বেতন সুৰক্ষাৰ ব্যৱস্থা নকৰাকৈ বিশেষ নিযুক্তিৰ ব্যৱস্থাৰে (Special Recruitment Drive) ৩৫ হাজাৰ ঠিকাভিত্তিক টে’ট উত্তীৰ্ণ শিক্ষকক চাকৰি নিয়মীয়াকৰণৰ নামত চৰম প্ৰতাৰণা কৰিবলৈ ওলাইছে মুখ্যমন্ত্ৰী হিমন্ত বিশ্ব শৰ্মা আৰু শিক্ষামন্ত্ৰী ৰনোজ পেগুৰ নেতৃত্বত অসম চৰকাৰে। অকল ঠিকাভিত্তিক শিক্ষককেই নহয় নতুন উচ্চতৰ মাধ্যমিক বিদ্যালয় শিক্ষক, উচ্চ মাধ্যমিক বিদ্যালয় শিক্ষক আৰু প্ৰাথমিক শিক্ষক নিযুক্তিৰ ক্ষেত্ৰতো ঠগ-প্ৰবঞ্চনাৰ আশ্ৰয় লৈছে অসম চৰকাৰে।
ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে মুখ্যমন্ত্ৰী আৰু অসম চৰকাৰৰ শিক্ষক সমাজক চৰম অন্যায় কৰা আৰু যুৱ প্ৰজন্মক প্ৰতাৰণা কৰা এনে প্ৰবঞ্চক মানসিকতাক তীব্ৰ নিন্দা কৰিছে। ডি ৱাই এফ আইয়ে বেতন সুৰক্ষাসহ চাকৰি নিয়মীয়া কৰাৰ লগতে ইতিমধ্যে ঘোষণা কৰা আৰু আৱেদন কৰা সমগ্ৰ শিক্ষক পদৰ তৎকালে নিযুক্তি দিবলৈ দাবী জনাইছে।
ঠিকাভিত্তি ৩৫,১৩৩ গৰাকী শিক্ষক চাকৰি নিয়মীয়া কৰিবলৈ চৰকাৰে বিশেষ নিযুক্তিৰ ব্যৱস্থা কৰিছে। আচৰিত কথা যে এইসকল শিক্ষকক এসময়ত প্ৰায় নিয়মীয়া কৰা বুলি অসম চৰকাৰ আৰু মুখ্যমন্ত্ৰীয়ে ব্যাপক প্ৰচাৰ কৰি ৰাজনৈতিক লাভ বুটলিবলৈ চেষ্টা চলাইছিল। এই শিক্ষকসকলক শিক্ষক নিযুক্তিৰ সকলো বিধান মানি বিজ্ঞাপন প্ৰকাশ কৰি বিশাল নিযুক্তি মেলা পাতি নিযুক্তি দিয়াৰ ব্যৱস্থা কৰিছিলে। আজি ১২ বছৰ কাল শিক্ষকতা কৰি এইসকল শিক্ষকে ৰাজ্যখনৰ শিক্ষা ব্যৱস্থালৈ যথেষ্ট অৰিহণা আগবঢ়াই আহিছে। এনে ক্ষেত্ৰত তেওঁলোকৰ চাকৰি নিঃচৰ্তভাৱে নিয়মীয়া কৰাৰ প্ৰয়োজন যদিও চৰকাৰে কুটিল মানসিকতাৰে তেওঁলোকক নতুন নিযুক্তি প্ৰক্ৰিয়াৰ মাজলৈ ঠেলি দিব বিচাৰিছে। এয়া দেখদেখকৈ অন্যায়। এই পদক্ষেপ কাৰ্যকৰী কৰিবলৈ হ’লে কৰ্মৰত ঠিকাভিত্তিক শিক্ষকসকলে আৰ্থিকভাৱে বৃহৎ লোকচানৰ সন্মুখীন হোৱাৰ লগতে তেওঁলোকে ইমান দিনে কৰি অহা সেৱাৰ প্ৰতি ঘৰ অন্যায় কৰা হ’ব।
