Right to information গোলাঘাট জিলাৰ কহঁৰাত থকা কাজিৰঙা সমাৰোহ কেন্দ্ৰত সোমবাৰে অসম তথ্য আয়োগৰ উদ্যোগত তথ্য জনাৰ অধিকাৰ আইন-২০০৫ সন্দৰ্ভত ৰাজ্য চৰকাৰৰ জিলা পৰ্যায়ৰ বিভিন্ন বিভাগৰ মুৰব্বীসকলৰ বাবে এক সজাগতা অনুষ্ঠানৰ আয়োজন কৰা হয়।
গোলাঘাট জিলাৰ উপায়ুক্ত আৰু কাজিৰঙা ৰাষ্ট্ৰীয় উদ্যানৰ সঞ্চালকৰ লগতে বিভিন্ন বিভাগৰ জিলা পৰ্যায়ৰ মুৰব্বী বিষয়াসকলৰ উপস্থিতিত অনুষ্ঠিত বৈঠকত অসমৰ মুখ্য তথ্য বিষয়া ডঃ এ পি ৰাউটে আদৰণি ভাষণ দিয়ে।
তেওঁ চৰকাৰী বিষয়া আৰু বিভিন্ন বিভাগৰ ৰাজহুৱা তথ্য বিষয়াসকলক তথ্যসমূহ সঠিকভাৱে ৰাখিবলৈ আহ্বান জনায় যাতে তথ্য জনাৰ অধিকাৰ আইনৰ অধীনত জনসাধাৰণে তথ্য বিচাৰিলে সময়মতে যোগান ধৰিব পৰা যায়।
তেওঁ তথ্য জনাৰ অধিকাৰ আইনখনে ৰাইজৰ বাবে যিকোনো বিভাগৰ স্বচ্ছতা, জবাবদিহিতা আৰু দায়বদ্ধতা অটুট ৰখা তথা চৰকাৰী আঁচনিসমূহৰ সফল ৰূপায়ণৰ ক্ষেত্ৰত এটা গুৰুত্বপূৰ্ণ ভূমিকা পালন কৰে বুলি উল্লেখ কৰে।
জনসাধাৰণে সহজে যাতে এই তথ্যসমূহ লাভ কৰে সেয়া সুনিশ্চিত কৰিবলৈ প্ৰয়োজনীয় সকলো ব্যৱস্থা গ্ৰহণৰ বাবে তেওঁ বিভাগসমূহক আহ্বান জনায় ।
Also Read: নিৰ্বাচনৰ পূৰ্বে দিয়া এটাও প্ৰতিশ্ৰুতি চৰকাৰখনে আজি পৰ্যন্ত কাৰ্যক্ষম নকৰিলে: সাংসদ গৌৰৱ গগৈ
অনুষ্ঠানত অংশ লৈ ৰাজ্যিক তথ্য আয়ুক্ত কনক চন্দ্ৰ শৰ্মাই কেতবোৰ নিৰ্দিষ্ট বিধি ব্যৱস্থাৰ অধীনত ৰাজহুৱা তথ্য-পাতিসমূহ শৃঙ্খলাবদ্ধভাৱে ৰখাৰ বিষয়ত গুৰুত্ব আৰোপ কৰে।
তেওঁ কয় যে ইতিমধ্যে আইনে ৰাজহুৱা তথ্য-পাতি ৰখাৰ কেতবোৰ বিধি ব্যৱস্থা নিৰ্ধাৰণ কৰিছে। প্ৰতিগৰাকী বিষয়াই তথ্যসমূহ নিৰ্ধাৰিত ব্যৱস্থা অনুসৰি মজুত ৰাখিলে কোনো আবেদনকাৰীয়ে তথ্য বিচাৰি ঘুমুটিয়াই ফুৰিবলগীয়া নহয় বুলিও তেওঁ মত প্ৰকাশ কৰে ।
অনুষ্ঠানত ৰাজ্যিক তথ্য আয়ুক্ত সমুদ্ৰ গুপ্ত কাশ্যপে পাৱাৰপইণ্ট প্ৰেজেণ্টেশ্যনৰ সহায়ত তথ্য জনাৰ অধিকাৰ আইন সন্দৰ্ভত বিতং ব্যাখ্যা আগবঢ়ায়। তেওঁ বিষয়াসকলক নিৰ্ধাৰিত সময়ৰ ভিতৰত আবেদনকাৰীক তথ্য প্ৰদানৰ ব্যৱস্থা সুনিশ্চিত কৰিবলৈ আহ্বান জনায় ।
তেওঁ কয় যে এই আইনখন চৰকাৰ, আৰক্ষী বা ন্যায়ালয়ে নহয়, বৰং ৰাইজেহে ৰূপায়ন কৰে। ইয়াত ৰাইজৰ স্বাৰ্থ আটাইতকৈ ওপৰত বুলি উল্লেখ কৰি তেওঁ কয় যে ভাৰতীয় সংবিধানৰ মতে তথ্য জনাৰ অধিকাৰ আইন এটা মৌলিক অধিকাৰ ।
অনুষ্ঠানত বিভিন্ন বিভাগৰ মুৰব্বী বিষয়াসকলে এই আইনৰ অধীনত তথ্য প্ৰদান কৰিবলৈ যাওঁতে সন্মুখীন হোৱা সমস্যাসমূহৰ বিষয়ে অৱগত কৰে। অনুষ্ঠানত ৰাজ্যিক তথ্য আয়োগৰ সচিব অনিল কুমাৰ দেউৰীয়ে উপস্থিত সকলোকে আদৰণি জনোৱাৰ লগতে শলাগৰ শৰাই আগবঢ়ায়।
