতা জনগোষ্ঠী সন্মিলনৰ নেতৃত্বক লৈ এতিয়া তীব্ৰ বিতৰ্কৰ সৃষ্টি হৈছে। সংগঠনটোৰ ভিতৰচৰাতে এতিয়া নেতৃত্বৰ বিৰুদ্ধে গুৰুতৰ অভিযোগ উত্থাপন হৈছে। বহু সদস্যৰ মতে, সন্মিলনখনক লাহে লাহে এটা বিশেষ ৰাজনৈতিক দলৰ মঞ্চ হিচাপে গঢ়ি তোলা হৈছে। বিশেষকৈ বিজেপি চৰকাৰৰ মন্ত্ৰী আৰু বিধায়কসকলৰ অতিমাত্ৰা প্ৰভাৱক লৈ এতিয়া সাধাৰণ সদস্যসকলৰ মাজত ব্যাপক অসন্তুষ্টি দেখিবলৈ পোৱা গৈছে। তেওঁলোকে অভিযোগ কৰিছে যে সমাজৰ হিতৰ কাম কৰাতকৈ নেতাৰ মৰম লাভ কৰাতহে নেতৃত্বই বেছি গুৰুত্ব দিছে।
গোলাঘাট জিলাৰ হামদৈত ২৩ জানুৱাৰীৰ পৰা অনুষ্ঠিত হ’বলগীয়া কলিতা জনগোষ্ঠী সন্মিলনৰ দ্বি-বাৰ্ষিক অধিবেশনখনক লৈ এই বিতৰ্কই এতিয়া চৰম পৰ্যায় পাইছে। অভিযোগ অনুসৰি, এই অধিবেশনৰ অতিথি তালিকাখনত কেৱল শাসকীয় বিজেপি দলৰ নেতাৰে ভৰি আছে। ইয়াত কোনো বিশিষ্ট পণ্ডিত, সাহিত্যিক, শিক্ষাবিদ বা নিৰপেক্ষ বুদ্ধিজীৱীক নিমন্ত্ৰণ কৰা হোৱা নাই। সন্মিলনখনৰ এজন জ্যেষ্ঠ সদস্যই জনোৱা মতে, অনুষ্ঠানটো এতিয়া আৰু জনগোষ্ঠীয় সন্মিলন হৈ থকা নাই, ই যেন এটা বিজেপিৰ দলীয় সভাহে। গুজৰাটৰ মন্ত্ৰী কুঁৱৰজী বাৱালিয়াৰ পৰা আৰম্ভ কৰি অসমৰ অজন্তা নেওগ, পীয়ূষ হাজৰিকা আৰু জয়ন্ত মল্ল বৰুৱাৰ দৰে প্ৰভাৱশালী মন্ত্ৰীসকলক ইয়াত মুখ্য অতিথি হিচাপে ৰখা হৈছে।
কেৱল এইবাৰেই নহয়, যোৱা ২২ ডিচেম্বৰত আয়োজিত প্ৰাগজ্যোতিষপুৰ দিৱসতো একেই দৃশ্য দেখা গৈছিল। সেই অনুষ্ঠানলৈও ১৭ জনকৈ বিজেপিৰ মন্ত্ৰী-বিধায়কক নিমন্ত্ৰণ কৰা হৈছিল। বিৰোধী দলৰ পৰা কেৱল এজন বিধায়ক দিগন্ত বৰ্মনকহে দেখা গৈছিল। সদস্যসকলে অভিযোগ কৰিছে যে সমাজৰ জ্ঞানী-গুণী লোকসকলক সম্পূৰ্ণৰূপে বাদ দি কেৱল ৰাজনৈতিক নেতাক গুৰুত্ব দিয়াৰ ফলত সংগঠনটোৰ স্বকীয়তা হেৰাই গৈছে। মুখ্যমন্ত্ৰী হিমন্ত বিশ্ব শৰ্মাৰ পৰা আৰম্ভ কৰি বিজেপিৰ ৰাজ্যিক সভাপতি দিলীপ শইকীয়ালৈকে সকলোকে সন্মিলনৰ বিভিন্ন পদত বহুৱাই দিয়া কাৰ্যই সচাকৈয়ে সাধাৰণ ৰাইজক চিন্তিত কৰি তুলিছে।
আটাইতকৈ গুৰুত্বপূৰ্ণ কথাটো হ’ল, কলিতা জনগোষ্ঠীৰ মূল সমস্যাসমূহ এতিয়া যেন সম্পূৰ্ণৰূপে তল পৰি গৈছে। প্ৰায় ৭০ লাখ জনসংখ্যা থকা এই বৃহৎ জনগোষ্ঠীটোৱে দীৰ্ঘদিন ধৰি জনজাতিকৰণ আৰু চৰকাৰী চাকৰিত ১৮ শতাংশ সংৰক্ষণৰ দাবী জনাই আহিছে। কিন্তু অভিযোগ উঠিছে যে সন্মিলনৰ নেতৃত্বই চৰকাৰৰ ওপৰত এই দাবীসমূহ পূৰণৰ বাবে হেঁচা দিয়াৰ পৰিৱৰ্তে মন্ত্ৰীসকলক সন্তুষ্ট কৰাতহে বেছি ব্যস্ত হৈ পৰিছে। চৰকাৰে আজিলৈকে এই দাবীসমূহৰ ক্ষেত্ৰত কোনো পদক্ষেপ লোৱা নাই, অথচ সন্মিলনৰ নেতৃত্বই কেৱল শাসকীয় দলৰ গুণগান গাবলৈ আৰম্ভ কৰিছে বুলি একাংশ সদস্যই দুখ প্ৰকাশ কৰিছে।