অসম চৰকাৰে নতুন শিক্ষক নিযুক্তিৰ নামতো ৰাজ্যখনৰ শিক্ষিত যুৱক-যুৱতীসকলৰ প্ৰতি ডাঙৰ অন্যায় কৰাৰ লগতে ছাত্ৰ-ছাত্ৰীৰ প্ৰতিও অন্যায় কৰিছে। আচৰিত কথা যে এইখন চৰকাৰে ২০২৩ চনৰ ডিচেম্বৰ মাহৰ ২৬ তাৰিখে এক বিজ্ঞাপন প্ৰকাশ কৰিছিল। এই বিজ্ঞাপন মতে প্ৰাথমিক বিদ্যালয়ৰ ৩৮০০ টা আৰু উচ্চ প্ৰাথমিক বিদ্যালয়ৰ ১৭৫০ টা খালী পদত নিযুক্তি দিব। ২০২৪ চনৰ ২ জানুৱাৰীৰ পৰা ৰাজ্যখনৰ কেইবা হাজাৰ প্ৰাৰ্থীয়ে এই খালী পদৰ বিপৰীতে আৱেদন কৰিলে। কিন্তু আজি ৮ মাহ উকলি যোৱাৰ পাছতো এই পদসমূহৰ কোনো নিযুক্তিৰ ব্যৱস্থা নকৰিলে, ভবিষ্যতে কেতিয়া হ’ব তাৰো কোনো সুদূত্তোৰ নাই।
স্নাতক আৰু স্নাতকোত্তৰ শিক্ষকৰ ৮,৯৮০ টা খালী পদৰ বিজ্ঞাপন প্ৰকাশ কৰিলে যদিও আজি ৭ মাহে আৱেদন প্ৰক্ৰিয়া আৰম্ভ নকৰিলে। চৰকাৰে ঘোষণা কৰা “টে’ট কাম ৰিক্ৰুটমেন্ট টেষ্ট(TET cum Recruitment Test)” পতাৰ ক্ষেত্ৰতো কোনো খবৰ নাই। ফলত নিযুক্তিৰ বাবে আশাপালি থকা হাজাৰ হাজাৰ বি এড উত্তীৰ্ণ যুৱক-যুৱতীয়ে চৰম দুশ্চিন্তাত দিন পাৰ কৰিবলগীয়া হৈছে। যি সময়ত কথাই প্ৰতি মুখ্যমন্ত্ৰীয়ে নিযুক্তিৰ কথা কয় সেই সময়তে ঘোষণা কৰাৰ পিছতো মাহৰ পিছত মাহলৈ নিযুক্তি প্ৰক্ৰিয়া আৰম্ভ নকৰাৰ অন্তৰালত নানা সন্দেহ সৃষ্টি হৈছে। নিৰ্বাচনৰ আগমুহূৰ্তত এনে ঘোষণাবোৰ কৰি শিক্ষিত যুৱক-যুৱতীসকলক মুখ্যমন্ত্ৰী হিমন্ত বিশ্ব শৰ্মা আৰু বিজেপি দলে তেওঁলোকৰ পক্ষত ব্যৱহাৰ কৰিবলৈ গভীৰ ষড়যন্ত্ৰ কৰা বুলি শেহতীয়া স্থিতিয়ে প্ৰমাণ কৰিছে। ডি ৱাই এফ আইয়ে এই চক্ৰান্তক ধিক্কাৰ জনাইছে আৰু ইতিমধ্যে ঘোষণা কৰা সমগ্ৰ নিযুক্তি প্ৰক্ৰিয়া তৎকালে আৰম্ভ কৰিবলৈ দাবী কৰিছে। ডি ৱাই এফ আইয়ে লক্ষ্য কৰিছে যে মুখ্যমন্ত্ৰী গৰাকী নিযুক্তিৰ বিষয়সমূহত তৎপৰ হোৱাৰ সলনি সাম্প্ৰদায়িক ৰাজনীতিতহে ব্যস্ত হৈছে। এনে ধৰণৰ ৰাজনীতিৰ সলনি নিযুক্তি প্ৰক্ৰিয়া তৎকালে আৰম্ভ নকৰিলে অতি শিঘ্ৰে আন্দোলনৰ হুংকাৰ দিছে সংগঠনটোৱে।
