এই খবৰ কলম্বিয়াৰ। কলম্বিয়াৰ ৰাজধানী বগোটাৰ বিমানবন্দৰত এভিয়ানকা এয়াৰলাইন্সৰ এখন বিমানৰ আণ্ডাৰকেৰেজত উদ্ধাৰ হৈছে দুজন যুৱকৰ অৰ্ধগলিত মৃতদেহ।
যোৱা শুকুৰবাৰে সন্ধিয়া বিমানখন মেৰামতিৰ কাম চলি থকাৰ সময়তে বিমানবন্দৰৰ কৰ্মীয়ে বিমানখনৰ আণ্ডাৰকেৰেজত উদ্ধাৰ কৰে মৃতদেহকেইটা।
চিলিৰ ছান্টিয়াগোৰ পৰা যোৱা এই বিমানখন শুকুৰবাৰে সন্ধিয়া বগোটা বিমানবন্দৰত উপস্থিত হয় । শনিবাৰে এভিয়ানকাই এক বিবৃতিত কয় যে বগোটাৰ এল ড’ৰাডো বিমানবন্দৰত উপস্থিত হোৱাৰ পিছত বিমান সংস্থাৰ কৰ্মচাৰীয়ে বিমানখনৰ আণ্ডাৰকেৰেজত দুটা মৃতদেহ উদ্ধাৰ কৰে।
এভিয়ানকা কৰ্তৃপক্ষই যুৱক দুজনৰ পৰিয়ালৰ প্ৰতি সহানুভূতি প্ৰকাশ কৰিছে। বিবৃতিটোত আৰু কোৱা হৈছে যে তেওঁলোকে প্ৰতিখন বিমান উৰাৰ পূৰ্বে বিমানখনত তালাচী চলায়। শুক্ৰবাৰেও এভিয়ানকা এয়াৰলাইন্সৰ এই বিমান খনত উৰণৰ পূৰ্বে তালাচী চলাওতে তেওঁলোকে অনুভৱ কৰে যে আণ্ডাৰকেৰেজত কিবা এটা আছে। তেনেদৰেই বিমানখনৰ আণ্ডাৰকেৰেজত উদ্ধাৰ হয় দুই যুৱকৰ মৃতদেহ।
উল্লেখ্য যে মৃত দুজনৰ এতিয়ালৈকে চিনাক্ত হোৱা নাই। মৃত ব্যক্তি দুজনৰ লগত কোনো পৰিচয় পত্ৰ পোৱা নগ’ল। কিন্তু মৃত এজন যুৱকৰ পকেটত ডমিনিকান ৰিপাব্লিকৰ কিছু মুদ্ৰা আছিল। তেওঁলোকৰ লগত থকা ছুটকেছটো ডমিনিকান ৰিপাব্লিকৰ কিছুমান নথি-পত্ৰ আছিল। সেই সূত্ৰেই ধাৰণা কৰা হয় যে তেওঁলোকে সেই দেশৰে বাসিন্দা আছিল।